ഓറഞ്ച് ക്യാപ്; റൺവേട്ടയിൽ കുതിച്ചുകയറി കോലി, സായ് സുദര്‍ശന് ചങ്കിടിപ്പ് 

രാജസ്ഥാൻ റോയൽസിനെതിരെ 42 പന്തുകൾ നേരിട്ട വിരാട് കോലി 70 റൺസെടുത്തു. 

ബെം​ഗളൂരു: ഐപിഎൽ പതിനെട്ടാം എഡിഷനിൽ ബെംഗളൂരുവിനായി തകർപ്പൻ പ്രകടനം തുടരുകയാണ് വിരാട് കോലി. കഴിഞ്ഞ ദിവസം രാജസ്ഥാൻ റോയൽസിനെതിരെ കോലി 42 പന്തിൽ 70 റൺസെടുത്താണ് മടങ്ങിയത്. 32 പന്തിൽ നിന്നാണ് കോലി രാജസ്ഥാനെതിരെ അർധ സെഞ്ച്വറി കുറിച്ചത്. 8 ബൗണ്ടറിയും 2 സിക്സും അടങ്ങുന്ന ക്ലാസിക് ഇന്നിംഗ്സ്. ഈ ഐപിഎൽ സീസണിലെ അഞ്ചാമത്തെ അർധ സെഞ്ച്വറിയാണ് കോലി നേടിയത്. 

18-ാം സീസണിലെ റൺവേട്ടക്കാരിൽ കിംഗ് കോലി മുന്നിൽ തന്നെയുണ്ട്. 9 മത്സരങ്ങളിൽ നിന്ന് 65.33 ശരാശരിയിൽ 392 റൺസുമായി രണ്ടാം സ്ഥാനത്ത്. 8 മത്സരങ്ങളിൽ നിന്ന് 52.12 ശരാശരിയിൽ 417 റൺസ് നേടിയ ഗുജറാത്ത് ടൈറ്റൻസ് താരം സായ് സുദര്‍ശൻ മാത്രമാണ് ഇനി കോലിയ്ക്ക് മുന്നിലുള്ളത്. 9 മത്സരങ്ങളിൽ നിന്ന് 47.12 ശരാശരിയിൽ 377 റൺസ് നേടിയ ലക്നൗ സൂപ്പര്‍ ജയന്റ്സ് താരം നിക്കോളാസ് പൂരാനാണ് കോലിയ്ക്ക് പിന്നിൽ മൂന്നാമത്. മുംബൈ ഇന്ത്യൻസിന്‍റെ സൂര്യകുമാര്‍ യാദവ് 9 മത്സരങ്ങളിൽ നിന്ന് 62.16 ശരാശരിയിൽ 377 റൺസുമായി നാലാം സ്ഥാനത്തുണ്ട്. 9 മത്സരങ്ങളിൽ നിന്ന് 39.55 ശരാശരിയിൽ 356 റൺസ് നേടിയ രാജസ്ഥാൻ റോയൽസ് താരം യശസ്വി ജയ്സ്വാളാണ് ഓറഞ്ച് ക്യാപ് പോരാട്ടത്തിൽ അഞ്ചാം സ്ഥാനത്ത്. 

അതേസമയം, ഐപിഎല്ലിൽ രാജസ്ഥാനെതിരെ ബെംഗളൂരു 11 റൺസ് ജയമാണ് സ്വന്തമാക്കിയത്. 206 റൺസ് വിജയലക്ഷ്യം പിന്തുടർന്ന രാജസ്ഥാൻ 9 വിക്കറ്റ് നഷ്ടത്തിൽ 194 റൺസിൽ ഒതുങ്ങി. ആറാം ജയത്തോടെ ആര്‍സിബി പോയിന്റ് ടേബിളിൽ മൂന്നാം സ്ഥാനത്തേക്ക് ഉയര്‍ന്നു. 9 മത്സരങ്ങളിൽ 7 പരാജയങ്ങൾ ഏറ്റുവാങ്ങിയ രാജസ്ഥാൻ പോയിന്റ് പട്ടികയിൽ 8-ാം സ്ഥാനത്താണ്.