മത്തങ്ങ മോഷ്ടിച്ച് നവദമ്പതികള്‍ക്ക് നല്‍കും, തണ്ടിന്റെ ഭാഗം വധു കഴിക്കണം, ആൺകുഞ്ഞ് പിറക്കും! വിചിത്രമായൊരു വിവാഹാചാരം

മത്തങ്ങ നൽകുന്നത് വധൂവരന്മാർക്ക് ഒരു ആൺകുഞ്ഞ് ജനിക്കുമെന്നതിന്റെ പ്രതീകമായി ജനങ്ങൾ വിശ്വസിച്ചു. മോഷ്ടിച്ചുകൊണ്ടുവരുന്ന മത്തങ്ങകൾ പുതുമണവാട്ടിക്കാണ് നൽകിയിരുന്നത്. അതിൽ മത്തങ്ങയുടെ തണ്ടിന്റെ ഭാഗം വധു കഴിക്കണമെന്നത് നിർബന്ധമായിരുന്നു.

പ്രാചീന ചൈനയിൽ പുതുമണവാളനും മണവാട്ടിക്കും മത്തങ്ങ മോഷ്ടിച്ച് നൽകുന്നത് കുടുംബത്തിന്റെ ഐശ്വര്യത്തിനുള്ള വലിയൊരു അനുഗ്രഹമായി കരുതിയിരുന്നുവെന്ന് ചരിത്രരേഖകൾ. ക്വിംഗ് രാജവംശത്തിന്റെ (1644–1912) കാലത്ത്, ഉത്സവരാത്രികളിൽ യുവാക്കൾ സംഘം ചേർന്ന് കർഷകരുടെ കൃഷിയിടങ്ങളിൽ അതിക്രമിച്ചു കയറി മത്തങ്ങകൾ മോഷ്ടിക്കാറുണ്ടായിരുന്നു. ഇതൊരു തെറ്റായ പ്രവൃത്തിയായി കാണുന്നതിന് പകരം, കർഷകർ പോലും സ്വാഗതം ചെയ്തിരുന്ന ഈ സമ്പ്രദായം റിപ്പബ്ലിക്കൻ യുഗത്തോടെ (1912–1949) ഗ്രാമീണ മേഖലകളിൽ വലിയ തോതിൽ പ്രചരിച്ചു.

എന്തുകൊണ്ട് ഈ ആചാരം?

ചൈനീസ് ഭാഷയിൽ 'മത്തങ്ങ' എന്നതിനെ സൂചിപ്പിക്കുന്ന വാക്കിന് 'മകൻ' എന്ന വാക്കുമായി ഉച്ചാരണത്തിൽ വലിയ സാമ്യമുണ്ട്. അതിനാൽ മത്തങ്ങ നൽകുന്നത് വധൂവരന്മാർക്ക് ഒരു ആൺകുഞ്ഞ് ജനിക്കുമെന്നതിന്റെ പ്രതീകമായി ജനങ്ങൾ വിശ്വസിച്ചു. മോഷ്ടിച്ചുകൊണ്ടുവരുന്ന മത്തങ്ങകൾ പുതുമണവാട്ടിക്കാണ് നൽകിയിരുന്നത്. അതിൽ മത്തങ്ങയുടെ തണ്ടിന്റെ ഭാഗം വധു കഴിക്കണമെന്നത് നിർബന്ധമായിരുന്നു. വടക്കൻ ചൈനയിലെ ചില പ്രദേശങ്ങളിൽ ഭാവിതലമുറകൾക്ക് ഐശ്വര്യവും സൗഭാഗ്യവും ലഭിക്കുന്നതിനായി നവദമ്പതികളുടെ മെത്തയ്ക്ക് താഴെ മത്തങ്ങ വയ്ക്കുന്ന രീതിയും നിലവിലുണ്ടായിരുന്നു.

മത്തങ്ങയുടെ വേഗത്തിലുള്ള വളർച്ചയും അതിനുള്ളിലെ ധാരാളം വിത്തുകളുമാണ് 'ധാരാളം മക്കളും അനുഗ്രഹങ്ങളും' ലഭിക്കുമെന്ന സങ്കൽപ്പത്തിലേക്ക് ചൈനക്കാരെ എത്തിച്ചതെന്ന് കാർഷിക ചരിത്രകാരനായ ലി സിൻഷെങ് ചൂണ്ടിക്കാണിക്കുന്നു. പതിനേഴാം നൂറ്റാണ്ടിൽ മത്തങ്ങ ചൈനയിൽ എത്തുന്നതിന് മുമ്പ് മറ്റ് വെള്ളരി വർഗ്ഗത്തിൽപ്പെട്ട ഫലങ്ങളാണ് ഈ ആചാരത്തിനായി ഉപയോഗിച്ചിരുന്നതെന്നും അദ്ദേഹം വ്യക്തമാക്കുന്നു.

കാലവും സംസ്കാരവും എത്രതന്നെ മാറിയാലും, സ്വന്തം കുടുംബത്തിന്റെ ഐശ്വര്യത്തിനും സന്താനസൗഭാഗ്യത്തിനും വേണ്ടിയുള്ള മനുഷ്യന്റെ ആഗ്രഹങ്ങൾക്ക് ചരിത്രത്തോളം തന്നെ പഴക്കമുണ്ടെന്ന് ഈ ആചാരം വ്യക്തമാക്കുന്നു.