ഇരട്ടസഹോദരനൊപ്പം കളിക്കുന്നതിനിടെ ബാൽക്കണിയിൽ നിന്ന് വീണു; 4 വയസ്സുകാരന് ദാരുണാന്ത്യം

ചെന്നൈ ഐസ് ഹൗസിലുള്ള നിതീഷ് ആണ് മരിച്ചത്. 

ചെന്നൈ: കളിക്കുന്നതിനിടെ ബാൽക്കണിയിൽ നിന്ന് വീണ്‌ 4 വയസ്സുകാരന് ദാരുണാന്ത്യം. ചെന്നൈ ഐസ് ഹൗസിലുള്ള നിതീഷ് ആണ് മരിച്ചത്. ഇരട്ടസഹോദരനൊപ്പം കളിക്കുമ്പോഴാണ് അപകടം. ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ചെന്നൈയിൽ ചായക്കടയിൽ  ജോലി ചെയുന്ന സെൻതമിഴ്- ലക്ഷ്മി ദമ്പതികളുടെ മകൻ ആണ് നിതീഷ്. 

കഴിഞ്ഞ മാസം,  തമിഴ്നാട് സേലത്ത് ക്ലാസ് ലീഡറുടെ കുടിവെള്ളത്തിൽ വിഷം കലക്കിയ സംഭവത്തിൽ എട്ടാം ക്ലാസ് വിദ്യാർഥികൾക്കെതിരെ പൊലീസ് കേസെടുത്തിരുന്നു. സേലം ശങ്ക​ഗിരി സർക്കാർ സ്കൂളിലാണ് സംഭവം. ക്ലാസ് ലീഡർ കുപ്പിയിൽ  കൊണ്ടുവന്ന വെള്ളത്തിലാണ് സഹപാഠികൾ വിഷം കലക്കിയത്. വെള്ളം കുടിക്കുന്നതിനിടെ രുചി വ്യത്യാസം അനുഭവപ്പെട്ടതിനെ തുടർന്ന് കുട്ടി തുപ്പിക്കളഞ്ഞതിനാൽ രക്ഷപ്പെട്ടു. കുട്ടിയെ ആശുപത്രിയിൽ പ്രവേശിപ്പിച്ചു. വെള്ളത്തിന്റെ രുചി വ്യത്യാസം കുട്ടി അധ്യാപികയെ അറിയിച്ചതിനെ തുടർന്നാണ് സംഭവം പുറത്തറിഞ്ഞത്. അധ്യാപികയുടെ ഇടപെടലിൽ വെള്ളം രാസപരിശോധനക്കയച്ചു. പരിശോധനയിൽ വെള്ളത്തിൽ വിഷം കലർന്നതായി കണ്ടെത്തി. തുടർന്ന് പൊലീസിൽ പരാതി നൽകി. പൊലീസ് നടത്തിയ അന്വേഷണത്തിലാണ് സംഭവം പുറത്തറിഞ്ഞത്.

ഹോംവർക്ക് ചെയ്യാതെ വിദ്യാർഥികൾ എത്തിയത് അധ്യാപികയെ അറിയിച്ചതിനെ തുടർന്നുണ്ടായ പകയാണ് വിഷം കലക്കാൻ കാരണമെന്ന് കുട്ടികൾ പൊലീസിനോട് സമ്മതിച്ചു. തിരുച്ചെങ്കോട് സ്വകാര്യ ആശുപത്രിയിലാണ് കുട്ടി ചികിത്സയിലുള്ളത്. രണ്ട് ആൺകുട്ടികൾക്കെതിരെ ഐപിസി സെക്ഷൻ 328  പ്രകാരം കേസെടുത്തതായി പൊലീസ് അറിയിച്ചു.  അച്ഛന്റെ  കൃഷിയിടത്തിൽ നിന്ന് കീടനാശിനി മോഷ്ടിച്ചാണ് ലീഡറുടെ വെള്ളത്തിൽ കലക്കിയതെന്നും വയറിളക്കമുണ്ടാക്കുക എന്നതായിരുന്നു ലക്ഷ്യമെന്നും കസ്റ്റഡിയിലാ‌യ വിദ്യാർഥികൾ പൊലീസിനോട് പറഞ്ഞു. രണ്ട് വിദ്യാർത്ഥികൾക്കും കൗൺസിലിംഗ് നൽകാൻ ചൈൽഡ് വെൽഫെയർ കമ്മിറ്റി ഉദ്യോഗസ്ഥരോട് ആവശ്യപ്പെട്ടതായി ശങ്കഗിരി ഡെപ്യൂട്ടി പൊലീസ് സൂപ്രണ്ട് എസ്.രാജ പറഞ്ഞു. സംഭവത്തിൽ കൂടുതൽ അന്വേഷണം നടന്നുവരികയായിരുന്നു.