വനിതാ ഏകദിന ലോകകപ്പ് കിരീടം നേടിയ ഇന്ത്യൻ ടീമിനെ ആദരിക്കാൻ പ്രധാനമന്ത്രി, കൂടിക്കാഴ്ച ബുധനാഴ്ച
Synopsis
ഇന്ന് രാവിലെ ബിഹാറിലെ സര്ഹസയില് പൊതു പരിപാടിയില് പങ്കെടുക്കവെ ലോകകപ്പ് നേടിയ ഇന്ത്യൻ ടീമിനെ പ്രധാനമന്ത്രി അഭിനന്ദിച്ചിരുന്നു.
ദില്ലി: വനിതാ ഏകദിന ലോകകപ്പ് കിരീടം നേടിയ ഇന്ത്യൻ ടീമിനെ ഔദ്യോഗിക വസതിയിലേക്ക് ക്ഷണിച്ച് പ്രധാനമന്ത്രി നരേന്ദ്ര മോദി. ബുധനാഴ്ചയാണ് പ്രധാനമന്ത്രിയുടെ ഓഫീസില് ഇന്ത്യൻ ടീമിന് സ്വീകരണമൊരുക്കുക. ഇന്ത്യൻ ടീമിനെ ഔദ്യോഗികമായി ക്ഷണിച്ചുകൊണ്ടുള്ള സന്ദേശം പ്രധാനമന്ത്രിയുടെ ഓഫീസില് നിന്ന് ലഭിച്ചതായി ബിസിസിഐ വ്യക്തമാക്കി. മുംബൈയിലുള്ള ഇന്ത്യൻ ടീം അംഗങ്ങള് പ്രധാനമന്ത്രിയുമായുള്ള കൂടിക്കാഴ്ചക്കായി നാളെ വൈകിട്ടോടെ ഡല്ഹിക്ക് തിരിക്കും. ഇതിനുശേഷമായിരിക്കും ടീം അംഗങ്ങളെല്ലാം അവരവരുടെ വീടുകളിലേക്ക് പോകുക.
ഇന്ന് രാവിലെ ബിഹാറിലെ സര്ഹസയില് പൊതു പരിപാടിയില് പങ്കെടുക്കവെ ലോകകപ്പ് നേടിയ ഇന്ത്യൻ ടീമിനെ പ്രധാനമന്ത്രി അഭിനന്ദിച്ചിരുന്നു. ഇന്നലെ ഇന്ത്യയുടെ പെണ്കുട്ടികള് മുംബൈയില് ചരിത്രം രചിച്ചിരിക്കുന്നു. ഇന്ത്യ ലോകകപ്പില് കിരീടം നേടിയിരിക്കുന്നു. 25 വര്ഷത്തിനുശേഷം വനിതാ ലോകകപ്പില് പുതിയ ചാമ്പ്യനുണ്ടായിരിക്കുന്നു. ഇത് കായികരംഗത്തെ മാത്രം നേട്ടമല്ല, ഇന്ത്യൻ പെണ്കുട്ടികളുടെ ആത്മവിശ്വാസത്തിന്റെ തെളിവാണിതെന്നും പ്രധാനമന്ത്രി പറഞ്ഞിരുന്നു.
ഈ പെണ്കുട്ടികളെല്ലാം ഇന്ത്യയുടെ ഉള്നാടന് ഗ്രാമങ്ങളില് നിന്നും പട്ടണങ്ങളില് നിന്നും വരുന്നവരാണ്. അവരില് കര്ഷകരുടെയും തൊഴിലാളികളുടെയും മധ്യവര്ത്തി കുടുംബങ്ങളിലുള്ളവരുടെയും കുട്ടികളുണ്ട്. അവരെ ഓര്ത്ത് ഞാനും രാജ്യവും അഭിമാനിക്കുന്നു. ലോകകപ്പിൽ ചാമ്പ്യൻമാരായ എല്ലാ പെണ്കുട്ടികളുടെയും രക്ഷിതാക്കളെയും ഞാന് അഭിനന്ദിക്കുന്നുവെന്നായിരുന്നു പ്രധാനമന്ത്രിയുടെ വാക്കുകള്.
ലോകകപ്പ് നേടിയ ഇന്ത്യൻ ടീമിന്റെ ആഘോഷം എങ്ങനെയായിരിക്കുമെന്ന കാര്യത്തില് ബിസിസിഐ ഇതുവരെ മനസു തുറന്നിട്ടില്ല. ലോകകപ്പ് നേടിയ ഇന്ത്യൻ ടീമിന് ബിസിസിഐ 51 കോടി രൂപ പാരിതോഷികം പ്രഖ്യാപിച്ചിരുന്നു. കഴിഞ്ഞ വര്ഷം ഇന്ത്യൻ പുരുഷ ടീം ടി20 ലോകകപ്പ് നേടിയപ്പോള് മുംബൈയില് ഓപ്പണ് ബസില് വിക്ടറി മാര്ച്ച് നടത്തിയിരുന്നു. എന്നാല് ഐപിഎല് കിരീടം നേടിയ ആര്സിബിയുടെ വിക്ടറി മാര്ച്ചിനിടെ ഉണ്ടായ ആള്ക്കൂട്ട ദുരന്തത്തിന്റെ പശ്ചാത്തലത്തില് വിക്ടറി മാര്ച്ച് നടത്തണോ എന്ന കാര്യത്തില് ബിസിസിഐ നിലപാടെടുത്തിട്ടില്ല.
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക് ചെയ്യുക
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!