അനുവാദമില്ലാതെ ​ഗാനങ്ങൾ ഉപയോ​ഗിച്ചു, നഷ്ടപരിഹാ​രം 2 കോടി; ബി​ഗ് ബോസ് ഹിന്ദിക്ക് നിയമകുരുക്ക്- റിപ്പോർട്ട്

ഓ​ഗസ്റ്റ് 24ന് ആയിരുന്നു ബി​ഗ് ബോസ് ഹിന്ദി സീസൺ 19 ആരംഭിച്ചത്. തുടർച്ചയായി 16-ാം തവണയാണ് സൽമാൻ ഖാൻ ബി​ഗ് ബോസിന്റെ അവതാരകനായി എത്തുന്നത്.

ഇന്ത്യൻ ടെലിവിഷൻ ചരിത്രത്തിലെ ഏറ്റവും വലിയ റിയാലിറ്റി ഷോയാണ് ബി​ഗ് ബോസ്. വിവിധ മേഖലകളിലുള്ള ഒരു കൂട്ടം മത്സരാർത്ഥികളെ ഒരു വീട്ടിൽ പുറംലോകവുമായി യാതൊരുവിധ ബന്ധവുമില്ലാതെ താമസിപ്പിക്കുന്നു. ഈ ഹൗസിൽ നടക്കുന്ന പലതരം പ്രശ്നങ്ങളും ടാസ്കുകളും പ്രേക്ഷക വോട്ടിങ്ങുമെല്ലാം നേടി മുന്നേറുന്ന ഒരാൾ ബി​ഗ് ബോസ് ടൈറ്റിൽ വിന്നറാകും. നിലവിൽ ഇന്ത്യയിലെ വിവിധ ഭാഷകളിൽ ബി​ഗ് ബോസ് ഷോ നടക്കുന്നുണ്ട്. സീസൺ 7 ആണ് മലയാളത്തിൽ നടക്കുന്നത്. ഏറ്റവും ജനപ്രീതിയുള്ളതും ഏറ്റവും കൂടുതൽ സീസണുകളും പിന്നിട്ട ബി​ഗ് ബോസ് ഷോ ഹിന്ദിയുടേതാണ്. സൽമാൻ ഖാൻ ആണ് ​ഹിന്ദി ബി​ഗ് ബോസിൽ അവതാരകനായി എത്തുന്നത്.

നിലവിൽ ബി​ഗ് ബോസ് ഹിന്ദി സീസൺ 19 ആണ് നടക്കുന്നത്. ഇതിനിടെ ഷോ ഇപ്പോൾ നിയമക്കുരുക്കിൽ അകപ്പെട്ടുവെന്ന റിപ്പോർട്ടുകളാണ് പുറത്തുവരുന്നത്. പകർപ്പവകാശ ലംഘനത്തിന്റെ പേരിൽ ബി​ഗ് ബോസ് അധികൃതർക്ക് വക്കീൽ നോട്ടീസ് അയച്ചുവെന്നാണ് വിവിധ ഉറവിടങ്ങളെ ഉദ്ധരിച്ച് എൻഡിടിവി റിപ്പോർട്ട് ചെയ്യുന്നത്. അനുവാദമില്ലാതെ രണ്ട് ​ഗാനങ്ങൾ ബി​ഗ് ബോസ് ഷോയിൽ പ്ലേ ചെയ്തതിനാണ് നോട്ടീസ്. പകർപ്പവകാശം ലംഘിച്ചതിന് രണ്ട് കോടി രൂപ നഷ്ട പരിഹാരം നൽകണമെന്നും ഇവർ ആവശ്യപ്പെട്ടിട്ടുണ്ട്.

അഗ്നിപഥിലെ 'ചിക്‌നി ചമേലി', ഗോരി തേരി പ്യാർ മേയിലെ 'ധത് തേരി കി മൈൻ' എന്നി ​ഗാനങ്ങളാണ് അനുവാദമില്ലാതെ ഷോയിൽ ഉപയോ​ഗിച്ചതെന്നാണ് റിപ്പോർട്ട്. ബി​ഗ് ബോസ് ഹിന്ദി സീസൺ 19ലെ പതിനൊന്നാമത്തെ എപ്പിസോഡിലായിരുന്നു ഈ ​ഗാനങ്ങൾ ഉപയോ​ഗിച്ചതെന്നും റിപ്പോർട്ടുണ്ട്. ഓ​ഗസ്റ്റ് 24ന് ആയിരുന്നു ബി​ഗ് ബോസ് ഹിന്ദി സീസൺ 19 ആരംഭിച്ചത്. തുടർച്ചയായി 16-ാം തവണയാണ് സൽമാൻ ഖാൻ ബി​ഗ് ബോസിന്റെ അവതാരകനായി എത്തുന്നത്. തന്യ മിത്തൽ, അമാൽ മല്ലിക്, കുനിക്ക സദാനന്ദ്, ഗൗരവ് ഖന്ന എന്നിവരാണ് ഷോയിലെ ശ്രദ്ധേയരായ മത്സരാർത്ഥികൾ.