80 ശതമാനം രോഗികളും 12 സംസ്ഥാനങ്ങളിൽ; കേരളം മൂന്നാമത്, തമിഴ്നാട്ടിലും കര്ണാടകയിലും ഇന്നുമുതൽ ലോക്ഡൗൺ
Synopsis
രാജ്യത്തെ കൊവിഡ് കേസുകളുടെ പ്രതിദിന വർധന നാല് ലക്ഷം കടക്കുമ്പോഴും കഴിഞ്ഞ ഒരാഴ്ചക്കിടെ 180 ജില്ലകളിൽ പുതിയ കേസുകൾ റിപ്പോർട്ട് ചെയ്തിട്ടില്ലെന്ന് കേന്ദ്ര ആരോഗ്യ മന്ത്രാലയം
ദില്ലി: രാജ്യത്തെ കൊവിഡ് കേസുകളുടെ പ്രതിദിന വർധന നാല് ലക്ഷം കടക്കുമ്പോഴും കഴിഞ്ഞ ഒരാഴ്ചക്കിടെ 180 ജില്ലകളിൽ പുതിയ കേസുകൾ റിപ്പോർട്ട് ചെയ്തിട്ടില്ലെന്ന് കേന്ദ്ര ആരോഗ്യ മന്ത്രാലയം. മൂന്നാഴ്ചക്കിടെ 54 ജില്ലകളിൽ പുതുതായി ആരും രോഗബാധിതരായിട്ടില്ലെന്നും കേന്ദ്രം അറിയിച്ചു. 80 ശതമാനം രോഗികളും 12 സംസ്ഥാനങ്ങളിലാണ്. രാജ്യത്തു ഏറ്റവും കൂടുതൽ രോഗികളുളള സംസ്ഥാനങ്ങളിൽ മൂന്നാം സ്ഥാനത്ത് കേരളമാണ്.
അതിനിടെ, രാജ്യത്ത് കോവിഡ് വ്യാപനം തീവ്രമാകുന്നതിനിടെ പല സംസ്ഥാനങ്ങളും നിയന്ത്രണങ്ങൾ കൂടുതൽ കടുപ്പിക്കുന്നു. തമിഴ്നാട്ടിലും കര്ണാടകത്തിലും ഇന്ന് മുതല് സമ്പൂര്ണ ലോക്ഡൗണ് ഏര്പ്പെടുത്തി. അടിയന്തര ആവശ്യങ്ങളൊഴികെ സംസ്ഥാനാന്തര യാത്രകള് വിലക്കി. 14 ദിവസത്തേക്കാണ് സമ്പൂര്ണ അടച്ചിടല്. അവശ്യസാധനങ്ങള് വില്ക്കുന്ന കടകള് ഉച്ചയ്ക്ക് 12 മണിവരെ തമിഴ്നാട്ടില് തുറന്ന് പ്രവര്ത്തിക്കും.
കർണ്ണാടകത്തിൽ ഭക്ഷ്യസാധനങ്ങള് വില്ക്കുന്ന കടകള് രാവിലെ ആറ് മുതല് പത്ത് വരെ തുറക്കും.കേരള തമിഴ്നാട് കര്ണാടക അതിര്ത്തികളില് പരിശോധന കൂടുതല് ശക്തമാക്കും. അതേസമയം ഉത്തരാഖണ്ഡിൽ നാളെ മുതൽ ഈ മാസം 18 വരെ കർഫ്യൂ ഏർപ്പെടുത്തി. ഉത്തർപ്രദേശിലെ നോയിഡയിലും നിയന്ത്രണങ്ങൾ കടുപ്പിച്ചു. ഹിമാചൽ പ്രദേശിൽ തീവ്ര വ്യാപനം ഉള്ള ഇടങ്ങളിൽ അവശ്യ സാധനങ്ങളുടെ കടകൾക്കു മൂന്ന് മണിക്കൂർ നേരം മാത്രമാണ് പ്രവർത്തനാനുമതി.
കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്സിന് എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യര്ത്ഥിക്കുന്നു. ഒന്നിച്ച് നിന്നാല് നമുക്കീ മഹാമാരിയെ തോല്പ്പിക്കാനാവും. #BreakTheChain #ANCares #IndiaFightsCorona