മാതാപിതാക്കള്‍ക്കും മൂന്ന് സഹോദരങ്ങള്‍ക്കും ഒപ്പം വീട്ടില്‍ ഉറങ്ങിക്കിടക്കുകയായിരുന്നു കുട്ടി.
ദില്ലി: ദില്ലിയില്‍ മാതാപിതാക്കളുടെ അരികില്‍ ഉറങ്ങിക്കിടക്കുകയായിരുന്ന രണ്ടു മാസം പ്രായമായ ആണ്‍കുട്ടിയെ തട്ടിക്കൊണ്ടു പോയ സംഭവത്തില്‍ പ്രതികള്‍ പിടിയില്‍. കുട്ടിയെ പൊലീസ് രക്ഷപ്പെടുത്തി. മാതാപിതാക്കള്‍ക്കും മൂന്ന് സഹോദരങ്ങള്‍ക്കും ഒപ്പം ഉറങ്ങിക്കിടക്കുകയായിരുന്ന കുട്ടിയെയാണ് വീട്ടില്‍ നിന്നും എടുത്തുകൊണ്ടു പോയത്. പൊലീസ് നടത്തിയ അന്വേഷണത്തില്‍ സിസിടിവി ദൃശ്യങ്ങളുടെ സഹായത്തോടെയാണ് കുട്ടിയെ കണ്ടെത്തിയത്.
ദൃശ്യങ്ങളില്‍,സുരേന്ദ്രര്‍ മെഹ്ത എന്നയാളാണ് കുട്ടിയെ എടുത്തു കൊണ്ട് പോയതെന്ന് വ്യക്തമായിരുന്നു. തുടര്‍ന്ന് നടത്തിയ അന്വേഷണത്തിന് ഒടുവില്‍ ഇയാളെ ദില്ലിയില്‍ നിന്നും പിടികൂടി. എന്നാല്‍ കുട്ടിയെ കണ്ടെത്താന്‍ സാധിച്ചില്ല. പൊലീസ് നടത്തിയ ചോദ്യം ചെയ്യലിനെത്തുടര്‍ന്ന് ഇയാള്‍ കുട്ടിയെ കൈമാറിയ രാഹുല്‍ എന്നയാളെ പിടികൂടുകയും ഇയാളുടെ ഭാര്യയുടെ അടുത്തു നിന്നും കുട്ടിയെ കണ്ടെത്തുകയുമായിരുന്നു.
സുരേന്ദ്രര്‍ മെഹ്തയ്ക്കും ഭാര്യയ്ക്കും കുട്ടികള്‍ ഉണ്ടാകാതിരുന്നതിനെത്തുടര്‍ന്നാണ് ഇവര്‍ സുഹൃത്തിന്‍റെ സഹായത്തോടെ കുട്ടിയെ തട്ടിക്കൊണ്ടു പോയതെന്ന് ചോദ്യം ചെയ്യലില്‍ വ്യക്തമായതായി ദില്ലി പൊലീസ് വെളിപ്പെടുത്തി. പ്രതികളെ പൊലീസ് അറസ്റ്റ് ചെയ്തു.