അപ്രതീക്ഷിതം, വോട്ട് കിട്ടിയിട്ടും ആ മത്സരാര്‍ഥി ബിഗ് ബോസില്‍ നിന്ന് പുറത്ത്, വിധി പ്രഖ്യാപിച്ച് മോഹൻലാല്‍

ബിഗ് ബോസില്‍ അപ്രതീക്ഷിത പുറത്താകല്‍.

ബിഗ് ബോസ് മലയാളം ഷോ സീസണ്‍ ഏഴ് പ്രഖ്യാപിച്ചതു മുതല്‍ പ്രഡിക്ഷൻ ലിസ്റ്റിലുണ്ടായിരുന്ന ഒരാളായിരുന്നു രേണു സുധി. പ്രതീക്ഷിച്ച പോലെ രേണു സുധി ബിഗ് ബോസ് മത്സരാര്‍ഥിയാകുകയും ചെയ്‍തു. എന്നാല്‍ ഇന്ന് അപ്രതീക്ഷിതമായി രേണു സുധിക്ക് പുറത്തുപോകേണ്ടി വന്നിരിക്കുകയാണ്. രേണു സുധിയുടെ നിരന്തരമായ അഭ്യര്‍ഥന പ്രകാരം ബിഗ് ബോസ് അവരെ പോകാൻ അനുവദിക്കുകയായിരുന്നു. നല്ല വോട്ടിംഗ് ഉള്ളയാളായിരുന്നു രേണു സുധിയെന്ന് മോഹൻലാല്‍ പറയുകയും ചെയ്‍തു. എന്നാല്‍ സ്വയം പുറത്തുപോകാൻ അഭ്യര്‍ഥിച്ചതു പ്രകാരം രേണു സുധിയെ അനുവദിക്കുകയായിരുന്നു. ഓണപ്പരിപാടികള്‍ കാണാൻ ബിഗ് ബോസ് വീട്ടില്‍ എത്തിയ മോഹൻലാല്‍ രേണു സുധിയുടെ വിധി പ്രഖ്യാപിക്കുകയായിരുന്നു. രേണു സുധിയോട് തനിക്ക് ഒപ്പം വീടിനു പുറത്തേയ്‍ക്ക് വരാൻ മോഹൻലാല്‍ ആവശ്യപ്പെടുകയുമായിരുന്നു.

ആരാണ് രേണു സുധി?

അന്തരിച്ച മിമിക്രി കലാകാരൻ കൊല്ലം സുധിയുടെ ഭാര്യ എന്ന നിലയ്‍ക്കാണ് രേണുവിന്റെ പ്രേക്ഷകര്‍ ആദ്യം പരിചയപ്പെടുന്നത്. എന്നാല്‍ ഇന്ന് സ്വന്തമായ മേല്‍വിലാസത്തോടെയാണ് രേണു സുധി ബിഗ് ബോസ് വീട്ടിലേക്ക് എത്തിയിരുന്നത്. സോഷ്യൽ മീഡിയയിൽ സമീപകാലത്ത് ഏറെ ശ്രദ്ധനേടിയ ആളാണ് രേണു സുധി. അഭിനയരംഗത്തും വളരെ സജീവമാണ് രേണു സുധി.

സുധിയുടെ മരണ ശേഷം അഭിനയവും മോഡലിങ്ങുമൊക്കെയായി മുന്നോട്ട് പോകുന്നതിന്റെ പേരില്‍ പലപ്പോഴും രേണുവിന് വിമർശനങ്ങൾ കേൾക്കേണ്ടി വന്നിട്ടുണ്ട്. ബോഡി ഷെയ്‍മിം​ഗ് അടക്കം നേരിടുന്ന രേണു പക്ഷേ ഇവയോടൊന്നും ആദ്യമൊന്നും പ്രതികരിച്ചിരുന്നില്ല. പിന്നീട് തക്ക മറുപടി നൽകാറുണ്ട്. ഇതിന്റെ പേരിലും വലിയ രീതിയിൽ ട്രോളുകൾ രേണുവിന് നേരിടേണ്ടി വന്നിട്ടുണ്ട്. ചാന്തുപൊട്ടിലെ ഒരു ഗാനത്തിന് ദാസേട്ടൻ കോഴിക്കോടിനൊപ്പം റീല്‍ ചെയ്‍തതിനും രേണു സുധി വിമര്‍ശിക്കപ്പെട്ടിരുന്നു. ഇതെല്ലാം ഒരു വഴിക്ക് നടക്കുമ്പോൾ ​ഗായികയായും അരങ്ങേറാൻ ഒരുങ്ങുകയാണ് രേണു സുധി. ‘അവൻ അഭയകുമാർ’ എന്ന സിനിമയിലാണ് രേണു സുധി പാടുന്നത്. നേരത്തെ തന്റെ യുട്യൂബ് ചാനലിൽ പങ്കുവച്ച ആദ്യ വീഡിയോയിൽ രേണു ഒരു പാട്ട് പാടിയിരുന്നു. ഇത് വലിയ ശ്രദ്ധ നേടിയിരുന്നു. രേണു സുധി അഭിനയിച്ച് ഒരു സിനിമ അടുത്തിടെ യൂട്യൂബില്‍ റിലീസാകുകയും ചെയ്‍തിരുന്നു. വേര് എന്നാണ് ചിത്രത്തിന്റെ പേര്. നേരത്തെ ജീവിതത്തിലെ ആദ്യ അവാര്‍ഡും രേണു സുധി സ്വന്തമാക്കിയിരുന്നു. ഗുരുപ്രിയ ഷോർട് ഫിലിം ഫെസ്റ്റ് 2025 ന്‍റെ പുരസ്കാരമാണ് രേണുവിന് ലഭിച്ചത്. കരിമിഴി കണ്ണാൽ എന്ന ആല്‍ബത്തിന്‍റെ പ്രകടനത്തിന് രേണുവിനും നടന്‍ പ്രജീഷിനും മികച്ച താര ജോഡികൾക്കുള്ള പുരസ്‍കാരം ആയിരുന്നു കിട്ടിയത്. അടുത്തിടെ റാമ്പിലും ചുവടുവെച്ചിരുന്നു രേണു സുധി.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക