ആദ്യ റൗണ്ട് കഴിഞ്ഞപ്പോള്‍ രാജസ്ഥാൻ ബഹുദൂരം മുന്നില്‍, സഞ്ജുവിന്‍റെ ചെന്നൈ പോയന്‍റ് പട്ടികയില്‍ അവസാന സ്ഥാനത്ത്

ഇന്നലെ ലക്നൗ സൂപ്പര്‍ ജയന്‍റ്സിനെതിരെ ജയിച്ചു കയറിയ ഡല്‍ഹി ക്യാപിറ്റല്‍സ് + 1.40 നെറ്റ് റണ്‍റേറ്റുമായി മൂന്നാം സ്ഥാനത്തേക്ക് കയറിയപ്പോള്‍ കൊല്‍ക്കത്തയെ തകര്‍ത്ത് വിജയത്തുടക്കമിട്ട മുംബൈ ഇന്ത്യൻസ് +0.69 നെറ്റ് റണ്‍റേറ്റുമായി നാലാം സ്ഥാനത്താണ്.

കൊല്‍ക്കത്ത: ഐപിഎല്ലില്‍ എല്ലാ ടീമുകളും ഓരോ മത്സരങ്ങള്‍ വീതം പൂര്‍ത്തിയാക്കിയപ്പോള്‍ ഒന്നാം സ്ഥാനം നിലനിര്‍ത്തി രാജസ്ഥാന്‍ റോയല്‍സ്. ചെന്നൈ സൂപ്പര്‍ കിംഗ്സിനെതിരെ നേടിയ വമ്പന്‍ ജയത്തോടെ നെറ്റ് റണ്‍റേറ്റില്‍(+4.17) എതിരാളികളെക്കാള്‍ മുന്നിലെത്തിയാണ് രാജസ്ഥാന്‍ ഒന്നാം സ്ഥാനം നിലനിര്‍ത്തിയത്. ഹൈദരാബാദിനെതിരായ ആദ്യ മത്സരത്തില്‍ തകര്‍പ്പന്‍ ജയം നേടിയ നിലനിലെ ചാമ്പ്യൻമാരായ റോയല്‍ ചലഞ്ചേഴ്സ് ബെംഗളൂരു ആണ് രണ്ടാം സ്ഥാനത്ത്. +2.91 എന്ന മികച്ച നെറ്റ് റണ്‍റേറ്റും ആര്‍സിബിക്കുണ്ട്.

ഇന്നലെ ലക്നൗ സൂപ്പര്‍ ജയന്‍റ്സിനെതിരെ ജയിച്ചു കയറിയ ഡല്‍ഹി ക്യാപിറ്റല്‍സ് + 1.40 നെറ്റ് റണ്‍റേറ്റുമായി മൂന്നാം സ്ഥാനത്തേക്ക് കയറിയപ്പോള്‍ കൊല്‍ക്കത്തയെ തകര്‍ത്ത് വിജയത്തുടക്കമിട്ട മുംബൈ ഇന്ത്യൻസ് +0.69 നെറ്റ് റണ്‍റേറ്റുമായി നാലാം സ്ഥാനത്താണ്. ആദ്യ കളിയില്‍ ഗുജറാത്തിനെതിരെ വിറച്ചു ജയിച്ച പഞ്ചാബ് കിംഗ്സ് +0.51 നെറ്റ് റണ്‍റേറ്റുമായി അഞ്ചാം സ്ഥാനത്താണ്.

ആദ്യ കളി തോറ്റെങ്കിലും പഞ്ചാബിനെതിരെ പൊരുതി തോറ്റ ഗുജറാത്താണ് -0.51 നെറ്റ് റണ്‍റേറ്റുമായി ആറാം സ്ഥാനത്ത്. മുംബൈയോട് ആദ്യ കളിയില്‍ തോറ്റ കൊല്‍ക്കത്ത ഏഴാമതാണ്. ഇന്നലെ ഡല്‍ഹിയോട് തോറ്റ ലക്നൗ എട്ടാമതും സണ്‍റൈസേഴ്സ് ഹൈദരാബാദ് ഒമ്പതാമതുമാണ്. ആദ്യ മത്സരത്തില്‍ രാജസ്ഥാന്‍ റോയല്‍സിനോട് കനത്ത തോല്‍വി വഴങ്ങിയ ചെന്നൈ സൂപ്പര്‍ കിംഗ്സ് -4.17 നെറ്റ് റണ്‍റേറ്റുമായി അവസാന സ്ഥാനത്താണ്. പോയന്‍റ് പട്ടികയില്‍ ആദ്യ നാലു സ്ഥാനക്കാരാണ് പ്ലേ ഓഫിന് യോഗ്യത നേടുക.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക