രക്ഷയായി ഹര്‍മന്‍പ്രീത്! വനിത പ്രീമിയര്‍ ലീഗ് ഫൈനലില്‍ മുംബൈക്കെതിരെ ഡല്‍ഹിക്ക് കുഞ്ഞന്‍ വിജയലക്ഷ്യം

മലയാളി താരം സജന സജീവന്‍ (0) നിരാശപ്പെടുത്തി. ഏഴ് വിക്കറ്റുകള്‍ മുംബൈക്ക് നഷ്ടമായി.

മുംബൈ: വനിതാ പ്രീമിയര്‍ ലീഗ് ഫൈനലില്‍ മുംബൈ ഇന്ത്യന്‍സിനെതിരെ ഡല്‍ഹി കാപിറ്റല്‍സിന് 150 റണ്‍സ് വിജയലക്ഷ്യം. മുംബൈ, ബ്രാബോണ്‍ സ്‌റ്റേഡിയത്തില്‍ ടോസ് നഷ്ടപ്പെട്ട് ബാറ്റിംഗിനെത്തിയ മുംബൈക്ക് ക്യാപ്റ്റന്‍ ഹര്‍മന്‍പ്രീത് കൗറിന്റെ (44 പന്തില്‍ 66) ഇന്നിംഗ്‌സാണ് ഭേദപ്പെട്ട സ്‌കോറിലേക്ക് നയിച്ചത്. നതാലി സ്‌കിവര്‍ ബ്രന്‍ഡ് 30 റണ്‍സെടുത്തു. കമാലിനിയാണ് (10), അമന്‍ജോത് കൗര്‍ (പുറത്താവാതെ 13) എന്നിവരാണ് രണ്ടക്കം കണ്ട മറ്റൊരു താരങ്ങള്‍. മലയാളി താരം സജന സജീവന്‍ (0) നിരാശപ്പെടുത്തി. ഏഴ് വിക്കറ്റുകള്‍ മുംബൈക്ക് നഷ്ടമായി. ഡല്‍ഹിക്ക് വേണ്ടി മരിസാനെ കാപ്പ്, ജെസ് ജോനാസെന്‍ എന്നിവര്‍ രണ്ട് വിക്കറ്റ് വീതം വീഴ്ത്തി.

തകര്‍ച്ചയോടെയായിരുന്നു മുംബൈയുടെ തുടക്കം. സ്‌കോര്‍ബോര്‍ഡില്‍ 14 റണ്‍സ് മാത്രമുള്ളപ്പോള്‍ ഹെയ്‌ലി മാത്യൂസ് (3), യഷ്ടിക ഭാട്ടിയ (8) എന്നിവരുടെ വിക്കറ്റുകള്‍ മുംബൈക്ക് നഷ്ടമായി. ഇരുവരും കാപ്പിന്റെ പന്തിലാമ് മടങ്ങുന്നത്. ഹെയ്‌ലി ബൗള്‍ഡായപ്പോള്‍, യഷ്ടിക ജമീമ റോഡ്രിഗസിന് ക്യാച്ച് നല്‍കി. പിന്നീട് സ്‌കിവര്‍ - ഹര്‍മന്‍പ്രീത് സഖ്യം 89 റണ്‍സ് കൂട്ടിചേര്‍ത്തു. ഈ കൂട്ടുകെട്ടാണ് മുംബൈ ഇന്ത്യന്‍സിനെ തകര്‍ച്ചയില്‍ നിന്ന് രക്ഷിച്ചത്. 15-ാം ഓവറില്‍ സ്‌കിവര്‍ മടങ്ങി. ചരനിയുടെ പന്തില്‍ മലയാളി താരം മിന്നു മണിയുടെ തകര്‍പ്പന്‍ ക്യാച്ച്. 

പിന്നാലെ മുംബൈയുടെ തകര്‍ച്ചയും ആരംഭിച്ചു. അമേലിയ കെര്‍ (2), സജന (0) എന്നിവര്‍ ജോനാസെന്റെ ഒരോവറില്‍ മടങ്ങി. തുടര്‍ന്ന് ഹര്‍മന്‍പ്രീതും പവലിയനില്‍ തിരിച്ചെത്തി. അന്നാബെല്‍ സതര്‍ലന്‍ഡിന്റെ പന്തില്‍ കാപ്പിന് ക്യാച്ച്. കമാലിനി (10) സ്‌കോര്‍ ഉയര്‍ത്താന്‍ ശ്രമിച്ചെങ്കിലും ചരനി സമ്മതിച്ചില്ല. 19-ാം ഓവറില്‍ മടങ്ങി. അമന്‍ജോത് കൗര്‍ (), സന്‍സ്‌കൃതി ഗുപ്ത (8) പുറത്താവാതെ നിന്നു. രണ്ട് മലയാളി താരങ്ങള്‍ നേര്‍ക്കുനേര്‍ വരുന്ന മത്സരം കൂടിയാണിത്. ഡല്‍ഹിക്കായി മിന്നു മണിയും മുംബൈക്കായി സജന സജീവനും കളിക്കുന്നുണ്ട്. ഇരുവരും വയനാട്ടുകാര്‍. ഇരു ടീമുകളുടേയും പ്ലേയിംഗ് ഇലവന്‍ അറിയാം.

മുംബൈ ഇന്ത്യന്‍സ്: യഷ്ടിക ഭാട്ടിയ (വിക്കറ്റ് കീപ്പര്‍), ഹെയ്ലി മാത്യൂസ്, നാറ്റ് സ്‌കൈവര്‍-ബ്രന്‍ഡ്, ഹര്‍മന്‍പ്രീത് കൗര്‍ (ക്യാപ്റ്റന്‍), സജന സജീവന്‍, അമേലിയ കെര്‍, അമന്‍ജോത് കൗര്‍, ജി കമാലിനി, സംസ്‌കൃതി ഗുപ്ത, ഷബ്‌നിം ഇസ്മായില്‍, സൈക ഇസ്ഹാഖ്.

ഡല്‍ഹി ക്യാപിറ്റല്‍സ്: മെഗ് ലാന്നിംഗ് (ക്യാപ്റ്റന്‍), ഷഫാലി വര്‍മ, ജെമിമ റോഡ്രിഗസ്, അന്നബെല്‍ സതര്‍ലാന്‍ഡ്, മരിസാന്‍ കാപ്പ്, ജെസ് ജോനാസെന്‍, സാറാ ബ്രൈസ് (വിക്കറ്റ് കീപ്പര്‍), നിക്കി പ്രസാദ്, മിന്നു മണി, ശിഖ പാണ്ഡെ, നല്ലപുറെഡ്ഡി ചരണി.