'സർപ്പദോഷത്തിന് പരിഹാരം അവിഹിത ലൈംഗിക ബന്ധം', ആശ്രമത്തിൽ ഭക്തയെ വായിൽ തുണി തിരുകി ബലാത്സംഗം ചെയ്തു, ആരോപണം

രാജസ്ഥാനിലെ ജലോറിലെ ഭഗവാൻ ദത്താത്രേയ ആശ്രമത്തിൽ ഭക്ത ബലാത്സംഗം ചെയ്യപ്പെട്ടതായി ആരോപണം. ആശ്രമത്തിൽ വച്ച് നടത്തിപ്പുകാരിയുടെ സഹായി ക്രൂരമായി ബലാത്സംഗം ചെയ്തുവെന്നാണ് ആരോപണം. ഹേമലത എന്ന സ്ത്രീ നടത്തുന്ന ആശ്രമത്തിലാണ് സംഭവം.  ആശ്രമം പരിപാലകനായ തഗാരം എന്നയാൾക്കും ഇതിന് വഴിയൊരുക്കിയ ഹേമലതയ്ക്കുമെതിരെ പൊലീസ് കേസ്  രജിസ്റ്റർ ചെയ്തു. ജലോർ ജില്ലയിലെ സഞ്ചോറിലെ അർവ ജനിപുര ഗ്രാമത്തിലാണ് ആശ്രമം സ്ഥിതി ചെയ്യുന്നത്.

'സർപ്പദോഷ'ത്തിൽ നിന്ന് രക്ഷപ്പെടാൻ തഗാരവുമായി അവിഹിതബന്ധം സ്ഥാപിക്കാൻ സ്ത്രീയെ ഹേമലത പ്രേരിപ്പിച്ചുവന്നാണ് യുവതി പരാതിയിൽ പറയുന്നത്. തഗറാമുമായി 108 ദിവസം ശാരീരിക ബന്ധം പുലർത്താനും ഹേമലത നിർദേശിച്ചു.  ഭർത്താവിനും കുടുംബത്തിനും സാധ്വി ഹേമലതയിലും ആശ്രമത്തിലും വലിയ വിശ്വാസമായിരുന്നു. ആശ്രമത്തിൽ തന്നെ കൊണ്ടുവന്നതും ഹേമലതെയയും തഗാരത്തെയും പരിചയപ്പെടുത്തിയതും ഭർത്താവായിരുന്നു. സർപ്പ ദോഷമുള്ളതിനാൽ ജീവിത്തിൽ പ്രശ്നങ്ങൾ ഉണ്ടാകുമെന്ന് ഹേമലത പറഞ്ഞു. തുടർന്ന് ഇതിന് പരിഹാരമുണ്ടാക്കാൻ തഗാരത്തെ സമീപിക്കാനും ഹേമലത  നിർദേശിച്ചു. തുടർന്നാണ് തഗാരത്തെ കാണാൻ പോയതെന്നും ഇരയായ യുവതിയുടെ പരാതിയിൽ പറയുന്നു. 

പ്രശ്നങ്ങൾ പരിഹരിക്കാൻ തന്നോടൊപ്പം 108 ദിവസം അവിഹിത ബന്ധത്തിലേർപ്പെടണമെന്നായിരുന്നു തഗാരം യുവതിയോട് ആവശ്യപ്പെട്ടത്. ഒടുവിൽ ഫെബ്രുവരി 19ന് ഹേമലതയും തഗാരവും യുവതിയെ തന്ത്രപരമായി ആശ്രമത്തിലേക്ക് വിളിച്ചുവരുത്തി. തഗാരം ഉണ്ടായിരുന്ന ബേസ്മെന്റ് മുറിയിലേക്ക് ഹേമലത യുവതിയെ കൂട്ടിക്കൊണ്ടുപോയി. അവിടെ വച്ച് ക്രൂരമായി തന്നെ ബലാത്സംഗത്തിനിരയാക്കിയെന്നും പരാതിയിൽ യുവതി പറയുന്നു. ഈ സമയം ഉറക്കെ കരഞ്ഞെങ്കിലും ഹേമലത വായിൽ തുണി തിരുകിക്കയറ്റി വീഡിയോ ചിത്രീകരിക്കുകയും ചെയ്തു. വീഡിയോ ഉപയോഗിച്ച് ഭീഷണിപ്പെടുത്തി. പരാതി നൽകിയാൽ വീഡിയോ പുറത്തുവിടുമെന്ന് നിരന്തരം ഭീഷണിപ്പെടുത്തി. ഒടുവിൽ ജൂലൈ 27ന് ധൈര്യം സംഭരിച്ച് പരാതി നൽകുകയായിരുന്നുവെന്നുമാണ് ഇരയായ യുവതിയുടെ മൊഴി. അന്വേഷണം ആരംഭിച്ച പൊലീസ് ആശ്രമം റെയ്ഡ് ചെയ്യാനുള്ള തയ്യാറെടുപ്പിലാണ്.

അതേസമയം വലിയ കൂട്ടം ആളുകളാണ് ഹേമലതയ്ക്കും ആശ്രമത്തിനും ഭക്തരായുള്ളത്. ഇവിടെയെത്തിയാൽ ദോഷങ്ങൾ മാറുമെന്നും രോഗങ്ങൾ ശമിക്കുമെന്നുമാണ് ഇവർ വിശ്വസിക്കുന്നത്. ഫേസ്ബുക്കിലടക്കം പിന്തുടർച്ചക്കാരുള്ള ഹേമലതയുടെ ആശ്രമം ഏത് വർഷമാണ് തുടങ്ങിയതെന്ന് വ്യക്തതയില്ല. എന്നാൽ കാലങ്ങളായി ആശ്രമം പ്രവർത്തിച്ച് വരുന്നുണ്ടെന്ന് നാട്ടുകാർ പറയുന്നു.