ഐഐടി പാലക്കാടുമായി സഹകരിച്ച് ഐസിടി അക്കാദമിയുടെ എഐ-എംഎൽ പരിശീലനം; ഇപ്പോൾ അപേക്ഷിക്കാം

വാരാന്ത്യങ്ങളിൽ നടക്കുന്ന ഓൺലൈൻ ലൈവ് ക്ലാസുകളായാണ് ആറുമാസം ദൈർഘ്യമുള്ള ഈ പ്രോഗ്രാം ക്രമീകരിച്ചിരിക്കുന്നത്.

തിരുവനന്തപുരം: കേരള സർക്കാർ പിന്തുണയോടെ ടെക്‌നോപാർക്ക് ആസ്ഥാനമായി പ്രവർത്തിക്കുന്ന ഐസിടാക്ക് (ഐ.സി.ടി. അക്കാദമി ഓഫ് കേരള), ഐഐടി പാലക്കാട് ടെക്നോളജി ഐഹബ് ഫൗണ്ടേഷനുമായി (IPTIF) സഹകരിച്ച് 'എക്സിക്യൂട്ടീവ് പ്രോഗ്രാം ഇൻ അഡ്വാൻസ്ഡ് എ.ഐ-എം.എൽ' (Executive Program in Advanced AI-ML) എന്ന പ്രോഗ്രാമിന്‍റെ രണ്ടാമത്തെ ബാച്ചിലേയ്ക്കുള്ള അപേക്ഷ ക്ഷണിച്ചു.

വാരാന്ത്യങ്ങളിൽ നടക്കുന്ന ഓൺലൈൻ ലൈവ് ക്ലാസുകളായാണ് ആറുമാസം ദൈർഘ്യമുള്ള ഈ പ്രോഗ്രാം ക്രമീകരിച്ചിരിക്കുന്നത്. പൈത്തൺ, മെഷീൻ ലേണിംഗ്, ഡീപ് ലേണിംഗ്, കമ്പ്യൂട്ടർ വിഷൻ, നാച്ചുറൽ ലാംഗ്വേജ് പ്രോസസ്സിംഗ് (NLP), ജനറേറ്റീവ് എ.ഐ, ഏജന്റിക് എ.ഐ തുടങ്ങി ആർട്ടിഫിഷ്യൽ ഇന്റലിജൻസ് മേഖലയിലെ നൂതന സാങ്കേതികവിദ്യകളിൽ പരിശീലനം നൽകി മികച്ച പ്രൊഫഷണലുകളെ വാർത്തെടുക്കുക എന്നതാണ് ഈ കോഴ്സിന്റെ ലക്ഷ്യം.

അർഹരായ വിദ്യാർത്ഥികൾക്കും ഉദ്യോഗാർത്ഥികൾക്കും കോഴ്സ് ഫീസിൽ ഇളവ് ലഭ്യമാക്കുന്നതിനായി പ്രത്യേക സ്കോളർഷിപ്പ് ടെസ്റ്റും ഐസിടാക്ക് നടത്തുന്നുണ്ട്. ഈ സ്കോളർഷിപ്പ് പരീക്ഷയിൽ യോഗ്യത നേടുന്നവർക്ക് ആകർഷകമായ ഫീസിളവുകളോടെ പ്രോഗ്രാമിൽ പങ്കെടുക്കാം.

കോഴ്സ് വിജയകരമായി പൂർത്തിയാക്കുന്നവർക്ക് ഐ.ഐ.ടി. പാലക്കാട് ക്യാമ്പസ്സിൽ അഞ്ചുദിവസം നടക്കുന്ന പ്രത്യേക പരിശീലനത്തില്‍ പങ്കെടുക്കാം. കരിയർ മെച്ചപ്പെടുത്തുന്നതിനായി വ്യവസായ പ്രമുഖരുടെ മാർഗ്ഗനിർദ്ദേശങ്ങളും പ്ലേസ്മെൻ്റ് പിന്തുണയും ഈ പ്രോഗ്രാമിലൂടെ ഉറപ്പാക്കുന്നു. തുടർപഠനത്തിനായി 9 മാസത്തെ ലിങ്ക്ഡ്ഇൻ ലേണിംഗ് (LinkedIn Learning) പ്രീമിയം ആക്സസും ലഭിക്കുന്നതാണ്.

കമ്പ്യൂട്ടറിലും സ്റ്റാറ്റിസ്റ്റിക്സിലും പ്രാവീണ്യമുള്ള ഏതെങ്കിലും വിഷയത്തിൽ ബിരുദം നേടിയവർക്കും, എ.ഐ/എം.എൽ (AI/ML) മേഖലയിൽ വൈദഗ്ദ്ധ്യം നേടാൻ ആഗ്രഹിക്കുന്ന ഐ.ടി. പ്രൊഫഷണലുകൾക്കും കോഴ്സിലേക്ക് അപേക്ഷിക്കാം. താല്പര്യമുള്ള വിദ്യാർത്ഥികളും ഉദ്യോഗാർത്ഥികളും 2026 ഒക്ടോബര്‍ 02-ന് മുൻപായി അപേക്ഷ സമർപ്പിക്കേണ്ടതാണ്. കോഴ്സുകളെക്കുറിച്ചുള്ള കൂടുതൽ വിവരങ്ങൾക്ക് +91 7594051437, 471 2700811 എന്നീ നമ്പറുകളിലോ info@ictkerala.org എന്ന ഇമെയിൽ വിലാസത്തിലോ ബന്ധപ്പെടാവുന്നതാണ്. വിശദവിവരങ്ങൾക്കും അപേക്ഷ സമർപ്പിക്കാനും https://ictkerala.org/op/iptppr01 എന്ന വെബ്സൈറ്റ് സന്ദർശിക്കുക.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക