ആ സിനിമയ്ക്ക് വേണ്ടി തടി കുറച്ചു, എന്നിട്ടും അതിൽ നിന്നും ഒഴിവാക്കി; ഗർഭിണിയായിരുന്നപ്പോൾ സ്വർണ്ണക്കടയുടെ ഉദ്ഘാടനത്തിൽ നിന്നും മാറ്റി: ഐമ റോസി

Actress Aima Rosy reveals about the bad experience from malayalam cinema industry ചലച്ചിത്രമേഖലയിൽ നിന്ന് കടുത്ത അവഗണനകൾ നേരിട്ടിട്ടുണ്ടെന്ന് നടി ഐമ റോസി. ഒരു സിനിമയ്ക്കായി കഠിനാധ്വാനം ചെയ്ത് തടി കുറച്ചതിന് ശേഷം, അതേ കാരണം പറഞ്ഞ് തന്നെ ഒഴിവാക്കിയെന്ന് ഐമ റോസി പറയുന്നു. 

ജേക്കബിന്റെ സ്വർഗ്ഗരാജ്യം, മുന്തിരിവള്ളികൾ തളിർക്കുമ്പോൾ, പടയോട്ടം, ആർ.ഡി.എക്സ് എന്നീ ചിത്രങ്ങളിലൂടെ ശ്രദ്ധേയയായ താരമാണ് ഐമ റോസി. ഇപ്പോഴിതാ സിനിമയിൽ നിന്നും തനിക്ക് അവഗണനകൾ നേരിട്ടിട്ടുണ്ടെന്ന് തുറന്നുപറഞ്ഞിരിക്കുകയാണ് ഐമ റോസി. വളരെ മോശമായിരുന്നു ആ അനുഭവങ്ങളെന്നും, ഒരു സിനിമയ്ക്ക് വേണ്ടി തടി കുറച്ചതിന് ശേഷം തന്നെ ആ സിനിമയിൽ നിന്നും പുറത്താക്കിയെന്നും ഐമ റോസി പറയുന്നു. മുൻപൊന്നും സിനിമയിൽ രൂപത്തിന്റെ പേരിൽ ആരെയും സിനിമകളിൽ നിന്നും ഒഴിവാക്കിയിട്ടില്ലെന്നും, ഇന്ന് അവസ്ഥ മാറിയെന്നും ഐമ റോസി കൂട്ടിച്ചേർത്തു.

"ഇന്‍ഡസ്ട്രിയില്‍ നിന്നും അവഗണനകള്‍ നേരിട്ടിട്ടുണ്ട്. വളരെ മോശമായിരുന്നു അനുഭവങ്ങള്‍. അത് എന്നെ കുറച്ച് വിഷാദത്തിലാക്കി. കാരണം ആ സിനിമയ്ക്കായി ഞാന്‍ ഒരുപാട് പണിയെടുത്തിരുന്നു. പെട്ടെന്ന് ഒരുനാള്‍ അവര്‍ എന്നോട് പറയുകയാണ്, നിനക്ക് ഭയങ്കര തടിയാണ് എന്ന്. ആ സിനിമയ്ക്കായി അത്രയും വണ്ണം കുറച്ച ശേഷമാണ് അവര്‍ എന്നെ മാറ്റുന്നത്. ഞാന്‍ ശരിക്കും ഡിപ്രഷനിലായേനെ. അത്രയും കഠിനാധ്വനം ചെയ്തിട്ട് തിരിച്ചടി കിട്ടുമ്പോള്‍ കുറച്ചൊക്കെ മയത്തിലാകാം പറയുന്നത് എന്ന് തോന്നി. നിരസിക്കുന്നതിനും ഒരു രീതിയുണ്ട്. അതൊന്നുമില്ല. നിനക്ക് തടിയാണ്, നീ വെളുത്തിട്ടാണ് എന്ന് പറയും.കറുപ്പും വെളുപ്പും ഇപ്പോഴുമുണ്ട്. എനിക്കത് അതിനോട് യോജിപ്പില്ല. അത് കേള്‍ക്കുമ്പോള്‍ ദേഷ്യം വരും. പണ്ടത്തെ കാലത്ത് സിനിമയെടുത്ത് നോക്കുമ്പോള്‍ 20 കളിലുള്ളവരായി അഭിനയിക്കുന്നവരെ കണ്ടാല്‍ 20 കളിലാണെന്ന് തോന്നില്ല." ഐമ റോസി പറയുന്നു.

‘ഗര്‍ഭിണി സ്വര്‍ണമിട്ട് ഫോട്ടോ എടുക്കണ്ട’

"അന്നൊന്നും രൂപത്തിന്റെ പേരില്‍ ആരേയും തള്ളിക്കളഞ്ഞിട്ടില്ല. പക്ഷെ ഇന്നത്തെ അവസ്ഥ അങ്ങനെയല്ല. ഒരു മയവുമില്ലാതെയാണ് അവര്‍ പറയുക. മറ്റൊരാളെ വേദനിപ്പിക്കുന്നുണ്ടോ എന്നൊന്നും ചിന്തിക്കാതെയാണ് പറയുന്നത്. തീരെ സഹിക്കാന്‍ പറ്റാത്തൊരു അനുഭവമുണ്ട്. എനിക്കൊരു സ്വര്‍ണക്കടയുടെ ഉദ്ഘാടനം ലഭിച്ചു. മറ്റാര്‍ക്കും ഒരു പ്രശ്‌നവുമുണ്ടായിരുന്നില്ല. പക്ഷെ ഒരു സ്ത്രീ പറഞ്ഞത് നീ ഗര്‍ഭിണിയാണ് അതിനാല്‍ നിന്നെ എടുക്കാനാകില്ല എന്നായിരുന്നു. ഒരു പെണ്ണാണ് എന്നോടത് പറഞ്ഞത്. ഗര്‍ഭിണി സ്വര്‍ണമിട്ട് ഫോട്ടോ എടുക്കണ്ട എന്ന്. നിങ്ങള്‍ ഗര്‍ഭിണിയാണ്, നിങ്ങള്‍ ഞങ്ങളുടെ സ്വര്‍ണമിടുന്നതിനോട് ഞങ്ങള്‍ക്ക് താല്‍പര്യമില്ലെന്ന് പറഞ്ഞു. ആ സമയത്ത് ഗര്‍ഭിണി ആയിരുന്നതിനാല്‍ ഞാന്‍ വല്ലാതെ ഇറിറ്റേറ്റഡ് ആകാന്‍ നിന്നില്ല. ഇല്ലെങ്കില്‍ ശരിക്കും അവര്‍ക്കിട്ട് കൊടുത്തേനെ." ഐമ റോസി കൂട്ടിച്ചേർത്തു. ജെസു ജോർജുമായുള്ള അഭിമുഖത്തിനിടെയായിരുന്നു ഐമയുടെ പ്രതികരണം.