അജിത് അഗാർക്കർ തുടരില്ല; പുതിയ ചീഫ് സെലക്ടറെ പ്രഖ്യാപിക്കാനൊരുങ്ങി ബിസിസിഐ

പുതിയ ചെയർമാനെ കണ്ടെത്തുന്നതിൽ ബോർഡിന് ധൃതിയില്ലെന്നും ആവശ്യത്തിന് സമയമുണ്ടെന്നും പി.ടി.ഐ വീഡിയോസിന് നൽകിയ അഭിമുഖത്തിൽ ബിസിസിഐ സെക്രട്ടറി പറഞ്ഞു.

മുംബൈ: ഇന്ത്യൻ ക്രിക്കറ്റ് ടീം സെലക്ഷൻ കമ്മിറ്റി ചെയർമാൻ സ്ഥാനത്തുനിന്ന് അജിത് അഗാർക്കർ പടിയിറങ്ങുമെന്ന് ഉറപ്പിച്ച് ബിസിസിഐ. മൂന്ന് വർഷത്തെ കരാർ കാലാവധി പൂർത്തിയാകുന്ന സാഹചര്യത്തിൽ സ്ഥാനത്ത് തുടരാൻ താൽപര്യമില്ലെന്ന് അഗാർക്കർ ബിസിസിഐയെ അറിയിച്ചു. ഒക്ടോബർ 4-ന് അഗാർക്കറുടെ കാലാവധി അവസാനിച്ച ശേഷമേ പുതിയ ചീഫ് സെലക്ടറെ പ്രഖ്യാപിക്കൂ എന്ന് ബിസിസിഐ സെക്രട്ടറി ദേവജിത് സൈകിയ വ്യക്തമാക്കി.

കരാർ നീട്ടിനൽകേണ്ടതില്ലെന്ന തീരുമാനം സെപ്റ്റംബർ 18-നാണ് അഗാർക്കർ ബിസിസിഐയെ അറിയിച്ചത്. തുടർന്ന് സെലക്ഷൻ കമ്മിറ്റിയുടെ ഭാവി കാര്യങ്ങളിൽ തീരുമാനമെടുക്കാൻ ബിസിസിഐ ഭാരവാഹികളെ ചുമതലപ്പെടുത്തുകയായിരുന്നു. പുതിയ ചെയർമാനെ കണ്ടെത്തുന്നതിൽ ബോർഡിന് ധൃതിയില്ലെന്നും ആവശ്യത്തിന് സമയമുണ്ടെന്നും പി.ടി.ഐ വീഡിയോസിന് നൽകിയ അഭിമുഖത്തിൽ ബിസിസിഐ സെക്രട്ടറി പറഞ്ഞു. ഒക്ടോബർ 4 വരെ അഗാർക്കർ സ്ഥാനത്ത് തുടരും. അതിനുശേഷമുണ്ടാകുന്ന ഒഴിവിലേക്ക് പുതിയ ആളെ കണ്ടെത്താൻ ബിസിസിഐക്ക് സമയമുണ്ട്. തീരുമാനമായാലുടൻ അത് ഔദ്യോഗികമായി പുറത്തുവിടുമെന്നും സൈകിയ വ്യക്തമാക്കി.

2023 ജൂലൈയിലാണ് ചേതൻ ശർമ്മയ്ക്ക് പകരക്കാരനായി അജിത് അഗാർക്കർ ചീഫ് സെലക്ടറായി ചുമതലയേൽക്കുന്നത്. അഗാർക്കറുടെ നേതൃത്വത്തിന് കീഴിൽ 2024-ലെ ടി20 ലോകകപ്പും 2025-ലെ ചാമ്പ്യൻസ് ട്രോഫിയും ഇന്ത്യ സ്വന്തമാക്കിയിരുന്നു. 2027 ഏകദിന ലോകകപ്പിനായി ടീമിനെ സജ്ജമാക്കുക എന്ന പ്രധാന ദൗത്യമായിരിക്കും പുതിയ സെലക്ഷൻ കമ്മിറ്റി ചെയർമാനെ കാത്തിരിക്കുന്നത്. മുന്‍ ഇന്ത്യൻ താരം പാര്‍ത്ഥിവ് പട്ടേലിന്‍റെ പേരാണ് സെലക്ഷൻ കമ്മിറ്റി ചെയര്‍മാൻ സ്ഥാനത്തേക്ക് ബിസിസിഐ പരിഗണിക്കുന്നത് എന്നാണ് റിപ്പോര്‍ട്ട്. ഏഷ്യൻ ഗെയിംസിൽ സ്വർണം നേടിയ ഇന്ത്യൻ വനിതാ ക്രിക്കറ്റ് ടീമിന്റെ മികച്ച പ്രകടനത്തെ ബിസിസിഐ സെക്രട്ടറി അഭിനന്ദിച്ചു. ജപ്പാനിൽ വനിതാ ടീം കാഴ്ചവെച്ച മിന്നുന്ന പ്രകടനം പുരുഷ ടീമും ആവർത്തിക്കുമെന്ന പ്രതീക്ഷ അദ്ദേഹം പങ്കുവെച്ചു.

സെപ്റ്റംബർ 28-നാണ് ഏഷ്യൻ ഗെയിംസിൽ ഇന്ത്യൻ പുരുഷ ടീമിന്‍റെ മത്സരങ്ങൾ ആരംഭിക്കുന്നത്. ഒക്ടോബർ 3-നാണ് ഫൈനൽ. വനിതാ ടീം നേടിയ വിജയത്തുടർച്ച പുരുഷന്മാരും നിലനിർത്തുമെന്നും ഒക്ടോബർ 3-ന് രാജ്യത്തിന് വീണ്ടുമൊരു സ്വർണ്ണനേട്ടം ആഘോഷിക്കാൻ സാധിക്കുമെന്നും സൈകിയ പറഞ്ഞു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക