കുല്ദീപിന് നാല് വിക്കറ്റ്; മികച്ച തുടക്കത്തിന് ശേഷം പാകിസ്ഥാന് നിലംപൊത്തി, ഇന്ത്യക്ക് 147 റണ്സ് വിജയലക്ഷ്യം
Synopsis
ഏഷ്യാ കപ്പ് ഫൈനലില് ഇന്ത്യക്കെതിരെ പാകിസ്ഥാന് 147 റണ്സിന് പുറത്തായി. മികച്ച തുടക്കത്തിന് ശേഷം നാല് വിക്കറ്റെടുത്ത കുല്ദീപ് യാദവിന്റെ നേതൃത്വത്തില് ഇന്ത്യന് സ്പിന്നര്മാര് പാകിസ്ഥാനെ തകര്ക്കുകയായിരുന്നു.
ദുബായ്: ഏഷ്യാ കപ്പ് ഫൈനലില് പാകിസ്ഥാനെതിരെ ഇന്ത്യക്ക് 147 റണ്സ് വിജയലക്ഷ്യം. ദുബായ്, രാജ്യന്തര ക്രിക്കറ്റ് സ്റ്റേഡിയത്തില് ടോസ് നഷ്ടപ്പെട്ട് ബാറ്റിംഗിനെത്തിയ പാകിസ്ഥാനെ ഇന്ത്യന് സ്പിന്നര്മാര് ഒതുക്കി നിര്ത്തുകയായിരുന്നു. 19.1 ഓവറില് എല്ലാവരും പുറത്തായി. കുല്ദീപ് യാദവ് ഇന്ത്യക്ക് വേണ്ടി നാല് വിക്കറ്റ് വീഴ്ത്തി. നാല് ഓവറില് 30 റണ്സ് മാത്രമാണ് വിട്ടുകൊടുത്തത്. വരുണ് ചക്രവര്ത്തി, അക്സര് പട്ടേല്, ജസ്പ്രിത് ബുമ്ര എന്നിവര്ക്ക് രണ്ട് വിക്കറ്റ് വീതമുണ്ട്. 38 പന്തില് 57 റണ്സെടുത്ത സാഹിബ്സാദ ഫര്ഹാനാണ് പാകിസ്ഥാന്റെ ടോപ്സ് സ്കോറര്. ഫഖര് സമാന് 35 പന്തില് 46 റണ്സെടുത്തു. മറ്റാര്ക്കും തിളങ്ങാന് സാധിച്ചില്ല.
ഗംഭീര തുടക്കമായിരുന്നു പാകിസ്ഥാന്. ഒന്നാം വിക്കറ്റില് ഫര്ഹാന് - സമാന് സഖ്യം 84 റണ്സ് കൂട്ടിചേര്ത്തിരുന്നു. പത്താം ഓവറില് മാത്രമാണ് ഇന്ത്യക്ക് കൂട്ടുകെട്ട് പൊളിക്കാന് സാധിച്ചത്. ഫര്ഹാനെ പുറത്താക്കി വരുണ് ചക്രവര്ത്തിയാണ് ബ്രേക്ക് ത്രൂ നല്കുന്നത്. തുടര്ന്ന് സയിം അയൂബ് (14) - സമാന് സഖ്യം 29 റണ്സും കൂട്ടിചേര്ത്തു. എന്നാല് പതിമൂന്നാം ഓവറില് അയൂബിനെ കുല്പീദ് മടങ്ങി. അയൂബ് മടങ്ങുമ്പോല് രണ്ടിന് 113 എന്ന നിലയിലായിരുന്നു പാകിസ്ഥാന്.
പിന്നീട് കൂട്ടതകര്ച്ച നേരിട്ടു. 34 റണ്സുകള്ക്കിടെ ഒമ്പത് വിക്കറ്റുകളാണ് പാകിസ്ഥാന് നഷ്ടമായി. അയൂബിന് പുറെ സല്മാന് അഗ (8), ഷഹീന് അഫ്രീദി (0), ഫഹീം അഷ്റഫ് (0) എന്നിവരേയും കുല്ദീപ് മടക്കി. അവസാന ഓവറുകളില് മുഹമ്മദ് നവാസ് (6), ഹാരിസ് റൗഫ് (6) എന്നിവരെ പുറത്താക്കി ജസ്പ്രിത് ബുമ്ര ജോലി എളുപ്പമാക്കി.
നേരത്തെ, മൂന്ന് മാറ്റവുമായിട്ടാണ് ഇന്ത്യ ഇറങ്ങിയത്. പരിക്കേറ്റ ഹാര്ദിക് പാണ്ഡ്യ കളിക്കുന്നില്ല. പകരം റിങ്കു സിംഗ് ടീമിലെത്തി. ശിവം ദുബെ, ജസ്പ്രിത് ബുമ്ര എന്നിവരും ടീമില് തിരിച്ചെത്തി. ഹര്ഷിത് റാണ, അര്ഷ്ദീപ് സിംഗ് എന്നിവര് പുറത്തായി. മാറ്റമൊന്നുമില്ലാതെയാണ് പാകിസ്ഥാന് ഇറങ്ങുന്നത്. ഇരു ടീമുകളുടേയും പ്ലേയിംഗ് ഇലവന് അറിയാം.
ഇന്ത്യ: അഭിഷേക് ശര്മ, ശുഭ്മാന് ഗില്, സൂര്യകുമാര് യാദവ് (ക്യാപ്റ്റന്), തിലക് വര്മ, സഞ്ജു സാംസണ് (വിക്കറ്റ് കീപ്പര്), റിങ്കു സിംഗ്, അക്സര് പട്ടേല്, ശിവം ദുബെ, കുല്ദീപ് യാദവ്, ജസ്പ്രീത് ബുമ്ര, വരുണ് ചക്രവര്ത്തി.
പാകിസ്ഥാന്: സാഹിബ്സാദ ഫര്ഹാന്, ഫഖര് സമാന്, സയിം അയൂബ്, സല്മാന് അഗ (ക്യാപ്റ്റന്), ഹുസൈന് തലാത്ത്, മുഹമ്മദ് ഹാരിസ് (വിക്കറ്റ് കീപ്പര്), മുഹമ്മദ് നവാസ്, ഫഹീം അഷ്റഫ്, ഷഹീന് അഫ്രീദി, ഹാരിസ് റൗഫ്, അബ്രാര് അഹമ്മദ്.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!