'രാജസ്ഥാൻ ഇനിയൊരിക്കലും അവനെ കൈവിടില്ല'; വൈഭവ് സൂര്യവംശിയെക്കുറിച്ച് ലക്നൗ ടീം ഉടമ സഞ്ജീവ് ഗോയങ്ക

വൈഭവ് സൂര്യവംശി സ്വന്തം ടീമിൽ ഇല്ലല്ലോ എന്ന നിരാശ എല്ലാ ടീമുടമകൾക്കുമുണ്ട്. രാജസ്ഥാൻ റോയൽസ് ഉടമ ലക്ഷ്മി മിത്തൽ ഇനി അവന്‍റെ ജീവിതകാലത്ത് ഒരിക്കലും വൈഭവിനെ ടീമിൽ നിന്ന് പുറത്തുപോകാൻ അനുവദിക്കില്ലെന്നും സഞ്ജീവ് ഗോയങ്ക.

ലക്നൗ: ഇന്ത്യ-അഫ്ഗാനിസ്ഥാൻ ടി20 പരമ്പരയ്ക്ക് മുന്നോടിയായി കൗമാരതാരം വൈഭവ് സൂര്യവംശിയുടെ പ്രകടനങ്ങളെ പുകഴ്ത്തി ലക്നൗ സൂപ്പർ ജയന്‍റ്സ് ഉടമ സഞ്ജീവ് ഗോയങ്ക. 2025-ലെ ഐപിഎൽ മെഗാ ലേലത്തിൽ 1.10 കോടി രൂപയ്ക്ക് രാജസ്ഥാൻ റോയൽസ് സ്വന്തമാക്കിയ വൈഭവിനെ തങ്ങളുടെ ടീമിൽ എത്തിക്കാൻ സാധിക്കാത്തതിൽ എല്ലാ ടീമുടമകൾക്കും നിരാശയുണ്ടെന്ന് ഗോയങ്ക തുറന്നുപറഞ്ഞു. മാധ്യമപ്രവർത്തകൻ ശുഭങ്കർ മിശ്രയുടെ യൂട്യൂബ് ചാനലിൽ സംസാരിക്കുകയായിരുന്നു ഗോയങ്ക.

വൈഭവ് സൂര്യവംശി സ്വന്തം ടീമിൽ ഇല്ലല്ലോ എന്ന നിരാശ എല്ലാ ടീമുടമകൾക്കുമുണ്ട്. രാജസ്ഥാൻ റോയൽസ് ഉടമ ലക്ഷ്മി മിത്തൽ ഇനി അവന്‍റെ ജീവിതകാലത്ത് ഒരിക്കലും വൈഭവിനെ ടീമിൽ നിന്ന് പുറത്തുപോകാൻ അനുവദിക്കില്ലെന്നും സഞ്ജീവ് ഗോയങ്ക വ്യക്തമാക്കി. വൈഭവിന്‍റെ ആത്മവിശ്വാസത്തെയും ബാറ്റിംഗ് മികവിനെയും സഞ്ജീവ് ഗോയങ്ക അഭിനന്ദിച്ചു. അവന് അസാമാന്യ പ്രതിഭയും വമ്പൻ ഷോട്ടുകൾ കളിക്കാനുള്ള ശേഷിയുമുണ്ട്. അതിലുമുപരി അമിത ആത്മവിശ്വാസമല്ലാത്ത മികച്ച ആത്മവിശ്വാസം അവനിലുണ്ട്. വമ്പൻ മത്സരങ്ങളിൽ തിളങ്ങുന്ന താരമാണ് അവൻ- ഗോയങ്ക പറഞ്ഞു.

13-ാം വയസിൽ ഐപിഎൽ ലേല ചരിത്രത്തിലെ ഏറ്റവും പ്രായം കുറഞ്ഞ താരമായി രാജസ്ഥാൻ റോയൽസിലെത്തിയ വൈഭവ്, അതിശയകരമായ പ്രകടനമാണ് പുറത്തെടുത്തത്. 2026 ഐ.പി.എൽ സീസണിൽ 16 ഇന്നിംഗ്സുകളിൽ നിന്ന് 237.31 സ്ട്രൈക്ക് റേറ്റിൽ 776 റൺസ് അടിച്ച് ഓറഞ്ച് ക്യാപ്പ് സ്വന്തമാക്കിയാണ് യുവതാരം ഇന്ത്യൻ ടി20 ടീമിലേക്ക് വഴിതുറന്നത്.

അതേസമയം, വൈഭവിനെ നേരിടാൻ പ്രത്യേക പദ്ധതികൾ തയ്യാറാക്കിയിട്ടുണ്ടെന്ന് അഫ്ഗാനിസ്ഥാൻ ക്യാപ്റ്റൻ ഇബ്രാഹിം സദ്രാൻ വ്യക്തമാക്കി. വൈഭവിന്‍റെ ബാറ്റിംഗ് വീഡിയോകൾ കണ്ട് തങ്ങൾ വിശകലനം നടത്തിയിട്ടുണ്ടെന്നും ഐ.പി.എല്ലിൽ അവനെതിരെ കളിച്ച താരങ്ങളിൽ നിന്ന് കൃത്യമായ വിവരങ്ങൾ ശേഖരിച്ചിട്ടുണ്ടെന്നും മത്സരത്തിന് മുന്നോടിയായുള്ള വാർത്താസമ്മേളനത്തിൽ സദ്രാൻ പറഞ്ഞു. ഡൽഹി അരുൺ ജെയ്റ്റ്‌ലി സ്റ്റേഡിയത്തിലാണ് ഇന്ത്യ-അഫ്ഗാനിസ്ഥാൻ ആദ്യ ടി20 മത്സരം നടക്കുന്നത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക