ഇന്റിമേറ്റ് സീനുകൾ അഭിനയിക്കുന്ന ആണുങ്ങളോട് എന്താ ചോദ്യമില്ലാത്തത് ? 'പണി'യിലെ സ്നേഹ ചോദിക്കുന്നു

പണിയിൽ ​ഗംഭീര പ്രകടനം കാഴ്ച വച്ച രണ്ട് പേരായിരുന്നു സാ​ഗർ സൂര്യയും ജുനൈസും.

മലയാളത്തിന്റെ പ്രിയ താരം ജോജു ജോർജ് ആദ്യമായി സംവിധാനം ചെയ്ത ചിത്രമാണ് പണി. റിലീസ് ദിനം മുതൽ മികച്ച പ്രേക്ഷക സ്വീകാര്യത ലഭിച്ച ചിത്രം ബോക്സ് ഓഫീസിലും മിന്നും പ്രകടനം കാഴ്ചവച്ചിരുന്നു. നിലവിൽ ഒടിടിയിൽ സ്ട്രീമിം​ഗ് തുടരുന്ന സിനിമയിലെ ഓരോ കഥാപാത്രവും ശ്രദ്ധനേടിയിരുന്നു. അതിലൊരാളാണ് സ്നേഹ. മെർലെറ്റ് ആൻ തോമസ് എന്നാണ് നടിയുടെ പേര്. 

പ്രതിനായക വേഷം ചെയ്ത സാ​ഗർ സൂര്യയുടെ പെയർ ആയിട്ട് അഭിനയിച്ച നടിയാണ് മെർലെറ്റ് ആൻ തോമസ്. ഡെന്റിസ്റ്റ് ആയി ജോലി ചെയ്യുന്ന ആൻ, ജോലിയിൽ നിന്നും ബ്രേക്ക് എടുത്തായിരുന്നു സിനിമയിൽ അഭിനയിച്ചത്. ഏറെ ചലഞ്ചിം​ഗ് ആയൊരു കഥാപാത്രമായിരുന്നു സ്നേ​ഹ എന്നാണ് ആൻ പറയുന്നത്. 

"എന്റെ നാലാമത്തെ സിനിമയാണ് പണി. അതൊരു അഡാറ് പണി തന്നെയാണ്. വ്യക്തിപരമായി ചാലഞ്ചിം​ഗ് ആയിട്ടുള്ള കഥാപാത്രം ആയിരുന്നു സ്നേഹ. ന്യൂജെൻ ​ഗേൾ ഫ്രണ്ട് ആണ് ഞാൻ. ഇപ്പോഴുള്ള സമൂഹത്തിലെ ഒരു പെൺകുട്ടി. ഈ സിനിമ കാണുമ്പോൾ ആൻ ആയിട്ട് കാണരുത് സ്നേഹ എന്ന കഥാപാത്രമായിട്ട് കാണണം എന്ന് എന്റെ അച്ഛനോടും അമ്മയോടും ഞാൻ പറഞ്ഞിരുന്നു. അത് മനസിലുണ്ടാവണം എന്ന് പറഞ്ഞു. ആരും നിർബന്ധിച്ചിട്ടില്ല ഇന്റിമേറ്റ് സീനിൽ അഭിനയിച്ചത്. ആ കഥാപത്രത്തിന് ആവശ്യമായത് കൊണ്ടാണ് ആ സീനുകളിൽ അഭിനയിച്ചത്. ഇന്റിമേറ്റ് സീനുകളിൽ അഭിനയിക്കുമ്പോൾ എന്തുകൊണ്ട് എന്നോട് ചോദിച്ച ചോദ്യം ആണുങ്ങളോട് ചോദിക്കുന്നില്ല. അവർക്കും ഇല്ലെ ഫാമിലിയും സുഹൃത്തുക്കളുമൊക്കെ. ആക്ടിം​ഗ് ഒരു പ്രൊഫഷനാണ്. എന്റെ കൺഫേർട്ട് സോൺ വിട്ട് ചെയ്ത പടമാണ്", എന്നായിരുന്നു ആനിന്റെ വാക്കുകൾ. സില്ലി മോങ് മോളിവുഡിനോട് ആയിരുന്നു നടിയുടെ പ്രതികരണം. 

പണിയിൽ ​ഗംഭീര പ്രകടനം കാഴ്ച വച്ച രണ്ട് പേരായിരുന്നു സാ​ഗർ സൂര്യയും ജുനൈസും. നായകനെക്കാൾ ഇവരുടെ ഡോൺ, സിജു എന്നീ കഥാപാത്രങ്ങൾക്ക് ആരാധകരും പ്രശംസയും ഏറെ ആയിരുന്നു. പകയുടെ കഥ പറഞ്ഞ ചിത്രത്തിൽ കേന്ദ്രകഥാപാത്രമായെത്തിയത് ജോജു ജോർജ് തന്നെ ആണ്. 

ഏഷ്യാനെറ്റ് ന്യൂസ് തത്സമയ വാർത്തകൾ അറിയാം..