സംസ്കൃത സർവ്വകലാശാലയിൽ പി.ജി ഡിപ്ലോമ; പ്രവേശന പരീക്ഷ 11ന്

ശ്രീശങ്കരാചാര്യ സംസ്കൃത സർവകലാശാലയിൽ പി.ജി. ഡിപ്ലോമ ഇൻ മാനുസ്ക്രിപ്റ്റോളജി പ്രോഗ്രാമിൽ ഒഴിവുള്ള സീറ്റുകളിലേക്ക് പ്രവേശന പരീക്ഷ നടത്തും. 

കാലടി: ശ്രീശങ്കരാചാര്യ സംസ്കൃത സർവ്വകലാശാലയുടെ പി. ജി. ഡിപ്ലോമ ഇൻ മാനുസ്ക്രിപ്റ്റോളജി പ്രോഗ്രാമിൽ 11 സീറ്റുകൾ ഒഴിവുണ്ട്. ജനറൽ (ഒന്ന്), ഇ. ഡബ്ല്യു.എസ്.(2), ഈഴവ (രണ്ട്), മുസ്ലിം (ഒന്ന്), ഒ. ബി. എച്ച്. (1), എസ്. സി. (മൂന്ന്), എസ്. ടി. (ഒന്ന്) എന്നിങ്ങനെയാണ് ഒഴിവുകൾ. യോഗ്യരായ വിദ്യാർത്ഥികൾ ഓഗസ്റ്റ് 11ന് നടത്തുന്ന പ്രവേശന പരീക്ഷയിൽ പങ്കെടുക്കണമെന്ന് സർവ്വകലാശാല അറിയിച്ചു.

സംസ്കൃത സർവ്വകലാശാലയിൽ ‘വിജ്ഞാന തൊഴിൽ പദ്ധതി’

പഠനത്തോടൊപ്പം ജോലി ഉറപ്പ് വരുത്തുന്ന രൂപത്തിൽ വിദ്യാർത്ഥികളെ ഒരുക്കിയെടുക്കുക എന്ന ലക്ഷ്യത്തോടെ ശ്രീശങ്കരാചാര്യ സംസ്കൃത സർവ്വകലാശാലയിൽ ‘വിജ്ഞാന തൊഴിൽ പദ്ധതി’ ക്ക് രൂപം നൽകിയതായി വൈസ് ചാൻസലർ പ്രൊഫ. കെ. കെ. ഗീതാകുമാരി അറിയിച്ചു. കേരള നോളജ് ഇക്കോണമി മിഷനുമായി സഹകരിച്ചാണ് പദ്ധതി നടപ്പിലാക്കുക. കാലടി മുഖ്യ ക്യാമ്പസിലും സർവ്വകലാശാലയുടെ വിവിധ പ്രാദേശിക കേന്ദ്രങ്ങളിലും പഠിക്കുന്ന അവസാന വർഷ വിദ്യാർത്ഥികൾക്ക് പ്രയോജനപ്പെടുന്ന വിധത്തിലാണ് പദ്ധതിയുടെ ഒന്നാം ഘട്ടം തയ്യാറാക്കിയിരിക്കുന്നത്. ഈ അധ്യയന വർഷം തന്നെ പദ്ധതിക്ക് തുടക്കം കുറിക്കും. പദ്ധതിയുടെ ഉദ്ഘാടനം സെപ്തംബറിൽ നടക്കും.

വിവിധ തൊഴിലുകൾ, സ്വയം തൊഴിൽ സംരംഭങ്ങൾ എന്നിങ്ങനെ വിവിധ മേഖലകളിൽ വിദ്യാർത്ഥികൾക്ക് ഓറിയന്റേഷൻ നൽകും. വിദ്യാഭ്യാസ യോഗ്യതയ്ക്ക് അനുസൃതമായ തൊഴിലുകളുമായുളള നൈപുണ്യ വിടവ് അതത് മേഖലകളിലെ അധ്യാപകരെയും തൊഴിൽ ദാതാക്കളുടെയും സഹായത്തോടെ പരിശോധിക്കും. എല്ലാ വിദ്യാർത്ഥികൾക്കും ഇന്റർവ്യൂ പരിശീലനം, ഇംഗ്ലീഷ് ഭാഷാ നൈപുണ്യം ഉൾപ്പെടെയുളള സോഫ്റ്റ് സ്കിൽ പരിശീലനം നിർബന്ധമാക്കും. സി എസ് ആർ ഫണ്ട് കണ്ടെത്തി, ഉയർന്ന സ്കിൽ കോഴ്സുകളിൽ വിദ്യാർത്ഥികൾക്ക് പ്രവേശനം ഉറപ്പാക്കും. മൂന്ന് മാസത്തിനുളളിൽ സർവ്വകലാശാലയിലെ അവസാന വർഷ വിദ്യാർത്ഥികൾക്കും കഴിഞ്ഞ മൂന്ന് വർഷത്തിനുളളിൽ പഠനം പൂർത്തിയാക്കിയ സോഫ്റ്റ് സ്കിൽ കോഴ്സുകൾ ആവശ്യമുളള വിദ്യാർത്ഥികൾക്കും യോഗ്യതയ്ക്കനുസരിച്ച് കോഴ്സുകൾ നൽകും. ഡിസംബറിൽ പ്ലേയ്സ്‍മെന്റ് ഡ്രൈവ് നടത്തുമെന്നും പ്രൊഫ. കെ. കെ. ഗീതാകുമാരി പറഞ്ഞു.