എംഎൽഎയുടെ കാറിന്റെ ചില്ല് പൊട്ടിച്ച് ഭാര്യയുടെ ബാ​ഗ് മോഷ്ടിച്ചു, മോഷ്ടാവിനെ തെരഞ്ഞ് പൊലീസ്

ഇന്നോവ കാർ റോഡരികിലെ മരച്ചുവട്ടിൽ നിർത്തി പ്രതിഭയും ഡ്രൈവറും സമീപത്തെ ഹോട്ടലിലേക്ക് പ്രഭാത ഭക്ഷണം കഴിക്കാനായി പോയി. തിരിച്ചെത്തിയപ്പോഴാണ് കാറിന്റെ ചില്ല് കല്ലുകൊണ്ട് തകർത്ത് സീറ്റിൽ വെച്ച ബാ​ഗുമായി മോഷ്ടാവ് കടന്നുകളഞ്ഞത്.

ബെം​ഗളൂരു: കർണാടകയിൽ കോൺ​ഗ്രസ് എംഎൽഎയുടെ കാറിന്റെ ചില്ല് പൊട്ടിച്ച് ഭാര്യയുടെ ബാ​ഗ് കവർന്ന് മോഷ്ടാവ്. ഹോസ്കോ‌ട്ടെ എംഎൽഎ ശരത് കുമാർ ബച്ചെ ​ഗൗഡയുടെ എസ് യു വി കാറിന്റെ ചില്ല് പൊട്ടിച്ചാണ് അകത്തിരുന്ന ബാ​ഗ് മോഷ്ടിച്ചത്. ശരത് കുമാറിന്റെ ഭാര്യ പ്രതിഭ തെരഞ്ഞെടുപ്പ് പ്രചാരണത്തിന് പോകുമ്പോഴാണ് സംഭവം. ഈ സമയം എംഎൽഎ മറ്റൊരു ​ഗ്രാമത്തിൽ തെരഞ്ഞെടുപ്പ് പ്രചാരണത്തിലായിരുന്നു.

രാവിലെ 9.50ഓടെ ഡ്രൈവർ ഇന്നോവ കാർ റോഡരികിലെ മരച്ചുവട്ടിൽ നിർത്തി പ്രതിഭയും ഡ്രൈവറും സമീപത്തെ ഹോട്ടലിലേക്ക് പ്രഭാത ഭക്ഷണം കഴിക്കാനായി പോയി. തിരിച്ചെത്തിയപ്പോഴാണ് കാറിന്റെ ചില്ല് കല്ലുകൊണ്ട് തകർത്ത് സീറ്റിൽ വെച്ച ബാ​ഗുമായി മോഷ്ടാവ് കടന്നുകളഞ്ഞത്. സംഭവം അറിഞ്ഞ് പാർട്ടി പ്രവർത്തകർ സ്ഥലത്ത് തടിച്ചുകൂടി. പൊലീസെത്തിയാണ് ഇവരെ പിരിച്ചുവിട്ടത്. സിസിടിവി പരിശോധനയിൽ 20 വയസ്സ് പ്രായം തോന്നിക്കുന്ന യുവാവ് ബാ​ഗുമായി പോകുന്നത് പതിഞ്ഞിട്ടുണ്ട്. മോഷ്ടാവിനെ പിടികൂ‌ടാൻ പൊലീസ് പ്രത്യേക സംഘത്തെ നിയോ​ഗിച്ചു.