'ഇന്ത്യന് ടീമിന്റെ പുനര്നിര്മാണം ദീര്ഘകാല ലക്ഷ്യത്തോടെ'; ശ്രേയസിന് പൂര്ണ പിന്തുണയുമായി റയാന് ടെന് ഡോഷേറ്റ്
Synopsis
ഇംഗ്ലണ്ടിനെതിരായ ടി20 പരമ്പരയിലെ തോല്വികള്ക്കിടയിലും നായകന് ശ്രേയസ് അയ്യര്ക്ക് പൂര്ണ പിന്തുണയുമായി അസിസ്റ്റന്റ് കോച്ച് റയാന് ടെന് ഡോഷേറ്റ്. ഇത് ടീമിന്റെ ദീര്ഘകാല ലക്ഷ്യത്തോടെയുള്ള പുനര്നിര്മാണത്തിന്റെ ഭാഗമാണെന്നും, സമ്മര്ദ്ദഘട്ടങ്ങളിലും മികച്ച പ്രകടനം നടത്തുന്ന ശ്രേയസിന്റെ കഠിനാധ്വാനത്തിന് ഫലം ലഭിക്കുമെന്നും അദ്ദേഹം വ്യക്തമാക്കി.
ബ്രിസ്റ്റോള്: ഇംഗ്ലണ്ടിനെതിരായ ടി20 പരമ്പരയിലെ തുടര്ച്ചയായ തോല്വികള്ക്ക് പിന്നാലെ, ഇന്ത്യന് നായകന് ശ്രേയസ് അയ്യര്ക്ക് ശക്തമായ പിന്തുണയുമായി അസിസ്റ്റന്റ് കോച്ച് റയാന് ടെന് ഡോഷേറ്റ്. ടീമിന്റെ മോശം പ്രകടനത്തില് വിമര്ശനങ്ങള് ഉയരുമ്പോഴും, ഇത് ടീമിന്റെ പുനര്നിര്മ്മാണത്തിന്റെ ഭാഗമാണെന്നും പുതിയ ക്യാപ്റ്റന് പക്വത പ്രാപിക്കാന് സമയം ആവശ്യമാണെന്നും അദ്ദേഹം വ്യക്തമാക്കി. സൂര്യകുമാര് യാദവില് നിന്ന് ശ്രേയസ് അയ്യരിലേക്കുള്ള ക്യാപ്റ്റന്സി മാറ്റം പെട്ടെന്നുണ്ടായ തീരുമാനമല്ലെന്ന് ടെന് ഡോഷേറ്റ് വിശദീകരിച്ചു.
അദ്ദേഹത്തിന്റെ വാക്കുകള്... ''ഇന്ത്യയെപ്പോലൊരു ടീമിനെ പരിശീലിപ്പിക്കുമ്പോള് ഭാവിയിലേക്കാണ് നാം നോക്കേണ്ടത്. സൂര്യകുമാര് മികച്ചൊരു നായകനായിരുന്നു, പക്ഷേ രണ്ട് വര്ഷത്തിന് ശേഷമുള്ള ടീമിനെക്കുറിച്ച് ചിന്തിക്കുമ്പോള് ചില കടുത്ത തീരുമാനങ്ങള് എടുക്കേണ്ടി വരും. അയര്ലന്ഡിലും ഇംഗ്ലണ്ടിലുമുണ്ടായ തോല്വികള് കാഴ്ചയില് മോശമായി തോന്നാമെങ്കിലും, വലിയൊരു പദ്ധതിയുടെ ഭാഗമാണിതെന്നത് മനസ്സിലാക്കണം.'' ടെന് ഡോഷേറ്റ് പറഞ്ഞു. ഹാര്ദിക് പാണ്ഡ്യ, ജസ്പ്രീത് ബുംറ തുടങ്ങിയ പ്രധാന താരങ്ങളുടെ അഭാവം ടീമിന്റെ പ്രകടനത്തെ കാര്യമായി ബാധിക്കുന്നുണ്ടെന്ന് അദ്ദേഹം ചൂണ്ടിക്കാട്ടി.
പുതിയ താരങ്ങളെ ഉള്പ്പെടുത്തി വ്യത്യസ്തമായ രീതിയില് കളിക്കാന് ശ്രമിക്കുന്ന ടീമിന്, ക്യാപ്റ്റന്റെ ശൈലിയുമായി പൊരുത്തപ്പെടാന് സമയം വേണമെന്നും അദ്ദേഹം കൂട്ടിച്ചേര്ത്തു. ടീം പരാജയപ്പെടുമ്പോഴും, നായകനെന്ന നിലയില് ശ്രേയസ് അയ്യര് നടത്തുന്ന പ്രകടനങ്ങളെ ടെന് ഡോഷേറ്റ് അഭിനന്ദിച്ചു. ''ലോകകപ്പ് നേടിയ ടീമില് ഇല്ലാത്തൊരാള്, ടീം പ്രതിസന്ധിയിലായിരിക്കുമ്പോള് ഉത്തരവാദിത്തം ഏറ്റെടുത്ത് ബാറ്റ് ചെയ്യുന്നത് കാണുമ്പോള് അത്ഭുതം തോന്നുന്നു. സമ്മര്ദ്ദഘട്ടങ്ങളിലും പതറാതെ റണ്സ് കണ്ടെത്താനും ടീമിനെ നയിക്കാനും അദ്ദേഹം കാണിക്കുന്ന ആത്മവിശ്വാസം എടുത്തു പറയേണ്ടതാണ്. ശ്രേയസിന്റെ കഠിനാധ്വാനത്തിന് തീര്ച്ചയായും ഫലം ലഭിക്കും.'' കോച്ച് കൂട്ടിച്ചേര്ത്തു.
ഇംഗ്ലണ്ടിനെതിരായ നാലാം മത്സരത്തില് തനിച്ചൊരു പോരാട്ടം നടത്തിയ ശ്രേയസ്, പുറത്താകാതെ 80 റണ്സ് നേടിയാണ് ടീമിനെ തുണച്ചത്. പരമ്പരയില് ഇതിനകം പരാജയം സമ്മതിച്ചെങ്കിലും, ജൂലൈ 11-ന് സൗതാംപ്ടണിലെ റോസ് ബൗളില് നടക്കുന്ന അവസാന മത്സരത്തില് ജയിച്ച് അഭിമാനം വീണ്ടെടുക്കാനാണ് ഇന്ത്യയുടെ ശ്രമം.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!