രണ്ടാം ഏകദിനം: ടോസ് ദക്ഷിണാഫ്രിക്കയ്ക്ക്; മാറ്റങ്ങളുമായി ഇന്ത്യ, ഷഹ്‌ബാസ് അഹമ്മദിന് അരങ്ങേറ്റം

ലഖ്‌നൗവിലെ ആദ്യ ഏകദിനത്തില്‍ ഇന്ത്യ 9 വിക്കറ്റിന്‍റെ തോല്‍വി വഴങ്ങുകയായിരുന്നു, അതിനാല്‍ ഇന്ന് വിജയം അനിവാര്യം

റാഞ്ചി: ദക്ഷിണാഫ്രിക്കയ്‌ക്കെതിരായ ഏകദിന പരമ്പരയിലെ ജീവന്‍മരണ പോരാട്ടത്തില്‍ ഇന്ത്യ അല്‍പസമയത്തിനകം ഇറങ്ങും. രണ്ടാം മത്സരത്തില്‍ ടോസ് നേടിയ പ്രോട്ടീസ് നായകന്‍ കേശവ് മഹാരാജ് ബാറ്റിംഗ് തെരഞ്ഞെടുത്തു. ദക്ഷിണാഫ്രിക്കയുടെ സ്ഥിരം നായകന്‍ തെംബാ ബാവുമ ഇന്ന് കളിക്കുന്നില്ല. സ്‌പിന്നര്‍ തബ്രൈസ് ഷംസിയും പ്ലേയിംഗ് ഇലവനിലില്ല. രണ്ട് മാറ്റങ്ങളുമായാണ് ശിഖര്‍ ധവാന്‍റെ നേതൃത്വത്തില്‍ ഇന്ത്യ ഇറങ്ങുന്നത്. വാഷിംഗ്‌ടണ്‍ സുന്ദര്‍ ഇലവനിലെത്തിയപ്പോള്‍ ഷഹ്‌ബാസ് അഹമ്മദ് അരങ്ങേറ്റം കുറിക്കുന്നു. റുതുരാജ് ഗെയ്‌ക്‌വാദും രവി ബിഷ്‌ണോയിയുമാണ് പുറത്തായത്. ഇന്ന് പരാജയപ്പെട്ടാല്‍ ഇന്ത്യക്ക് പരമ്പര നഷ്‌ടമാകും. 

ഇന്ത്യന്‍ സ്‌ക്വാഡ്: Shikhar Dhawan(c), Shubman Gill, Ishan Kishan, Shreyas Iyer, Sanju Samson(w), Washington Sundar, Shahbaz Ahmed, Shardul Thakur, Kuldeep Yadav, Mohammed Siraj, Avesh Khan

ദക്ഷിണാഫ്രിക്കന്‍ സ്‌ക്വാഡ്: Janneman Malan, Quinton de Kock(w), Reeza Hendricks, Aiden Markram, Heinrich Klaasen, David Miller, Wayne Parnell, Keshav Maharaj(c), Bjorn Fortuin, Kagiso Rabada, Anrich Nortje

തിരിച്ചുവരണം മുന്‍നിര ബാറ്റര്‍മാര്‍

ലഖ്‌നൗവിലെ ആദ്യ ഏകദിനത്തില്‍ ഇന്ത്യ 9 വിക്കറ്റിന്‍റെ തോല്‍വി വഴങ്ങുകയായിരുന്നു. മഴമൂലം 40 ഓവറായി ചുരുക്കിയ മത്സരത്തില്‍ പ്രോട്ടീസ് മുന്നോട്ടുവെച്ച 250 റണ്‍സ് വിജയലക്ഷ്യം പിന്തുടര്‍ന്ന ഇന്ത്യക്ക് എട്ട് വിക്കറ്റിന് 240 റണ്‍സെടുക്കാനേ കഴിഞ്ഞുള്ളൂ. മലയാളി താരം സഞ്ജു സാംസണ്‍ ഒന്‍പത് ഫോറും മൂന്ന് സിക്‌സും ഉള്‍പ്പടെ 63 പന്തില്‍ 86* റണ്‍സുമായി ടോപ് സ്‌കോററായി പുറത്താകാതെനിന്നു. സഞ്ജുവിന്‍റെ ഏകദിന കരിയറിലെ ഉയര്‍ന്ന വ്യക്തിഗത സ്കോറാണിത്. ശ്രേയസ് അയ്യരുടെ അര്‍ധ സെഞ്ചുറിയും(37 പന്തില്‍ 50) വാലറ്റത്ത് ഷര്‍ദ്ദുല്‍ ഠാക്കൂറിന്‍റെ പ്രകടനവും(31 പന്തില്‍ 33) മാത്രമായിരുന്നു ഇതിനൊപ്പം ആശ്വസിക്കാനുണ്ടായിരുന്നത്. 

മത്സരം കാണാനുള്ള വഴികള്‍

സ്റ്റാര്‍ സ്പോര്‍ട്‌സ് നെറ്റ്‌വര്‍ക്കും ഡിസ്‌നി+ഹോട്‌സ്റ്റാറുമാണ് ദക്ഷിണാഫ്രിക്കയ്ക്ക് എതിരായ ടീം ഇന്ത്യയുടെ ഏകദിന മത്സരങ്ങള്‍ സംപ്രേഷണം ചെയ്യുന്നത്. മത്സരത്തിന്‍റെ അപ്‌ഡേറ്റുകള്‍ ഏഷ്യാനെറ്റ് ന്യൂസ് ഡോട്‌ കോം വഴിയും അറിയാം.