ഫീൽ‍ഡിംഗിനിടെ പരിക്കേറ്റ ദിനേശ് ചണ്ഡിമാൽ ആശുപത്രിയിൽ, ഗാലെ ടെസ്റ്റിൽ നിന്ന് പുറത്ത്, പകരക്കാരനെ പ്രഖ്യാപിച്ച് ശ്രീലങ്ക

ഇന്ത്യയുടെ രണ്ടാം ഇന്നിങ്സിന്‍റെ തുടക്കത്തിൽ ബൗണ്ടറി തടയാൻ ശ്രമിക്കുന്നതിനിടെയാണ് 36-കാരനായ ചണ്ഡിമാലിന് പരിക്കേറ്റത്.

ഗാലെ: ഇന്ത്യക്കെതിരായ ഗാലെ ടെസ്റ്റിന്‍റെ നാലാം ദിനം ശ്രീലങ്കയ്ക്ക് കനത്ത തിരിച്ചടി. ഫീൽഡിങ്ങിനിടെ തോളിനും കഴുത്തിനും ഗുരുതരമായി പരിക്കേറ്റ ദിനേശ് ചണ്ഡിമാലിനെ ആശുപത്രിയിൽ പ്രവേശിപ്പിച്ചു. പരിക്കിനെ തുടർന്ന് ചണ്ഡിമാലിനെ മത്സരത്തിൽ നിന്ന് ഒഴിവാക്കിയതായും പകരം അരങ്ങേറ്റ താരം പസിന്ധു സൂരിയബണ്ഡാരയെ കൺകഷൻ സബ്സ്റ്റിറ്റ്യൂട്ടായി ഉൾപ്പെടുത്തിയതായും ശ്രീലങ്കൻ ക്രിക്കറ്റ് ബോർഡ് അറിയിച്ചു.

ഇന്ത്യയുടെ രണ്ടാം ഇന്നിങ്സിന്‍റെ തുടക്കത്തിൽ ബൗണ്ടറി തടയാൻ ശ്രമിക്കുന്നതിനിടെയാണ് 36-കാരനായ ചണ്ഡിമാലിന് പരിക്കേറ്റത്. ഡൈവ് ചെയ്തു വീണ താരം കഴുത്തിന്‍റെ വലതുഭാഗത്ത് കടുത്ത വേദനയോടെ ഗ്രൗണ്ടിൽ കിടക്കുകയായിരുന്നു. ഫിസിയോയും ടീം ഡോക്ടറും ചേർന്ന് പ്രാഥമിക ശുശ്രൂഷ നൽകിയ ശേഷം വിദഗ്ധ പരിശോധനകൾക്കായി താരത്തെ സ്കാനിങ്ങിന് വിധേയനാക്കാൻ ആശുപത്രിയിലേക്ക് മാറ്റി.

ഒന്നാം ഇന്നിങ്സിൽ 178 റൺസിന്‍റെ കൂറ്റൻ ലീഡ് നേടിയ ഇന്ത്യ രണ്ടാം ഇന്നിങ്സിൽ 193 റണ്‍സിന് പുറത്തായിരുന്നു. ആദ്യ ഇന്നിങ്സിലെ സെഞ്ച്വറി വീരൻ ദേവ്ദത്ത് പടിക്കൽ (44), കെ.എൽ രാഹുൽ (35) എന്നിവർ ബാറ്റിങ്ങിൽ സ്ഥിരത പുലർത്തിയപ്പോൾ, രണ്ടാം സെഷനിൽ 8 ഫോറുകളും 2 സിക്സറുകളും അടക്കം 66 റൺസ് അടിച്ചുകൂട്ടിയ റിഷഭ് പന്തിന്റെ വെടിക്കെട്ട് പ്രകടനമാണ് ഇന്ത്യയുടെ ലീഡ് 350 കടത്തിയത്. ലോക ടെസ്റ്റ് ചാമ്പ്യൻഷിപ്പ് ഫൈനൽ പ്രതീക്ഷകൾ നിലനിർത്താൻ ഇന്ത്യക്ക് ഈ ടെസ്റ്റ് വിജയം അത്യന്താപേക്ഷിതമാണ്. കൂറ്റൻ വിജയലക്ഷ്യത്തിലേക്ക് ബാറ്റ് വീശേണ്ട ശ്രീലങ്കയ്ക്ക് ചണ്ഡിമാലിന്‍റെ അഭാവം വലിയ തിരിച്ചടിയാണ്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക