എന്താ മോനെ മാർക്കോ..; മോഹൻലാലിനെ കണ്ട് ഉണ്ണി മുകുന്ദൻ, ആരാധകരിൽ ആവേശം തീർത്ത് ഫോട്ടോകൾ

മോഹന്‍ലാലിനൊപ്പം ഉണ്ണി മുകുന്ദന്‍. 

മോഹൻലാലിനെ കാണാൻ എത്തി നടൻ ഉണ്ണി മുകുന്ദൻ. നടൻ തന്നെയാണ് മോഹൻലാലിനൊപ്പമുള്ള ഫോട്ടോകൾ സോഷ്യൽ മീഡിയയിൽ പങ്കുവച്ചിരിക്കുന്നത്. 'എൽ' എന്ന് മാത്രമാണ് ഫോട്ടോയ്ക്ക് ഉണ്ണി മുകുന്ദൻ കൊടുത്ത ക്യാപ്ഷൻ. വളരെ കൂൾ ലുക്കിൽ ഉള്ള ഇവരുടെ ഫോട്ടോകൾ ആരാധകരിൽ ആവേശം തീർത്തിരിക്കുകയാണ് ഇപ്പോൾ. പ്രേക്ഷക സ്വീകാര്യത നേടി മാര്‍ക്കോ ചിത്രം പ്രദര്‍ശനം തുടരുന്നതിനിടെയാണ് മോഹന്‍ലാല്‍- ഉണ്ണി മുകുന്ദന്‍ മീറ്റപ്പ് എന്നത് ഏറെ ശ്രദ്ധേയമാണ്.

ഫോട്ടോകള്‍ പുറത്തുവന്നിതിന് പിന്നാലെ കമന്‍റുകളുമായി ആരാധകരും രംഗത്തെത്തി. മോഹന്‍ലാലും ഉണ്ണി മുകുന്ദനും ഒന്നിക്കുന്ന സിനിമ കാണാന്‍ കാത്തിരിക്കുന്നവരും ഇക്കൂട്ടത്തിലുണ്ട്. 'എക്സലന്‍റ് മീറ്റിംഗ്, രണ്ടുപേരും കൂടെ ഒരു ഫ്രെമിൽ ആക്ഷൻ പടവും ആയി കാണാൻ ഒരു ആഗ്രഹം, ഈ രണ്ട് മുതലുകളെയും ചുമ്മാ അങ്ങ് കണ്ടിരിക്കാൻ തന്നെ എന്ത് രസമാ, ലാലേട്ടൻ വേറേ ലെവൽ, ചേട്ടനും അനിയനും, ഒരു ആക്ഷൻ പടം അങ്ങ് സെറ്റ് ചെയ്യ് അണ്ണാ', എന്നിങ്ങനെ പോകുന്നു കമന്‍റുകള്‍.

കഴിഞ്ഞ വര്‍ഷം ഡിസംബറില്‍ ക്രിസ്മസ് റിലീസായി തിയറ്ററുകളില്‍ എത്തിയ സിനിമയാണ് മാര്‍ക്കോ. ഉണ്ണി മുകുന്ദന്‍റെ കരിയറിലെ നാഴിക കല്ലായി മാറിയ ചിത്രം, മലയാളത്തിലെ മോസ്റ്റ് വയലന്‍റ് ചിത്രം എന്ന ലേബലില്‍ ആയിരുന്നു തിയറ്ററുകളില്‍ എത്തിയത്. റിലീസ് ദിനം മുതല്‍ മികച്ച പ്രേക്ഷക സ്വീകാര്യത നേടിയ ചിത്രം 100 കോടി ക്ലബ്ബും പിന്നിട്ട് തിയറ്ററുകളില്‍ പ്രദര്‍ശനം തുടരുകയാണ് ഇപ്പോള്‍. കേളത്തില്‍ മാത്രമല്ല ബോളിവുഡില്‍ വലിയ സ്വീകാര്യത മാര്‍ക്കോയ്ക്ക് ലഭിച്ചിരുന്നു. കേരളത്തിന് പുറമെ ചിത്രത്തിന് ഏറ്റവും കൂടതല്‍ കളക്ഷന്‍ ലഭിച്ചതും ഇവിടെ നിന്നാണ്.

അതേസമയം, മലയാളത്തില്‍ ആദ്യമായി ഒരു എ സര്‍ട്ടിഫിക്കറ്റ് പടം 100 കോടി ക്ലബ്ബിലെത്തുന്നത് എന്ന പ്രത്യേകതയും മാര്‍ക്കോയ്ക്ക് ഉണ്ട്. ഹനീഫ് അദേനി എഴുതി, സംവിധാനം നിര്‍വഹിച്ച ചിത്രം കൊറിയയില്‍ റിലീസ് ചെയ്യാന്‍ തയ്യാറെടുക്കുകയാണ്.  ഏപ്രിലില്‍ ആണ് ചിത്രത്തിന്‍റെ കൊറിയന്‍ റിലീസ്. 

ഏഷ്യാനെറ്റ് ന്യൂസ് തത്സമയ വാർത്തകൾ അറിയാം..