ഹാര്ദിക് ടി20യില് നയിക്കും, ഏകദിനത്തിനില്ല! സഞ്ജു രണ്ട് ഫോര്മാറ്റിനും; ലങ്കയിലേക്കുള്ള ഇന്ത്യന് ടീം ഇന്ന്
Synopsis
ടി20 ക്രിക്കറ്റില് നിന്ന് വിരമിച്ച ക്യാപ്റ്റന് രോഹിത് ശര്മയും വിരാട് കോലിയും ഏകദിന പരമ്പരയില് നിന്നും വിട്ടു നിന്നേക്കുമെന്നാണ് റിപ്പോര്ട്ട്.
മുംബൈ: ശ്രീലങ്കന് പര്യടനത്തിനുള്ള ഇന്ത്യന് ക്രിക്കറ്റ് ടീമിനെ ഇന്ന് പ്രഖ്യാപിച്ചേക്കും. ഈ മാസം 27ന് തുടങ്ങുന്ന പരമ്പരയില് മൂന്ന് വീതം ട്വന്റി 20, ഏകദിന മത്സരങ്ങളുണ്ട്. ഹാര്ദിക് പണ്ഡ്യ ഏകദിനങ്ങളില് കളിച്ചേക്കില്ലന്നാണ് സൂചന. വ്യക്തിപരമായ കാരണങ്ങളെ തുടര്ന്നാണ് ഹാര്ദിക് വിട്ടുനില്ക്കുന്നത്. അങ്ങനെയെങ്കില് കെ.എല്.രാഹുലാകും ഏകദിനങ്ങളില് ടീമിന്റെ നായകന്. മലയാളി താരം സഞ്ജു സാംസണ് രണ്ട് ഫോര്മാറ്റിനുള്ള ടീമിലും ഇടം നേടുമെന്ന പ്രതീക്ഷയിലാണ് ആരാധകര്. പുതിയ പരിശീലകന് ഗൗതം ഗംഭീറിനൊപ്പമുള്ള ടീമിന്റെ ആദ്യ പര്യടനമാണിത്.
ടി20 ക്രിക്കറ്റില് നിന്ന് വിരമിച്ച ക്യാപ്റ്റന് രോഹിത് ശര്മയും വിരാട് കോലിയും ഏകദിന പരമ്പരയില് നിന്നും വിട്ടു നിന്നേക്കുമെന്നാണ് റിപ്പോര്ട്ട്. ജസ്പ്രീത് ബുമ്രക്കും വിശ്രമം അനുവദിച്ചേക്കും. ടി20യില് ഹാര്ദ്ദിക് പാണ്ഡ്യ രോഹിത് ശര്മയുടെ സ്വാഭാവിക പിന്ഗാമിയാകുമെന്നാണ് കരുതുന്നത്. ലോകകപ്പില് വൈസ് ക്യാപ്റ്റനായിരുന്ന ഹാര്ദ്ദിക് മികച്ച ഓള് റൗണ്ട് പ്രകടനം പുറത്തെടുത്തതോടെ ക്യാപ്റ്റന് സ്ഥാനത്തേക്ക് മറ്റൊരു പേരും ഇപ്പോള് ബിസിസിഐയുടെയോ സെലക്ടര്മാരുടെയോ മുന്നിലില്ല.
അടുത്ത വര്ഷം പാകിസ്ഥാനില് നടക്കുന്ന ചാമ്പ്യന്സ് ട്രോഫി ക്രിക്കറ്റ് ടൂര്ണമെന്റിന് മുമ്പ് ഇന്ത്യക്ക് ആറ് ഏകദിനങ്ങള് മാത്രമെ കളിക്കാനുള്ളു. അതില് ശ്രീലങ്കക്കെതിരായ മൂന്നെണ്ണം കഴിഞ്ഞാല് പിന്നെ അടുത്ത വര്ഷം ഫെബ്രുവരിയില് ഇംഗ്ലണ്ടനെതിരെ ആണ് മൂന്ന് മത്സരങ്ങള്. ചാമ്പ്യന്സ് ട്രോഫിയിലും ലോക ടെസ്റ്റ് ചാമ്പ്യന്ഷിപ്പിലും രോഹിത് തന്നെയായിരിക്കും ഇന്ത്യന് നായകനെന്ന് ബിസിസിഐ സെക്രട്ടറി ജയ് ഷാ വ്യക്തമാക്കിയിട്ടുണ്ട്.
ശ്രീലങ്കക്കെതിരായ പരമ്പര കഴിഞ്ഞാല് ഓഗസ്റ്റില് ബംഗ്ലാദേശിനെതിരായ രണ്ട് ടെസ്റ്റിലും മൂന്ന് ടി20യിലും ഇന്ത്യ കളിക്കും. പിന്നാലെ ഒക്ടോബറില് ന്യൂസിലന്ഡിനെതിരെ മൂന്ന് ടെസ്റ്റുകളടങ്ങിയ പരമ്പരയാണുള്ളത്. നവംബറില് ദക്ഷിണാഫ്രിക്കക്കെതിരെ നാലു മത്സരങ്ങളടങ്ങിയ ടി20 പരമ്പര കളിക്കുന്ന ഇന്ത്യ ഡിസംബറില്അഞ്ച് ടെസ്റ്റുകളടങ്ങിയ പരമ്പരയ്ക്കായി ഓസ്ട്രേലിയയിലേക്ക് പറക്കും.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!