അഭിഷേകിനെ മറികടന്ന് ഗില്‍, ശ്രീ ചരണിയെ മറികടന്ന് ഷഫാലി, ഐസിസി 'പ്ലെയർ ഓഫ് ദി മന്ത്' പുരസ്കാരം പ്രഖ്യാപിച്ചു

അഞ്ചാം തവണയാണ് ശുഭ്മൻ ഗിൽ ഐസിസി പ്ലെയർ ഓഫ് ദി മന്ത് പുരസ്കാരം സ്വന്തമാക്കുന്നത്. ഇതോടെ പുരുഷ ക്രിക്കറ്റിൽ ഏറ്റവും കൂടുതൽ തവണ ഈ പുരസ്കാരം നേടുന്ന താരമെന്ന സ്വന്തം റെക്കോർഡ് ഗിൽ മെച്ചപ്പെടുത്തി.

ദുബായ്: സെപ്റ്റംബർ മാസത്തെ പ്ലെയർ ഓഫ് ദി മന്ത് പുരസ്കാരങ്ങൾ പ്രഖ്യാപിച്ച് ഐസിസി. ഇന്ത്യൻ താരങ്ങളായ ഷഫാലി വർമ്മ വനിതാ വിഭാഗത്തിലും ശുഭ്മൻ ഗിൽ പുരുഷ വിഭാഗത്തിലും പുരസ്കാരങ്ങൾ സ്വന്തമാക്കി. ഇന്ത്യൻ യുവ ഓപ്പണർ അഭിഷേക് ശർമ്മ, സിംബാബ്‌വെ താരം സിക്കന്ദർ റാസ എന്നിവരെ മറികടന്നാണ് ഗിൽ ഈ നേട്ടത്തിലെത്തിയത്. അഞ്ചാം തവണയാണ് ശുഭ്മൻ ഗിൽ ഐസിസി പ്ലെയർ ഓഫ് ദി മന്ത് പുരസ്കാരം സ്വന്തമാക്കുന്നത്. ഇതോടെ പുരുഷ ക്രിക്കറ്റിൽ ഏറ്റവും കൂടുതൽ തവണ ഈ പുരസ്കാരം നേടുന്ന താരമെന്ന സ്വന്തം റെക്കോർഡ് ഗിൽ മെച്ചപ്പെടുത്തി. വെസ്റ്റ് ഇൻഡീസ് വനിതാ ടീം ക്യാപ്റ്റൻ ഹെയ്‌ലി മാത്യൂസ് മാത്രമാണ് 5 തവണ ഈ അവാർഡ് നേടിയിട്ടുള്ളത്.

2023 ജനുവരി, സെപ്റ്റംബർ, 2025 ഫെബ്രുവരി, ജൂലൈ മാസങ്ങളിലായിരുന്നു ഗില്ലിന്‍റെ മുൻകാല പുരസ്കാരങ്ങൾ. വെസ്റ്റ് ഇൻഡീസിനെതിരായ ഏകദിന പരമ്പരയിലെ അവിസ്മരണീയ പ്രകടനമാണ് ഗില്ലിന് പുരസ്കാരം നേടിക്കൊടുത്തത്. തിരുവനന്തപുരത്ത് നടന്ന ആദ്യ ഏകദിനത്തിൽ 108 പന്തിൽ 110 റൺസ് നേടിയ ഗിൽ, തുടർന്ന് ഗുവഹാത്തിയിൽ നടന്ന മത്സരത്തിൽ പുറത്താകാതെ 133 പന്തിൽ 223 റൺസ് അടിച്ച് കൂട്ടി. 26 ഫോറുകളും 8 സിക്സറുകളും അടങ്ങിയ ഈ ഇന്നിംഗ്സിന്‍റെ കരുത്തിൽ വെസ്റ്റ് ഇൻഡീസ് ഉയർത്തിയ 406 റൺസെന്ന വൻ വിജയലക്ഷ്യം ഇന്ത്യ മറികടന്നു. ഏകദിന ചരിത്രത്തിലെ ഏറ്റവും വേഗമേറിയ ഡബിൾ സെഞ്ചുറിയും (117 പന്തിൽ) റൺ ചേസിംഗിലെ ഏറ്റവും ഉയർന്ന വ്യക്തിഗത സ്കോറും ഗിൽ ഈ മത്സരത്തിലൂടെ കുറിച്ചു.

ഏഷ്യൻ ഗെയിംസിലും ഏഷ്യാ കപ്പിലും തിളങ്ങി ഷഫാലി വനിതാ വിഭാഗത്തിൽ ഇത് രണ്ടാം തവണയാണ് ഐസിസി പ്ലേയര്‍ ഓഫ് ദ് മന്ത് ആയി തെരഞ്ഞെടുക്കപ്പെടുന്നത്. കഴിഞ്ഞ വർഷം ഇന്ത്യ ലോകകപ്പ് കിരീടം നേടിയപ്പോഴായിരുന്നു ഷഫാലിയുടെ ആദ്യ പുരസ്കാരം. യു.എ.ഇയിൽ നടന്ന ഏഷ്യാ കപ്പിലും ജപ്പാനിലെ നഗോയയിൽ നടന്ന ഏഷ്യൻ ഗെയിംസിലും ഇന്ത്യ സ്വർണ്ണം നേടിയപ്പോൾ ഷഫാലിയുടെ മിന്നുന്ന ഫോമാണ് വഴിത്തിരിവായത്. സെപ്റ്റംബറിൽ കളിച്ച 7 ടി20 മത്സരങ്ങളിൽ നിന്ന് 184.61 സ്ട്രൈക്ക് റേറ്റിൽ 360 റൺസും 6 വിക്കറ്റും ഷഫാലി നേടി.

ഏഷ്യൻ ഗെയിംസ് സെമിഫൈനലിൽ ബംഗ്ലാദേശിനെതിരെ 49 പന്തിൽ പുറത്താകാതെ 100 റൺസ് നേടിയ ഷഫാലി ഫൈനലിൽ ലങ്കയ്ക്കെതിരെ 48 റൺസും 2 വിക്കറ്റും നേടി ഇന്ത്യയുടെ 147 റൺസ് വിജയത്തിൽ നിർണായക പങ്കുവഹിച്ചു. ഇന്ത്യൻ താരം ശ്രീചരണി ശ്രീലങ്കൻ ക്യാപ്റ്റൻ ചമരി അത്തപ്പത്തു എന്നിവരെ മറികടന്നാണ് ഷഫാലിയുടെ പുരസ്കാരനേട്ടം.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക