ഇംഗ്ലണ്ടിനെതിരായ ടെസ്റ്റ് പരമ്പര: പാകിസ്ഥാന്‍ ടീമില്‍ രണ്ട് പുതുമുഖങ്ങള്‍; ഫവാദ് ആലം പുറത്ത്

മൂന്ന് ടെസ്റ്റുകളാണ് പരമ്പരയിലുള്ളത്. ആദ്യ ടെസ്റ്റ് ഡിസംബര്‍ ഒന്നിന് റാവല്‍പിണ്ടിയില്‍ നടക്കും. ഡിസംബര്‍ ഒമ്പതിന് മുള്‍ട്ടാനിലാണ് രണ്ടാം ടെസ്റ്റ്. മൂന്നാം ടെസ്റ്റ് ഡിസംബര്‍ 17ന് കറാച്ചിയില്‍ നടക്കും.

ഇസ്ലാമാബാദ്: അടുത്ത മാസം ഇംഗ്ലണ്ടിനെതിരെ നാട്ടില്‍ നടക്കുന്ന ടെസ്റ്റ് പരമ്പരയ്ക്കുള്ള പാകിസ്ഥാന്‍ ടീമിനെ പ്രഖ്യാപിച്ചു. രണ്ട് പുതുമുഖ താരങ്ങള്‍ ഉള്‍പ്പെടുന്നതാണ് പാകിസ്ഥാന്‍ 18 അംഗ സ്‌ക്വാഡ്. ലെഗ് സ്പിന്നര്‍ അബ്രാര്‍ അഹമ്മദ്, ഫാസ്റ്റ് ബൗളര്‍ മുഹമ്മദ് അലി എന്നിവര്‍ക്കാണ് ടീമിലിടം ലഭിച്ചത്. ഫവാദ് ആലം, യാസിര്‍ ഷാ, ഹാസന്‍ അലി എന്നിവര്‍ക്ക് സ്ഥാനം നഷ്ടമായി. കഴിഞ്ഞ ശ്രീലങ്കന്‍ പര്യടനത്തില്‍ ടീമിന്റെ ഭാഗമായിരുന്നു മൂവരും. ടി20 ലോകകപ്പിനിടെ പരിക്കേറ്റ ഷഹീന്‍ അഫ്രീദിയെ ടീമിലേക്ക് പരിഗണിച്ചിട്ടില്ല.

മൂന്ന് ടെസ്റ്റുകളാണ് പരമ്പരയിലുള്ളത്. ആദ്യ ടെസ്റ്റ് ഡിസംബര്‍ ഒന്നിന് റാവല്‍പിണ്ടിയില്‍ നടക്കും. ഡിസംബര്‍ ഒമ്പതിന് മുള്‍ട്ടാനിലാണ് രണ്ടാം ടെസ്റ്റ്. മൂന്നാം ടെസ്റ്റ് ഡിസംബര്‍ 17ന് കറാച്ചിയില്‍ നടക്കും. 17 വര്‍ഷങ്ങള്‍ക്ക് ശേഷമാണ് ഇംഗ്ലണ്ട് പാകിസ്ഥാനില്‍ ടെസ്റ്റ് കളിക്കാനൊരുങ്ങുന്നത്. നിലവില്‍ ഇംഗ്ലണ്ട് ക്രിക്കറ്റ് ടീം അബുദാബിയില്‍ പരിശീലനത്തിലാണ്. ഇംഗ്ലണ്ട് ലയണ്‍സുമായി ത്രിദിന സന്നാഹ മത്സരം കളിക്കും. നവംബര്‍ 23 മുതല്‍ 25 വരെയാണ് മത്സരം. 27ന് ടീം ഇസ്ലാമാബാദിലെത്തും.

പാകിസ്ഥാന്‍ ടെസ്റ്റ്: ബാബര്‍ അസം (ക്യാപ്റ്റന്‍), മുഹമ്മദ് റിസ്‌വാന്‍, ഇമാം ഉല്‍ ഹഖ്, അബ്ദുള്ള ഷെഫീഖ്, അസര്‍ അലി, അബ്രാര്‍ അഹമ്മദ്, മുഹമ്മദ് അലി, ഷാന്‍ മസൂദ്, ഫഹീം അഷ്‌റഫ്, ഹാരിസ് റൗഫ്, മുഹമ്മദ് നവാസ്, നൗമാന്‍ അലി, സൗദ് ഷക്കീല്‍, സാഹിദ് മഹ്മൂദ്, മുഹമ്മദ് വസിം, നസീം ഷാ, സല്‍മാന്‍ അലി അഗ, സര്‍ഫറാസ് അഹമ്മദ്.

നേരത്തെ ടി20 പരമ്പര ഇംഗ്ലണ്ട് സ്വന്തമാക്കിയിരുന്നു. ഏഴ് മത്സരങ്ങളുടെ പരമ്പര 4-3നാണ് ഇംഗ്ലണ്ട് ജയിച്ചത്. പിന്നാലെ ടി20 ലോകകപ്പിന്റെ ഫൈനിലിലും ഇരുവരും നേര്‍ക്കുനേര്‍ വന്നു. അപ്പോഴും ജയം ഇംഗ്ലണ്ടിനൊപ്പം നിന്നു. ത്രില്ലര്‍ മത്സരത്തില്‍ ആറ് വിക്കറ്റിന്റെ ജയമാണ് ഇംഗ്ലണ്ട് സ്വന്തമാക്കിയത്. ടോസ് നഷ്ടപ്പെട്ട് ബാറ്റിംഗിനെത്തിയ പാകിസ്ഥാന്‍ നിശ്ചിത ഓവറില്‍ എട്ട് വിക്കറ്റ് നഷ്ടത്തില്‍ 137 റണ്‍സാണ് നേടിയത്. മറുപടി ബാറ്റിംഗില്‍ ഇംഗ്ലണ്ട് 19 ഓവറില്‍ അഞ്ച് വിക്കറ്റ് നഷ്ടത്തില്‍ ലക്ഷ്യം മറികടന്നു.