സര്‍ക്കാര്‍ നിര്‍ദേശം അവഗണിച്ചു; ഇന്ത്യന്‍ ക്രിക്കറ്റ് ടീം മാനേജര്‍ക്കെതിരെ ബിസിസിഐ നടപടി

ജലസംരക്ഷണത്തെ കുറിച്ച്, ഇന്ത്യന്‍ താരങ്ങള്‍ പങ്കെടുക്കുന്ന പരസ്യത്തിന്റെ ചിത്രീകരണത്തിനുള്ള ക്രമീകരണങ്ങള്‍ ചെയ്യണമെന്ന് സുബ്രമണ്യത്തെ സര്‍ക്കാര്‍ അറിയിച്ചിരുന്നു.

പോര്‍ട്ട് ഓഫ് സ്പെയിന്‍: ഇന്ത്യന്‍ ക്രിക്കറ്റ് ടീം മാനേജര്‍ സുനില്‍ സുബ്രഹ്മണ്യത്തിനെതിരെ, ബിസിസിഐ അച്ചടക്കനടപടി എടുക്കും. ടീമിന്‍റെ വെസ്റ്റ് ഇന്‍ഡീസ് പര്യടനത്തിനിടെ, ട്രിനിഡാഡിലെ ഇന്ത്യന്‍ ഹൈക്കമ്മീഷന്‍ ഉദ്യോഗസ്ഥരോട്, അപമര്യാദയായി പെരുമാറിയതിനാണ് നടപടി. ജലസംരക്ഷണത്തെ കുറിച്ച്, ഇന്ത്യന്‍ താരങ്ങള്‍ പങ്കെടുക്കുന്ന പരസ്യത്തിന്റെ ചിത്രീകരണത്തിനുള്ള ക്രമീകരണങ്ങള്‍ ചെയ്യണമെന്ന് സുബ്രമണ്യത്തെ സര്‍ക്കാര്‍ അറിയിച്ചിരുന്നു.

എന്നാല്‍ തന്നെ ശല്യപ്പെടുത്തരുതെന്നാണ്, ഹൈക്കമ്മീഷന്‍ ഉദ്യോഗസ്ഥരോട് സുബ്രഹ്മണ്യം പ്രതികരിച്ചത്. സര്‍ക്കാര്‍ ബിസിസിഐയെ അതൃപ്തി അറിയിച്ചതോടെ , ഇടക്കാല ഭരണസമിതി അധ്യക്ഷന്‍ വിനോദ് റായി ഇടപെടുകയായിരുന്നു.സുബ്രമണ്യവുമായുള്ള കരാര്‍ നീട്ടേണ്ടെന്ന്, വിനോദ് റായി നിര്‍ദേശിച്ചതായി സൂചനയുണ്ട്.

‍ടെസ്റ്റ് പരമ്പര തുടങ്ങും മുന്‍പ് സുബ്രഹ്മണ്യത്തെ നാട്ടിലേക്ക് തിരികെവിളിക്കാനും സാധ്യതയുണ്ട്. തമിഴ്നാട് രഞ്ജി ടീം സ്പിന്നറായിരുന്ന സുബ്രഹ്മണ്യം, ആര്‍ അശ്വിന്റെ ആദ്യകാല പരിശീലകനുമാണ്.