അലക്ഷ്യം, അവിശ്വസനീയം; വിക്കറ്റ് വലിച്ചറിഞ്ഞ് സഞ്ജു സാംസണ്, ഗോള്ഡന് ഡക്ക്! ഇന്ത്യക്ക് കൂട്ടത്തകര്ച്ച
Synopsis
ടോസ് നേടി ബാറ്റിംഗ് തെരഞ്ഞെടുത്ത രോഹിത് ശര്മ്മയുടെ പ്രതീക്ഷകളെല്ലാം തകര്ത്താണ് ടീം ഇന്ത്യ ചിന്നസ്വാമിയില് ഇന്നിംഗ്സ് തുടങ്ങിയത്
ബെംഗളൂരു: അഫ്ഗാനിസ്ഥാനെതിരായ മൂന്നാം ട്വന്റി 20യില് ടീം ഇന്ത്യക്ക് കൂട്ടത്തകര്ച്ച. 4.3 ഓവറുകള്ക്കിടെ 22-4 എന്ന നിലയില് ഇന്ത്യ ദയനീയമായി പൊരുതുകയാണ്. യശസ്വി ജയ്സ്വാള്, വിരാട് കോലി, ശിവം ദുബെ എന്നിവര്ക്കൊപ്പം സഞ്ജു സാംസണിന്റെ വിക്കറ്റും ഇന്ത്യക്ക് നഷ്ടമായി. ട്വന്റി 20 ലോകകപ്പിന് മുമ്പുള്ള അവസാന ടി20 മത്സരത്തില് മങ്ങിയതോടെ സഞ്ജുവിന്റെ പ്രതീക്ഷകളെല്ലാം വെള്ളത്തിലായി.
ടോസ് നേടി ബാറ്റിംഗ് തെരഞ്ഞെടുത്ത രോഹിത് ശര്മ്മയുടെ പ്രതീക്ഷകളെല്ലാം തകര്ത്താണ് ടീം ഇന്ത്യ ചിന്നസ്വാമിയില് ഇന്നിംഗ്സ് തുടങ്ങിയത്. പേസര് ഫരീദ് അഹമ്മദ് എറിഞ്ഞ മൂന്നാം ഓവറിലെ മൂന്നാം പന്തില് യശസ്വി ജയ്സ്വാള് 4 റണ്സിനും നാലാം ബോളില് വിരാട് കോലി ഗോള്ഡന് ഡക്കായും മടങ്ങി. ഉയര്ത്തിയടിക്കാനുള്ള ശ്രമത്തില് ജയ്സ്വാളിനെ മുഹമ്മദ് നബിയും കോലിയെ ഇബ്രാഹിം സദ്രാനുമാണ് പിടികൂടിയത്. നാലാമനായി ക്രീസിലെത്തിയ ശിവം ദുബെ പന്ത് പ്രതിരോധിച്ച് ഹാട്രിക് ഭീഷണി ഒഴിവാക്കി. എന്നാല് ഇന്നിംഗ്സിലെ നാലാം ഓവറിലെ അവസാന പന്തില് അസ്മത്തുള്ള ഒമര്സായിയുടെ പന്തില് ബാറ്റ് വെച്ച ദുബെ (6 പന്തില് 1) വിക്കറ്റിന് പിന്നില് ഗുര്ബാസിന്റെ പറക്കും ക്യാച്ചില് മടങ്ങി.
പിന്നാലെ ക്രീസിലെത്തി ആദ്യ പന്തില് അലക്ഷ്യ ഷോട്ടിന് ശ്രമിച്ച് സഞ്ജു സാംസണും ഗോള്ഡന് ഡക്കായി. വീണ്ടും ഫരീദിന്റെ ഷോര്ട് ബോളാണ് ഇന്ത്യക്ക് വിനയായത്.
മൂന്ന് വീതം മാറ്റം
പരമ്പരയിലെ അവസാന മത്സരത്തില് കൂടുതല് താരങ്ങള്ക്ക് അവസരം നല്കുക ലക്ഷ്യമിട്ട് മൂന്ന് മാറ്റങ്ങളുമായാണ് ഇരു ടീമുകളും മൈതാനത്തെത്തിയത്. ഇന്ത്യന് നിരയില് വിക്കറ്റ് കീപ്പര് ജിതേഷ് ശര്മ്മയ്ക്ക് പകരം സഞ്ജു സാംസണും സ്പിന്നര് അക്സര് പട്ടേലിന് പകരം കുല്ദീപ് യാദവും പേസര് അര്ഷ്ദീപ് സിംഗിന് പകരം ആവേഷ് ഖാനും പ്ലേയിംഗ് ഇലവനിലെത്തി
പ്ലേയിംഗ് ഇലവനുകള്
ഇന്ത്യ: യശസ്വി ജയ്സ്വാള്, രോഹിത് ശര്മ്മ (ക്യാപ്റ്റന്), വിരാട് കോലി, ശിവം ദുബെ, സഞ്ജു സാംസണ് (വിക്കറ്റ് കീപ്പര്), റിങ്കു സിംഗ്, വാഷിംഗ്ടണ് സുന്ദര്, രവി ബിഷ്ണോയി, മുകേഷ് കുമാര്, കുല്ദീപ് യാദവ്, ആവേഷ് ഖാന്.
അഫ്ഗാനിസ്ഥാന്: റഹ്മാനുള്ള ഗുര്ബാസ് (വിക്കറ്റ് കീപ്പര്), ഇബ്രാഹിം സദ്രാന് (ക്യാപ്റ്റന്), ഗുല്ബാദിന് നൈബ്, അസമത്തുള്ള ഒമര്സായ്, മുഹമ്മദ് നബി, നജീബുള്ള സദ്രാന്, കരീം ജനാത്ത്, ഷറഫുദ്ദീന് അഷ്റഫ്, ഖ്വായിസ് അഹമ്മദ്, മുഹമ്മദ് സലീം സാഫി, ഫരീദ് അഹമ്മദ് മാലിക്.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!