ഹാര്ദിക്കും സഹ പേസര്മാരും എറിഞ്ഞിട്ടു! ടി20 ലോകകപ്പില് അയര്ലന്ഡിനെതിരെ ഇന്ത്യക്ക് കുഞ്ഞന് വിജയലക്ഷ്യം
Synopsis
ഹാര്ദിക് പാണ്ഡ്യ മൂന്നും ജസ്പ്രിത് ബുമ്ര, അര്ഷ്ദീപ് സിംഗ് രണ്ടും വിക്കറ്റുകള് വീഴ്ത്തിയപ്പോള് അയര്ലന്ഡ് 16 ഓവറില് കൂടാരം കയറി.
ന്യൂയോര്ക്ക്: ടി20 ലോകകപ്പില് അയര്ലന്ഡിനെതിരായ മത്സരത്തില് ഇന്ത്യക്ക് 97 റണ്സിന്റെ കുഞ്ഞന് വിജയലക്ഷ്യം. ന്യൂയോര്ക്ക്, നാസൗ കൗണ്ടി ഇന്റര്നാഷണല് ക്രിക്കറ്റ് സ്റ്റേഡിയത്തില് ടോസ് നഷ്ടപ്പെട്ട് ബാറ്റിംഗിനെത്തിയ അയര്ലന്ഡിനെ ഇന്ത്യന് പേസര്മാര് വരിഞ്ഞുമുറുക്കുകയായിരുന്നു. ഹാര്ദിക് പാണ്ഡ്യ മൂന്നും ജസ്പ്രിത് ബുമ്ര, അര്ഷ്ദീപ് സിംഗ് രണ്ടും വിക്കറ്റുകള് വീഴ്ത്തിയപ്പോള് അയര്ലന്ഡ് 16 ഓവറില് കൂടാരം കയറി. നേരത്തെ, മലയാളി താരം സഞ്ജു സാംസണ് ഇല്ലാതെയാണ് ഇന്ത്യ അയര്ലന്ഡിനെതിരെ ഇറങ്ങിയത്.
ബാറ്റിംഗ് ദുഷ്കമായ പിച്ചില് അര്ഷ്ദീപ് എറിഞ്ഞ മൂന്നാം ഓവറില് തന്നെ അയര്ലന്ഡിന് പോള് സ്റ്റെര്ലിംഗ് (2), ആന്ഡ്ര്യൂ ബാല്ബിര്നി (5) എന്നിവരുടെ വിക്കറ്റുകള് നഷ്ടമായി. ഏഴാം ഓവറിലെ അവസാന പന്തില് ലോര്കന് ടക്കറേയും (10) അയര്ലന്ഡിന് നഷ്ടമായി. ഹാരി ടെക്ടര് (4), ക്വേര്ടിസ് കാംഫര് (12), ജോര്ജ് ഡോക്ക്റെല് (3), ബാരി മക്കാര്ത്തി (0), മാര്ക് അഡെയ്ര് (3) എന്നിവര്ക്കൊന്നും പിടിച്ചുനില്ക്കാന് സാധിച്ചില്ല.
ജോഷ്വ ലിറ്റില് (14), ബെഞ്ചമിന് വൈറ്റ് (1) എന്നിവരെ കൂട്ടുപിടിച്ച് ഗരെത് ഡെലാനി (27) നടത്തിയ പ്രകടനമാണ് അയര്ലന്ഡിന് അല്പമെങ്കിലും ആശ്വാസമായത്. ഡെലാനി തന്നെയാണ് ടോപ് സ്കോറര്. റണ്ണൗട്ടായിരുന്നില്ലെങ്കില് 100നപ്പുറമുള്ള സ്കോര് അയര്ലന്ഡിന് നേടാമായിരുന്നു. അര്ഷ്ദീപ് നാല് ഓവറില് 35 റണ്സ് വിട്ടുകൊടുത്തു. ബുമ്ര മൂന്ന് ഓവറില് ആറ് റണ്സ് മാത്രമാണ് വഴങ്ങിയത്. ഹാര്ദിക് നാല് ഓവറില് 27 റണ്സ് വഴങ്ങി.
സഞ്ജു ഉള്പ്പെടെയുള്ള രാജസ്ഥാന് റോയല്സ് താരങ്ങളില്ലാതെ ടീം ഇന്ത്യ! ഒഴിവാക്കിയത് ഇക്കാരണത്താല്
ഇന്ത്യ: രോഹിത് ശര്മ്മ (ക്യാപ്റ്റന്), വിരാട് കോഹ്ലി, ഋഷഭ് പന്ത് (വിക്കറ്റ് കീപ്പര്), സൂര്യകുമാര് യാദവ്, ശിവം ദുബെ, ഹാര്ദിക് പാണ്ഡ്യ, രവീന്ദ്ര ജഡേജ, അക്സര് പട്ടേല്, ജസ്പ്രീത് ബുംറ, അര്ഷ്ദീപ് സിംഗ്, മുഹമ്മദ് സിറാജ്.
അയര്ലന്ഡ്: പോള് സ്റ്റിര്ലിംഗ് (ക്യാപ്റ്റന്), ആന്ഡ്രൂ ബാല്ബിര്ണി, ലോര്ക്കന് ടക്കര് (വിക്കറ്റ് കീപ്പര്), ഹാരി ടെക്ടര്, കര്ട്ടിസ് കാംഫര്, ജോര്ജ്ജ് ഡോക്രെല്, ഗാരെത് ഡെലാനി, മാര്ക്ക് അഡയര്, ബാരി മക്കാര്ത്തി, ജോഷ്വ ലിറ്റില്, ബെഞ്ചമിന് വൈറ്റ്.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!