അവസാന ഏകദിനത്തിനായി ഇന്ത്യയും ശ്രീലങ്കയും 13ന് തിരുവനന്തപുരത്ത്; ടിക്കറ്റ് വില്പന നാളെ മുതല്
Synopsis
മത്സരത്തിനായി ഇന്ത്യ, ശ്രീലങ്ക ടീമുകള് 13ന് തിരുവനന്തപുരത്തെത്തും. ഏകദിന പരമ്പരയിലെ അവസാന മത്സരമാണ് കാര്യവട്ടം ഗ്രീന്ഫീല്ഡ് സ്റ്റേഡിയത്തില് നടക്കുന്നത്. തലസ്ഥാനത്ത് എത്തുന്നതിന് പിന്നാലെ ഇരു ടീമുകള്ക്കും മൈതാനത്ത് പരിശീലനമുണ്ടാകും.
തിരുവനന്തപുരം: കാര്യവട്ടം ഗ്രീന്ഫീല്ഡ് സ്റ്റേഡിയത്തില് 15ന് നടക്കുന്ന ഇന്ത്യ- ശ്രീലങ്ക ഏകദിന മത്സരത്തിന്റെ ടിക്കറ്റ് വില്പ്പന നാളെ ആരംഭിക്കും. വൈകിട്ട് അഞ്ച് മണിക്ക് തിരുവനന്തപുരം ഹയാത്ത് റീജന്സിയില് നടക്കുന്ന ചടങ്ങില് ഭക്ഷ്യ- സിവില് സപ്ലൈസ് വകുപ്പു മന്ത്രി ജി ആര് അനില് ടിക്കറ്റ് വില്പനയുടെ ഉദ്ഘാടനം നിര്വഹിക്കും. കേരളത്തിനുവേണ്ടി ഫസ്റ്റ് ക്ലാസ് മത്സരത്തില് 5000 റണ് നേടിയ കേരളത്തിന്റെ ആദ്യ ക്രിക്കറ്റ് താരമായ റോഹന് പ്രേമിനെ ചടങ്ങില് ആദരിക്കും.
എംഎല്എ കടകംപള്ളി സുരേന്ദ്രന്, കേരള ക്രിക്കറ്റ് അസോസിയേഷന് പ്രസഡിന്റ് ജയേഷ് ജോര്ജ്ജ്, സെക്രട്ടറി വിനോദ് എസ് കുമാര്, ട്രെഷറര് കെ എം അബ്ദുല് റഹിമാന്, വൈസ് പ്രസിഡന്റ് പി ചന്ദ്രശേഖരന് നായര്, ജോയിന്റ് സെക്രട്ടറി ബിനീഷ് കോടിയേരി തുടങ്ങിയവര് ഉദ്ഘാടനച്ചടങ്ങില് പങ്കെടുക്കും.
മത്സരത്തിനായി ഇന്ത്യ, ശ്രീലങ്ക ടീമുകള് 13ന് തിരുവനന്തപുരത്തെത്തും. ഏകദിന പരമ്പരയിലെ അവസാന മത്സരമാണ് കാര്യവട്ടം ഗ്രീന്ഫീല്ഡ് സ്റ്റേഡിയത്തില് നടക്കുന്നത്. തലസ്ഥാനത്ത് എത്തുന്നതിന് പിന്നാലെ ഇരു ടീമുകള്ക്കും മൈതാനത്ത് പരിശീലനമുണ്ടാകും. ഈ മാസം 12ന് കൊല്ക്കത്തയില് നടക്കുന്ന രണ്ടാം ഏകദിനത്തിന് ശേഷം 13ന് തിരുവനന്തപുരത്തെത്തുന്ന ഇരു ടീമുകളും 14ന് കാര്യവട്ടം ഗ്രീന്ഫീല്ഡ് സ്റ്റേഡിയത്തില് പരിശീലനത്തിനിറങ്ങും.
14ന് ഉച്ചയ്ക്ക് ഒരു മണി മുതല് നാല് മണി വരെ ശ്രീലങ്കന് ടീമും വൈകിട്ട് അഞ്ച് മുതല് എട്ട് വരെ ഇന്ത്യന് ടീമും പരിശീലനം നടത്തും. ഇന്ത്യന് ടീം ഹോട്ടല് ഹയാത് റീജന്സിയിലും ശ്രീലങ്കന് ടീം ഹോട്ടല് വിവാന്തയിലുമാണ് താമസിക്കുന്നത്.
കാര്യവട്ടത്തെ രണ്ടാം ഏകദിനം
കാര്യവട്ടം ഗ്രീന്ഫീല്ഡ് സ്റ്റേഡിയത്തില് നടക്കുന്ന രണ്ടാമത് അന്താരാഷ്ട്ര ഏകദിന മത്സരമാണിത്. 2018 നവംബര് ഒന്നിനാണ് സ്റ്റേഡിയത്തിലെ ആദ്യ അന്താരാഷ്ട്ര ഏകദിനം നടന്നത്. അന്ന് വെസ്റ്റ് ഇന്ഡീസിനെതിരെ വിജയം ടീം ഇന്ത്യക്കായിരുന്നു. 31.5 ഓവറില് വിന്ഡീസിനെ 104 റണ്സിന് എറിഞ്ഞിട്ട ഇന്ത്യ 14.5 ഓവറില് ഒരു വിക്കറ്റ് നഷ്ടത്തില് ലക്ഷ്യം കാണുകയായിരുന്നു. 2017 നവംബര് ഏഴിന് ഇന്ത്യയും ന്യൂസിലാന്ഡും ഏറ്റുമുട്ടിയ ടി20യാണ് സ്റ്റേഡിയത്തിലെ ആദ്യ അന്താരാഷ്ട്ര മത്സരം. മഴ മൂലം എട്ട് ഓവറായി ചുരുക്കിയ മത്സരത്തില് ഇന്ത്യ വിജയിച്ചിരുന്നു.
അതിന് ശേഷം 2019 ഡിസംബര് എട്ടിന് നടന്ന ടി20യില് വിന്ഡീസിനെ നേരിട്ട ടീം ഇന്ത്യ പരാജയപ്പെടുകയും ചെയ്തു. കൊവിഡ് വ്യാപനത്തെ തുടര്ന്നുണ്ടായ നീണ്ട ഇടവേളയ്ക്ക് ശേഷം 2022 സെപ്റ്റംബര് 28നാണ് സ്റ്റേഡിയത്തിലെ അവസാന അന്താരാഷ്ട്ര ട്വന്റി 20 മത്സരം നടന്നത്. ദക്ഷിണാഫ്രിക്കക്കെതിരായ മത്സരത്തില് ഇന്ത്യ വിജയിച്ചിരുന്നു.