‘ഇതിനെ ക്രിക്കറ്റെന്ന് വിളിക്കാനാവില്ല', 400 റണ്‍സ് ചേസ് ചെയ്ത് ജയിച്ചിട്ടും അസംതൃപ്തി പരസ്യമാക്കി ഗൗതം ഗംഭീര്‍

ഇത്തരം ബാറ്റിങ് പിച്ചുകളിൽ ബൗളർമാരുടെ മോശം ബൗളിംഗ് പുറത്തെടുത്താലും റൺസേറെ വഴങ്ങിയാലും അവരെ കഠിനമായി വിമർശിക്കാനാവില്ലെന്നും ഗംഭീർ അഭിപ്രായപ്പെട്ടു.

ഗുവാഹത്തി: വെസ്റ്റ് ഇൻഡീസിനെതിരായ രണ്ടാം ഏകദിനത്തിൽ 406 റൺസ് എന്ന കൂറ്റൻ ലക്ഷ്യം മറികടന്ന് ഇന്ത്യ ചരിത്രവിജയം കുറിച്ചെങ്കിലും, മത്സരത്തിലെ പിച്ചിന്‍റെ നിലവാരത്തിൽ അസംതൃപ്തി പരസ്യമാക്കി ഇന്ത്യൻ പരിശീലകൻ ഗൗതം ഗംഭീർ. ഗുവാഹത്തിയിൽ ബാറ്റർമാർക്ക് മാത്രം അമിത പ്രാധാന്യം നൽകി ഒരുക്കിയ പിച്ച് ശരിയായ ക്രിക്കറ്റിന് ചേർന്നതല്ലെന്നും, ഇത് വെറും ബാറ്റിങ് പ്രദർശനം മാത്രമാണെന്നും മത്സരം കഴിഞ്ഞയുടൻ സ്റ്റാർ സ്പോർട്സിനോട് സംസാരിക്കവെ ഗംഭീർ തുറന്നടിച്ചു. വരും മത്സരങ്ങളിൽ ബാറ്റര്‍മാരും ബൗളര്‍മാരും തമ്മിൽ തുല്യമായ പോരാട്ടം ഉറപ്പാക്കുന്ന രീതിയിൽ പിച്ചുകൾ ഒരുക്കണമെന്ന് ബോർഡ് ഓഫ് കൺട്രോൾ ഫോർ ക്രിക്കറ്റ് ഇൻ ഇന്ത്യയോടും സംസ്ഥാന ക്രിക്കറ്റ് അസോസിയേഷനുകളോടും ഗംഭീര്‍ ആവശ്യപ്പെട്ടു.

ഇത്തരമൊരു ഫ്ലാറ്റ് വിക്കറ്റിൽ പന്തെറിയേണ്ടി വരുന്ന ബൗളർമാരോട് തനിക്ക് കടുത്ത സഹതാപമുണ്ടെന്ന് ഗംഭീർ പറഞ്ഞു. ഇത്തരം മത്സരങ്ങൾ കാണികൾക്കും ബ്രോഡ്കാസ്റ്റർമാർക്കും റെക്കോർഡുകൾക്കും വളരെ മികച്ചതായി തോന്നാമെങ്കിലും, ഒരു യഥാർത്ഥ ക്രിക്കറ്റ് പ്രേമിയെന്ന നിലയിലും പരിശീലകനെന്ന നിലയിലും ബൗളർമാർക്ക് അനുകൂലമായി പിച്ചിൽ എന്തെങ്കിലും ഘടകങ്ങൾ ഉണ്ടായിരിക്കണമെന്നാണ് തന്‍റെ നിലപാടെന്ന് അദ്ദേഹം വ്യക്തമാക്കി. ഇത്തരം റൺവേ പിച്ചുകളിൽ എറിയുമ്പോൾ ബൗളർമാർക്ക് കാര്യമായി ഒന്നും ചെയ്യാനുണ്ടാകില്ലെന്നും അത് നീതിയല്ലെന്നും ഗംഭീര്‍ കൂട്ടിച്ചേർത്തു.

ഇത്തരം ബാറ്റിങ് പിച്ചുകളിൽ ബൗളർമാരുടെ മോശം ബൗളിംഗ് പുറത്തെടുത്താലും റൺസേറെ വഴങ്ങിയാലും അവരെ കഠിനമായി വിമർശിക്കാനാവില്ലെന്നും ഗംഭീർ അഭിപ്രായപ്പെട്ടു. ഇന്നത്തെ കാലത്ത് പവർ ഹിറ്റിങ് സർവ്വസാധാരണമായ സാഹചര്യത്തിൽ ബൗളർമാർക്ക് അത്ര എളുപ്പമല്ല കാര്യങ്ങളെന്നും, അതിനാൽ പ്ലാനുകൾ കൃത്യമായി നടപ്പിലാക്കിയോ എന്ന് മാത്രമാണ് കോച്ചിങ് സ്റ്റാഫ് നോക്കുന്നതെന്നും അദ്ദേഹം പറഞ്ഞു. അരങ്ങേറ്റക്കാരനായ ആഖിബ് നബിയെപ്പോലുള്ള യുവതാരങ്ങൾക്ക് പിന്തുണ നൽകേണ്ടത് അത്യാവശ്യമാണെന്നും, 2027 ഏകദിന ലോകകപ്പിന് മുന്നോടിയായി യുവ ബൗളർമാർക്ക് സമ്മർദ്ദഘട്ടങ്ങളിൽ പന്തെറിയാൻ കൂടുതൽ അവസരങ്ങൾ നൽകുകയാണ് ലക്ഷ്യമെന്നും ഗംഭീർ വ്യക്തമാക്കി.

മത്സരത്തിൽ ആദ്യം ബാറ്റ് ചെയ്ത വെസ്റ്റ് ഇൻഡീസ് ജോൺ കാംപ്ബെൽ, ഷായ് ഹോപ്പ്, ആമിർ ജാങ്കോ എന്നിവരുടെ സെഞ്ചുറികളുടെ കരുത്തിൽ 50 ഓവറിൽ 7 വിക്കറ്റ് നഷ്ടത്തിൽ 405 റൺസെടുത്തു. എന്നാൽ മറുപടി ബാറ്റിങ്ങിനിറങ്ങിയ ഇന്ത്യ ക്യാപ്റ്റൻ ശുഭ്മാന്‍ ഗില്ലിന്‍റെ റെക്കോർഡ് ഇരട്ട സെഞ്ചുറിയുടെയും (133 പന്തിൽ പുറത്താകാതെ 223) രോഹിത് ശർമയുടെ (75 പന്തിൽ 101) സെഞ്ചുറിയുടെയും മികവിൽ 43.3 ഓവറിൽ വെറും 2 വിക്കറ്റ് മാത്രം നഷ്ടപ്പെടുത്തി ലക്ഷ്യം കണ്ടു. വിരാട് കോഹ്‌ലി 19 പന്തിൽ 29 റൺസും റുതുരാജ് ഗെയ്‌ക്‌വാദ് 37 പന്തിൽ 31 റൺസുമെടുത്ത് പിന്തുണ നൽകി. ഏകദിന ചരിത്രത്തിൽ 400-ൽ അധികം റൺസ് വിജയകരമായി ചേസ് ചെയ്യുന്ന രണ്ടാമത്തെ മാത്രം സംഭവമാണിത്. ഈ വിജയത്തോടെ മൂന്ന് മത്സരങ്ങളടങ്ങിയ പരമ്പരയിൽ ഇന്ത്യ 2-0 ന് മുന്നിലെത്തി പരമ്പര സ്വന്തമാക്കി. പരമ്പരയിലെ അവസാന ഏകദിനം ശനിയാഴ്ച ന്യൂ ചണ്ഡീഗഢിലെ പി.സി.എ സ്റ്റേഡിയത്തിൽ നടക്കും.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക