വനിതാ ഹെൽത്ത് ഇൻസ്പെക്ടറും സ്പായുടെ ബിനാമി ഉടമ; വരുമാനം പങ്കിട്ടു, പെൺകുട്ടിയെ കൊണ്ടുവന്നതും പീഡിപ്പിച്ചതും പ്രതിയുടെ അറിവോടെ

ഹെൽത്ത് ഇൻസ്പെക്ടറായ മായയും കോവളത്തെ സ്പായുടെ ബിനാമി ഉടമയാണെന്ന് പൊലീസ് പറഞ്ഞു. സ്പായുടെ മറ്റൊരു ഉടമയും കേസിലെ പ്രതിയുമായ തിരുവനന്തപുരം ന​ഗരസഭ ഹെൽത്ത് ഇൻസ്പെക്ടർ അനുരൂപിന്റെ സുഹൃത്താണ് മായ. കഴിഞ്ഞ ഒന്നരവർഷമായി അനുരൂപും മായയും സൗഹൃദത്തിലാണ്. ഇരുവരും ചേർന്നാണ് സ്പായ്ക്കായി പണം മുടക്കിയത്.

തിരുവനന്തപുരം: കോവളം സ്പാ പീഡനക്കേസിൽ വനിതാ ഹെൽത്ത് ഇൻസ്പെക്ടറും അറസ്റ്റിൽ. ആന്ധ്രപ്രദേശ് സ്വദേശിയായ പ്രായപൂർത്തിയാകാത്ത പെൺകുട്ടിയെ കോവളത്തെ സ്പായിൽ എത്തിച്ച് പീഡിപ്പിച്ച കേസിലാണ് ന​ഗരൂർ പഞ്ചായത്തിലെ താത്കാലിക ജൂനിയർ ഹെൽത്ത് ഇൻസ്പെക്ടറായ മായ അറസ്റ്റിലായത്. ഇതോടെ കേസിൽ അറസ്റ്റിലായവരുടെ എണ്ണം ആറായി.

ഹെൽത്ത് ഇൻസ്പെക്ടറായ മായയും കോവളത്തെ സ്പായുടെ ബിനാമി ഉടമയാണെന്ന് പൊലീസ് പറഞ്ഞു. സ്പായുടെ മറ്റൊരു ഉടമയും കേസിലെ പ്രതിയുമായ തിരുവനന്തപുരം ന​ഗരസഭ ഹെൽത്ത് ഇൻസ്പെക്ടർ അനുരൂപിന്റെ സുഹൃത്താണ് മായ. കഴിഞ്ഞ ഒന്നരവർഷമായി അനുരൂപും മായയും സൗഹൃദത്തിലാണ്. ഇരുവരും ചേർന്നാണ് സ്പായ്ക്കായി പണം മുടക്കിയത്. സ്പായിൽനിന്നുള്ള വരുമാനവും ഇവർ പങ്കുവെച്ചു. സ്പായിൽനിന്നുള്ള വരുമാനം അനുരൂപ് വഴി മായയുടെ ബാങ്ക് അക്കൗണ്ടിലും എത്തിയിരുന്നു. പെൺകുട്ടിയെ സ്പായിൽ കൊണ്ടുവന്നതും കുട്ടി പീഡനത്തിനിരയായതും മായ അറിഞ്ഞിരുന്നതായും പൊലീസ് പറഞ്ഞു. ഇനി പെൺകുട്ടിയെ എത്തിച്ച ഇടനിലക്കാരെ കൂടി കണ്ടെത്താനുണ്ട്.

ആശയങ്ങളുടെ ഉത്സവം- അഗോറയില്‍ രജിസ്റ്റര്‍ ചെയ്യാൻ ഇവിടെ ക്ലിക് ചെയ്യുക

ആന്ധ്രപ്രദേശ് സ്വദേശിയായ 16-കാരിയാണ് കോവളത്തെ സ്പായിൽ മാസങ്ങളോളം പീഡനത്തിനിരയായത്. പെൺകുട്ടിയെ കാണാനില്ലെന്ന പരാതിയിൽ പൊലീസ് നടത്തിയ അന്വേഷണത്തിലാണ് ഞെട്ടിക്കുന്ന പീഡനവും പുറത്തറിഞ്ഞത്. പെൺകുട്ടിയെ പൊലീസ് കണ്ടെത്തി കോടതിയിൽ ഹാജരാക്കിയപ്പോൾ പരാതിക്കാർ സമർപ്പിച്ച രേഖകളിൽ 20 വയസ്സായിരുന്നു പെൺകുട്ടിയുടെ പ്രായം. എന്നാൽ, ഇതിൽ പൊലീസിന് സംശയം തോന്നി. പെൺകുട്ടി പഠിച്ച സ്കൂളിന്റെ വിലാസം കണ്ടെത്തി അവരിൽനിന്ന് വിവരങ്ങൾ തേടി. ഈ അന്വേഷണത്തിലാണ് പെൺകുട്ടിയുടെ പ്രായം 16 വയസ്സാണെന്ന് തെളിഞ്ഞത്. തുടർന്ന് പെൺകുട്ടിയെ കൗൺസിലിങ്ങിന് വിധേയയാക്കിയതോടെയാണ് പീഡനവിവരം പുറത്തറിഞ്ഞത്. കോവളത്തെ സ്പാ നടത്തിപ്പുകാരായ നിശാന്ത്, സജിത്ത് കുമാർ എന്നിവരാണ് കേസിൽ ആദ്യം അറസ്റ്റിലായത്. ഇതിനുപിന്നാലെയാണ് നിശാന്തിന്റെ സ്പായുടെ ഉടമ ഹെൽത്ത് ഇൻസ്പെക്ടറായ അനുരൂപാണെന്ന് കണ്ടെത്തിയത്. തുടർന്ന് ഇയാളെയും പൊലീസ് പിടികൂടിയിരുന്നു.