വാഷിംഗ്ടണ് സുന്ദര് പുറത്തേക്ക്, ഇന്ത്യന് ടീമില് രണ്ട് മാറ്റങ്ങള്ക്ക് സാധ്യത; ഓസീസിനെതിരായ രണ്ടാം ഏകദിനം നാളെ
Synopsis
ഓസ്ട്രേലിയക്കെതിരായ രണ്ടാം ഏകദിനത്തിന് ഇന്ത്യ നാളെ ഇറങ്ങുകയാണ്. പരമ്പരയില് 1-0ന് പിന്നിലുള്ള ഇന്ത്യക്ക് നാളത്തെ മത്സരം നിര്ണായകമാണ്.
പെര്ത്ത്: ഓസ്ട്രേലിയക്കെതിരെ നാളെ രണ്ടാം ഏകദിനത്തിന് ഇറങ്ങുകയാണ് ഇന്ത്യ. അഡ്ലെയ്ഡില് ഇന്ത്യന് സമയം രാവിലെ 9 മണിക്കാണ് മത്സരം. മൂന്ന് മത്സരങ്ങളുടെ പരമ്പരയില് ഇന്ത്യ 1-0ത്തിന് പിന്നിലാണ്. പെര്ത്തില് നടന്ന ആദ്യ ഏകദിനത്തില് ഇന്ത്യ ഏഴ് വിക്കറ്റിന് പരാജയപ്പെട്ടിരുന്നു. പരമ്പരയില് ഒപ്പമെത്തണമെങ്കില് ഇന്ത്യക്ക് നാളെ ജയിക്കേണ്ടതുണ്ട്. ദീര്ഘ നാളുകള്ക്ക് ശേഷം ഇന്ത്യന് ജേഴ്സിയിലേക്ക് തിരിച്ചെത്തിയ വിരാട് കോലിയും രോഹിത് ശര്മയും ആദ്യ മത്സരത്തില് നിരാശപ്പെടുത്തിയിരുന്നു. പുതിയ ക്യാപ്റ്റന് ശുഭ്മാന് ഗില്ലിന്റെ കീഴില് നാളെ രണ്ടാം ഏകദിനത്തിന് ഇറങ്ങുമ്പോള് ടീമില് മാറ്റമുണ്ടാകുമോ എന്നാണ് ആരാധകര് ഉറ്റുനോക്കുന്നത്.
ഇന്ത്യയുടെ ആദ്യ നാല് സ്ഥാനങ്ങളില് മാറ്റം വരുത്താന് ഇടയില്ല. ആദ്യ ഏകദിനത്തില് എട്ട് റണ്സിന് പുറത്തായെങ്കിലും രോഹിത് ശര്മ ഓപ്പണിംഗ് സ്ഥാനത്ത് തുടരും. സഹ ഓപ്പണറായി ഗില്. കോലി മൂന്നാം സ്ഥാനത്ത് തുടരും. ആദ്യ ഏകദിനത്തില് റണ്സെടുക്കാതെ പുറത്തായിരുന്നു കോലി. ശ്രേയസ് അയ്യര് നാലാം നമ്പറില് കളിക്കും. പെര്ത്തില് 11 റണ്സിന് പുറത്തായെങ്കിലും വീണ്ടും അവസരം നല്കും. പെര്ത്തില് മികച്ച പ്രകടനം പുറത്തെടുത്ത അക്സര് പട്ടേല്, കെ എല് രാഹുല് എന്നിവരെയും മാറ്റിനിര്ത്തില്ല. എന്നാല് സാഹചര്യത്തിന് അനുസരിച്ച് ബാറ്റിംഗ് പൊസിഷന് മാറ്റം വന്നേക്കും. പെര്ത്തില് അക്സര് അഞ്ചാമനും രാഹുല് ആറാം സ്ഥാനത്തുമായിരുന്നു.
മാറ്റമുണ്ടായേക്കാവുന്ന ഏക സ്ഥാനം വാഷിംഗ്ടണ് സുന്ദറിന്റേതാണ്. നിതീഷ് കുമാര് റെഡ്ഡിക്കും മുമ്പ് ഏഴാമനായി ക്രീസിലെത്തിയ വാഷിംഗ്ടണ് 10 പന്തില് 10 റണ്സെടുക്കാന് മാത്രമായിരുന്നു സാധിച്ചിരുന്നത്. താരത്തിന്റെ പ്രകടനത്തിനെതിരെ വിമര്ശനം ഉയരുകയും ചെയ്തു. വാഷിംഗ്ടണിന് പകരം കുല്ദീപ് യാദവിനെ സ്പിന്നറായി കളിപ്പിച്ചേക്കാം. വാഷിംഗ്ടണ് കളിച്ചാലും ഇല്ലെങ്കിലും നിതീഷിന് സ്ഥാനക്കയറ്റം ലഭിക്കും. പെര്ത്തില് എന്തെങ്കിലും തരത്തില് സ്വാധീനം ഉണ്ടാക്കാതെ പോയ ഹര്ഷിത് റാണയേയും മാറ്റാനാണ് സാധ്യത. പകരം പ്രസിദ്ധ് കൃഷ്ണ ടീമലെത്തിയേക്കും. മുഹമ്മദ് സിറാജും അര്ഷ്ദീപ് സിംഗും ടീമില് തുടരും.
രണ്ടാം ഏകദിനത്തിനുള്ള ഇന്ത്യയുടെ സാധ്യതാ ഇലവന്: ശുഭ്മാല് ഗില് (ക്യാപ്റ്റന്), രോഹിത് ശര്മ, വിരാട് കോലി, ശ്രേയസ് അയ്യര്, അക്സര് പട്ടേല്, കെ എല് രാഹുല് (വിക്കറ്റ് കീപ്പര്), നിതീഷ് കുമാര് റെഡ്ഡി, വാഷിംഗ്ടണ് സുന്ദര് / കുല്ദീപ് യാദവ്, മുഹമ്മദ് സിറാജ്, പ്രസിദ്ധ് കൃഷ്ണ / ഹര്ഷിത് റാണ, അര്ഷ്ദീപ് സിംഗ്.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!