10 പേര് പുറത്തായത് റണ്ണെടുക്കാതെ, ടീം ഓള് ഔട്ടായത് 4 റണ്സിന്, രാജസ്ഥാന് വനിതാ ക്രിക്കറ്റില് നാണക്കേട്
Synopsis
രാജസ്ഥാനിലെ ജില്ലാ സീനിയര് വനിതാ ടി20 ക്രിക്കറ്റില് സിരോഹി ടീം വെറും നാലു റണ്സിന് ഓൾ ഔട്ടായി. സികാര് ടീമിനെതിരായ മത്സരത്തില് പത്തു ബാറ്റര്മാര് റണ്ണെടുക്കാതെ പുറത്തായി.
ജയ്പൂര്: രജസ്ഥാനിലെ ജില്ലാ സീനിയര് വനിതാ ടി20 ക്രിക്കറ്റില് നാണക്കേടിന്റെ റെക്കോര്ഡിട്ട് സിരോഹി ടീം. ജയ്പൂരില് നടന്ന സികാര് ടീമിനെതിരായ മത്സരത്തില് സിരോഹി ടീം വെറും നാലു റണ്സിന് ഓൾ ഔട്ടായി നാണംകെട്ടു. ടീം അടിച്ച നാലു റണ്സില് രണ്ട് റണ്സ് എക്സ്ട്രാസിലൂടെ ലഭിച്ചതാണ്. 10 ബാറ്റര്മാര് റണ്ണെടുക്കാതെ പുറത്തായപ്പോള് ഒരേയൊരു താരം മാത്രമാണ് രണ്ട് റണ്സെടുത്തത്.
രാജസ്ഥാനിലെ 33 ജില്ലാ ടീമുകളെ പങ്കെടുപ്പിച്ചുകൊണ്ട് നടത്തിയ ടൂര്ണമെന്റിലാണ് നാണക്കേടിന്റെ സ്കോര് പിറന്നത്. മറുപടി ബാറ്റിംഗില് സികാര് ടീം ഒരു റണ് മാത്രമാണ് ബാറ്റിംഗിലൂടെ നേടിയത്. നാലു റണ്സ് വൈഡായി ലഭിച്ചതോടെ ടീം അനായാസം ലക്ഷ്യത്തിലെത്തി.
വര്ഷങ്ങളായി രാജസ്ഥാന് ക്രിക്കറ്റില് നിലനില്ക്കുന്ന കെടുകാര്യസ്ഥതയുടെ ഫലമാണ് ഈ മത്സരമെന്ന ആരോപണം ഉയരുന്നുണ്ട്. അധികാരത്തര്ക്കം കോടതി കയറിയതോടെ പല ജില്ലാ അസോസിയേഷനുകളും നിര്ജീവമാണെന്നും ഇത് ടീം സെലകഷനിലും അടിസ്ഥാന സൗകര്യങ്ങള് ഒരുക്കുന്നതിലും അടക്കം പ്രതിഫലിച്ചതിന്റെ ഫലമാണ് ഇപ്പോള് കാണുന്നതെന്നും ആരാധകര് പറയുന്നു. യോഗ്യതയുടെ അടിസ്ഥാനത്തിലായിരുന്നില്ല ജില്ലാം ടീം തെരഞ്ഞെടുപ്പെന്നും ഇഷ്ടക്കാരെ തിരുകി കയറ്റുകയായിരുന്നുവെന്നും ആരോപണമുണ്ട്.
ഏഷ്യാനെറ്റ് ന്യൂസ് മലയാളത്തിലൂടെ Cricket News അറിയൂ. നിങ്ങളുടെ പ്രിയ ക്രിക്കറ്റ്ടീ മുകളുടെ പ്രകടനങ്ങൾ, ആവേശകരമായ നിമിഷങ്ങൾ, മത്സരം കഴിഞ്ഞുള്ള വിശകലനങ്ങൾ — എല്ലാം ഇപ്പോൾ Asianet News Malayalam മലയാളത്തിൽ തന്നെ!