തകര്ച്ചയില് ബിയര് വിപണി ; എന്നിട്ടും 'ബഡ്വൈസര്' കമ്പനി ലാഭം കൊയ്യുന്നത് എങ്ങനെ? കുതിപ്പിന് പിന്നിലെ രഹസ്യം ഇതാണ്!
Synopsis
ലോകമെമ്പാടും ബിയർ വിൽപ്പന കുറയുമ്പോഴും, ബഡ്വൈസറിന്റെ നിർമ്മാതാക്കളായ അൻഹെയ്സർ-ബുഷ് ഇൻബെവ് വളർച്ച നേടുകയാണ്. ബിയറിന് പുറമെ റെഡി-ടു-ഡ്രിങ്ക് കോക്ക്ടെയിലുകളിലേക്കും ആൽക്കഹോൾ രഹിത പാനീയങ്ങളിലേക്കും ശ്രദ്ധ തിരിച്ചതാണ് ഈ വിജയത്തിന് പിന്നിൽ.
ലോകമെമ്പാടും ബിയര് വില്പ്പന കുറഞ്ഞുകൊണ്ടിരിക്കുന്നു എന്നത് മദ്യവ്യവസായ രംഗത്തെ ഇപ്പോഴത്തെ വലിയ ആശങ്കയാണ്. എന്നാല് ഈ പ്രതിസന്ധിക്കിടയിലും ലോകത്തിലെ ഏറ്റവും വലിയ ബിയര് നിര്മ്മാതാക്കളായ അന്ഹെയ്സര്- ബുഷ് ഇന്ബെവ് എന്ന കമ്പനി മാത്രം തളരാതെ കുതിക്കുകയാണ്. പ്രശസ്തമായ 'ബഡ്വൈസര്' ബിയറിന്റെ നിര്മ്മാതാക്കളാണ് ഇവര്. ജനം ബിയര് കുടിക്കുന്നത് കുറയ്ക്കുകയോ അല്ലെങ്കില് ബിയര് പൂര്ണ്ണമായും ഉപേക്ഷിക്കുകയോ ചെയ്യുന്ന സാഹചര്യത്തില്, ഈ കമ്പനിയുടെ ഓഹരികള് കഴിഞ്ഞ അഞ്ച് വര്ഷത്തിനിടയിലെ ഏറ്റവും ഉയര്ന്ന നിരക്കിലാണ്. ഈ വര്ഷം മാത്രം ഇവരുടെ ഓഹരികളില് 15 ശതമാനം വര്ദ്ധനവുണ്ടായി.
ബിയറിന് പുറത്തുള്ള 'മാജിക്'
വെറുമൊരു ബിയര് കമ്പനിയായി മാത്രം ഒതുങ്ങിക്കൂടാന് തങ്ങള് തയ്യാറല്ലെന്ന് ഏതാനും വര്ഷങ്ങള്ക്ക് മുമ്പ് തന്നെ അന്ഹെയ്സര്-ബുഷ് തീരുമാനിച്ചിരുന്നു. ഈ ദീര്ഘവീക്ഷണമാണ് അവരെ രക്ഷിച്ചത്. ബിയറിന് പുറമെ, റെഡി-ടു-ഡ്രിങ്ക് വിഭാഗത്തില്പ്പെടുന്ന ക്യാനുകളില് ലഭിക്കുന്ന കോക്ക്ടൈലുകള്, ആല്ക്കഹോള് ഇല്ലാത്ത ബിയറുകള് എന്നിവയിലേക്ക് കമ്പനി ശ്രദ്ധ തിരിച്ചു.
സ്പിരിറ്റ് വിപണിയിലെ താരം: ബിയര് കമ്പനിയാണെങ്കിലും, ഇന്ന് അമേരിക്കയില് ഏറ്റവും വേഗത്തില് വളരുന്ന 'സ്പിരിറ്റ്' വിതരണക്കാരായി ഇവര് മാറി. 'കട്ട് വാട്ടര് സ്പിരിറ്റ്സ്' , 'ന്യൂട്രല്' വോഡ്ക സെല്റ്റ്സര് തുടങ്ങിയ ബ്രാന്ഡുകള് വന് ഹിറ്റായി. കമ്പനിയുടെ ആകെ വരുമാനത്തിന്റെ 3 ശതമാനവും ഇപ്പോള് ഈ വിഭാഗത്തില് നിന്നാണ്. മദ്യം വേണ്ടെന്ന് വെക്കുന്നവര്ക്കായി ഇറക്കിയ ആല്ക്കഹോള് ഇല്ലാത്ത ബിയര് ആയ 'മിക്കെലോബ് അള്ട്രാ സീറോ' ഇപ്പോള് വിപണിയില് ഒന്നാമതാണ്.
മറ്റു കമ്പനികള് വിയര്ക്കുമ്പോള്...
മറ്റു പ്രമുഖ ബിയര് കമ്പനികള് വലിയ പ്രതിസന്ധിയിലൂടെയാണ് കടന്നുപോകുന്നത്. ഹൈനക്കന് ലോകമെമ്പാടുമുള്ള തങ്ങളുടെ ജീവനക്കാരില് 7 ശതമാനം പേരെ വെട്ടിക്കുറക്കാൻ തീരുമാനിച്ചു. മോള്സണ് കൂര്സിന്റെ കാര്യമെടുക്കുമ്പോൾ, കഴിഞ്ഞ പാദത്തില് വില്പ്പനയില് വലിയ ഇടിവുണ്ടായെന്നാണ് റിപ്പോർട്ടുകൾ. കോറോണക്കും വിപണിയില് തിരിച്ചടികള് നേരിടുന്നുണ്ട്. എന്നാല് ഇതിനെയെല്ലാം അന്ഹെയ്സര്-ബുഷ് മറികടന്നത് തങ്ങളുടെ പാനീയങ്ങളുടെ വൈവിധ്യം കൊണ്ടാണ്.
ലോകകപ്പ് ഫുട്ബോളും പ്രതീക്ഷകളും
ഈ വര്ഷം വടക്കേ അമേരിക്കയില് നടക്കുന്ന ഫിഫ ലോകകപ്പ് ഫുട്ബോള് ടൂര്ണമെന്റ് തങ്ങള്ക്ക് വലിയ നേട്ടമാകുമെന്നാണ് കമ്പനിയുടെ പ്രതീക്ഷ. കഴിഞ്ഞ തവണ ഖത്തര് ലോകകപ്പില് സ്റ്റേഡിയങ്ങളില് ബിയര് നിരോധിച്ചത് കമ്പനിക്ക് തിരിച്ചടിയായിരുന്നു. എന്നാല് ഇത്തവണ ലോകകപ്പിന്റെ വലിയ സ്പോണ്സര്മാരില് ഒരാളായ അന്ഹെയ്സര്- ബുഷ്, ആഗോളതലത്തില് തങ്ങളുടെ വില്പ്പന പത്തിരട്ടി വരെ വര്ദ്ധിക്കുമെന്ന് കണക്കുകൂട്ടുന്നു. ചുരുക്കത്തില്, ബിയര് വില്പ്പനയില് ചെറിയ കുറവ് (ഏകദേശം 1.9%) സംഭവിച്ചിട്ടുണ്ടെങ്കിലും, മാറിവരുന്ന ഉപഭോക്താക്കളുടെ അഭിരുചിക്കനുസരിച്ച് പുതിയ പാനീയങ്ങള് വിപണിയിലെത്തിച്ചതാണ് ബഡ്വൈസര് കമ്പനിയെ ലോകവിപണിയിലെ രാജാവായി നിലനിര്ത്തുന്നത്.