വിന്‍ഡീസിന് കനത്ത പ്രഹരം, ഹോള്‍ഡര്‍ കളിക്കുന്നില്ല; കാരണമിത്

ഇന്ത്യന്‍ നിരയില്‍ ഓള്‍ റൗണ്ടര്‍ രവീന്ദ്ര ജഡേജയും കളിക്കുന്നില്ല. പരിക്കുമൂലം ജഡേജ പിന്‍മാറിയതോടെ മലയാളി താരം സഞ്ജു സാംസണ് പ്ലേയിംഗ് ഇലവനില്‍ അവസരം ലഭിക്കുകയും ചെയ്തു.

സെന്‍റ് ലൂസിയ: ഇന്ത്യക്കെതിരായ ഏകദിന പരമ്പരയിലെ ആദ്യ മത്സരം തുടങ്ങുന്നതിന് തൊട്ടുമുമ്പ് വെസ്റ്റ് ഇന്‍ഡീസിന് തിരിച്ചടിയായി ഓള്‍ റൗണ്ടര്‍ ജേസണ്‍ ഹോള്‍ഡറുടെ പിന്‍മാറ്റം. കൊവിഡ് ബാധിതനായതിലാണ് ഹോള്‍ഡര്‍ അവസാന നിമിഷം പിന്‍വാങ്ങിയത്. ആദ്യ ഏകദിനത്തിലെ ടോസ് സമയത്താണ് മത്സരത്തില്‍ ഹോള്‍ഡര്‍ കളിക്കില്ലെന്ന കാര്യം വിന്‍ഡീസ് നായകന്‍ നിക്കോളാസ് പുരാന്‍ വ്യക്തമാക്കിയത്.  മത്സരത്തില്‍ ടോസ് നേടിയ വിന്‍ഡീസ് ബൗളിംഗ് തെരഞ്ഞെടുത്തിരുന്നു.

ഇന്ത്യന്‍ നിരയില്‍ ഓള്‍ റൗണ്ടര്‍ രവീന്ദ്ര ജഡേജയും കളിക്കുന്നില്ല. പരിക്കുമൂലം ജഡേജ പിന്‍മാറിയതോടെ മലയാളി താരം സഞ്ജു സാംസണ് പ്ലേയിംഗ് ഇലവനില്‍ അവസരം ലഭിക്കുകയും ചെയ്തു. ശിഖര്‍ ധവാനൊപ്പം ഇഷാന്‍ കിഷന്‍ ഓപ്പണറാവുമെന്നാണ് പ്രതീക്ഷിക്കപ്പെട്ടതെങ്കിലും കിഷന് പകരം ശുഭ്മാന്‍ ഗില്ലാണ് ഇന്ത്യയുടെ അന്തിമ ഇലവനിലെത്തിയത്.

ഇതോടെ വിക്കറ്റ് കീപ്പര്‍ ബാറ്ററെന്ന നിലയില്‍ സഞ്ജു അന്തിമ ഇലവനിലെത്തി. മൂന്നാം നമ്പറില്‍ ശ്രേയസ് അയ്യരും നാലാം നമ്പറില്‍ സൂര്യകുമാര്‍ യാദവും എത്തുമ്പോള്‍ അഞ്ചാമനായാണ് സഞ്ജു ഇറങ്ങുന്നത്. ദീപക് ഹൂഡയും അക്സര്‍ പട്ടേലുമാണ് ഓള്‍ റൗണ്ടര്‍മാര്‍.

കരിയറിലെ രണ്ടാം ഏകദിന മത്സരത്തിനാണ് സഞ്ജു ഇന്നിറങ്ങന്നത്. കഴിഞ്ഞ വര്‍ഷം ശ്രീലങ്കക്കെതിരായ ഏകദിന പരമ്പരയിലെ ഒരു മത്സരത്തില്‍ കളിച്ച സഞ്ജു 46 റണ്‍സടിച്ച് തിളങ്ങിയിരുന്നു.

വെസ്റ്റ് ഇന്‍ഡീസ് പ്ലേയിംഗ് ഇലവന്‍: Shai Hope(w), Brandon King, Shamarh Brooks, Kyle Mayers, Nicholas Pooran(c), Rovman Powell, Akeal Hosein, Romario Shepherd, Alzarri Joseph, Gudakesh Motie, Jayden Seales.

ഇന്ത്യ പ്ലേയിംഗ് ഇലവന്‍: Shikhar Dhawan(c), Shubman Gill, Shreyas Iyer, Suryakumar Yadav, Sanju Samson(w), Deepak Hooda, Axar Patel, Shardul Thakur, Mohammed Siraj, Yuzvendra Chahal, Prasidh Krishna.