'അവനെ ടീമിൽ നിന്നൊഴിവാക്കിയത് വിശ്വസിക്കാനാവുന്നില്ല'; ഇന്ത്യൻ ടീം മാനേജ്‌മെന്‍റിനെതിരെ ആഞ്ഞടിച്ച് ഓസീസ് ഇതിഹാസം

ഇന്ത്യയുടെ ഒന്നാം നമ്പർ സ്പിന്നറായി കളിക്കേണ്ട താരമാണ് കുൽദീപ് എന്ന് വ്യക്തമാക്കിയ ക്ലാർക്ക്, ഏത് ഫോർമാറ്റിലും വിക്കറ്റ് വീഴ്ത്താനുള്ള കഴിവാണ് പ്രധാനമെന്നും ചൂണ്ടിക്കാട്ടി.

ബെംഗളൂരു: വെസ്റ്റ് ഇൻഡീസിനെതിരായ ടി20 പരമ്പരയിലെ മൂന്നും നാലും മത്സരങ്ങളിൽ നിന്ന് ചൈനാമാൻ സ്പിന്നർ കുൽദീപ് യാദവിനെ ഒഴിവാക്കിയ ഇന്ത്യൻ ടീം മാനേജ്‌മെന്‍റിന്‍റെ തീരുമാനത്തിനെതിരെ കടുത്ത വിമർശനവുമായി മുൻ ഓസ്ട്രേലിയൻ ക്യാപ്റ്റൻ മൈക്കൽ ക്ലാർക്ക്. പരമ്പരയിലെ ആദ്യ മത്സരത്തിൽ 33 റൺസിന് രണ്ട് വിക്കറ്റ് വീഴ്ത്തി തിളങ്ങിയെങ്കിലും, രണ്ടാം മത്സരത്തിൽ നാല് ഓവറിൽ 53 റൺസ് വഴങ്ങിയതിന് പിന്നാലെയാണ് കുൽദീപിനെ പ്ലെയിംഗ് ഇലവനിൽ നിന്ന് ഒഴിവാക്കിയത്. നിലവിൽ അഞ്ച് മത്സരങ്ങളടങ്ങിയ പരമ്പര 2-2 എന്ന നിലയിലാണ്.

ഇന്ത്യയുടെ ഒന്നാം നമ്പർ സ്പിന്നറായി കളിക്കേണ്ട താരമാണ് കുൽദീപ് എന്ന് വ്യക്തമാക്കിയ ക്ലാർക്ക്, ഏത് ഫോർമാറ്റിലും വിക്കറ്റ് വീഴ്ത്താനുള്ള കഴിവാണ് പ്രധാനമെന്നും ചൂണ്ടിക്കാട്ടി. എതിർ ടീമിനെ ഓൾ ഔട്ടാക്കാൻ നോക്കാതെ വെറും റൺസ് പ്രതിരോധിക്കാൻ മാത്രം ക്യാപ്റ്റൻമാർ ശ്രമിക്കുന്നതാണ് ഇത്തരം തിരിച്ചടികൾക്ക് കാരണമെന്നും ബിയോണ്ട് 23 ക്രിക്കറ്റ് പോഡ്കാസ്റ്റിൽ സംസാരിക്കവെ ക്ലാർക്ക് കൂട്ടിച്ചേർത്തു. 56 ടി20 മത്സരങ്ങളിൽ നിന്ന് 14.20 ശരാശരിയിൽ 98 വിക്കറ്റുകൾ കുൽദീപ് നേടിയിട്ടുണ്ട്.

നിർണായക അഞ്ചാം പോരാട്ടം ഇന്ന്

പരമ്പരയിലെ നിർണായകമായ അഞ്ചാം ടി20 പോരാട്ടം ഇന്ന് ബെംഗളൂരുവിൽ നടക്കാനിരിക്കെ, കുൽദീപ് യാദവിനെ ടീമിൽ തിരികെ ഉൾപ്പെടുത്തണമെന്ന് മുൻ താരം ശ്രീവത്സ ഗോ സ്വാമിയും ആവശ്യപ്പെട്ടു. മായങ്ക് യാദവ്, പ്രിൻസ് യാദവ് തുടങ്ങിയ അനുഭവസമ്പത്തില്ലാത്ത ബൗളർമാർക്കൊപ്പം കുൽദീപിനെപ്പോലൊരു മികച്ച സ്പിന്നർ കൂടി ഉണ്ടെങ്കിൽ മാത്രമേ മിഡിൽ ഓവറുകളിൽ വിക്കറ്റ് വീഴ്ത്താൻ സാധിക്കൂ എന്ന് അദ്ദേഹം വ്യക്തമാക്കി.

ഒരു മോശം മത്സരത്തിന്‍റെ പേരിൽ കുൽദീപിനെ മാറ്റിനിർത്തി നമൻ ധീറിനെപ്പോലുള്ള പാർട്ട് ടൈം ഓൾറൗണ്ടർമാരെ ആശ്രയിക്കുന്നത് തിരിച്ചടിയാകും. ബെംഗളൂരുവിലെ ചിന്നസ്വാമി സ്റ്റേഡിയത്തിൽ നടക്കുന്ന ഇന്നത്തെ മത്സരത്തിൽ പരാജയപ്പെട്ടാൽ 2019-ന് ശേഷം സ്വന്തം മണ്ണിൽ ഇന്ത്യ നേരിടുന്ന ആദ്യ ടി20 പരമ്പര തോൽവിയാകും ഇത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക