ഫാന്റസി കോമഡിയുമായി അജയ് ദേവ്‍ഗണ്‍, 'താങ്ക് ഗോഡി'ന്റെ അഡ്വാൻസ് ബുക്കിംഗ് തുടങ്ങി

അജയ് ദേവ്‍ഗണ്‍ നായകനാകുന്ന ചിത്രത്തിന്റെ അഡ്വാൻസ് ബുക്കിംഗ് തുടങ്ങി.

അജയ് ദേവ്‍ഗണ്‍ നായകനാകുന്ന പുതിയ സിനിമ 'താങ്ക് ഗോഡ്' ഒക്ടോബര്‍ 25ന് തിയറ്ററുകളില്‍ റിലീസ് ചെയ്യാനിരിക്കുകയാണ്. ഇന്ദ്ര കുമാറാണ് ചിത്രം സംവിധാനം ചെയ്യുന്നത്. സിദ്ധാര്‍ഥ് മല്‍ഹോത്രയും രാകുല്‍ പ്രീത് സിംഗും ചിത്രത്തില്‍ പ്രധാന കഥാപാത്രങ്ങളായുണ്ട്. ഫാന്റസി കോമഡി ചിത്രമായ 'താങ്ക് ഗോഡി'ന്റെ അഡ്വാൻസ് ബുക്കിംഗ് തുടങ്ങിയതായി അറിയിച്ചിരിക്കുകയാണ് അജയ് ദേവ്‍ഗണ്‍.

മോഹൻലാല്‍ നായകനായ 'ദൃശ്യം 2'വിന്റെ ഹിന്ദി റീമേക്കാണ് അജയ് ദേവ്‍ഗണിന്റേതായി റിലീസ് ചെയ്യാനുള്ള മറ്റൊരു ചിത്രം. നവംബര്‍ 18ന് തിയറ്ററുകളില്‍ എത്താനിരിക്കുന്ന 'ദൃശ്യം 2' എന്ന ചിത്രം സംവിധാനം ചെയ്യുന്നത് അഭിഷേക് പതക് ആണ്. സുധീര്‍ കെ ചൗധരിയാണ് ചിത്രത്തിന്റെ ഛായാഗ്രാഹകൻ. ദേവി ശ്രീ പ്രസാദ് ആണ് സംഗീത സംവിധാനം.

അജയ് ദേവ്ഗണ്‍ നായകനാകുന്ന 'മൈദാൻ' 2023 ഫെബ്രുവരി 17ന് റിലീസ് ചെയ്യുമെന്നും പ്രഖ്യാപിച്ചിട്ടുണ്ട്. അമിത് രവിന്ദെര്‍നാഥ് ശര്‍മ്മയാണ് ചിത്രം സംവിധാനം ചെയ്യുന്നത്. തുഷാര്‍ കാന്തി റായ് ആണ് ഛായാഗ്രാഹണം നിര്‍വഹിക്കുന്നത്. ചിത്രത്തില്‍ പ്രിയാമണിയാണ് അജയ് ദേവ്ഗണിന്റെ നായികയാകുക. ഇന്ത്യൻ ഫുട്‍ബോളിന്റെ സുവര്‍ണ കാലഘട്ടത്തിന്റെ കഥയാണ് ചിത്രം പറയുന്നത്. ഫുട്‍ബോള്‍ പരിശീലകനായ സെയ്‍ദ് അബ്‍ദുള്‍ റഹ്‍മാൻ ആയിട്ടാണ് അജയ് ദേവ്‍ഗണ്‍ ചിത്രത്തില്‍ അഭിനയിക്കുന്നത്. 1951ലും 1992ലും ഇന്ത്യയെ ഏഷ്യൻ ഗെയിംസില്‍ വിജയത്തിലേക്ക് നയിച്ച പരിശീലകനാണ് സെയ്‍ദ് അബ്‍ദുള്‍ റഹ്‍മാൻ.

'റണ്‍വേ 34' ആണ് അജയ് ദേവ്‍ണിന്റേതായി ഏറ്റവും ഒടുവില്‍ റിലീസ് ചെയ്‍തത്. നായകനായ അജയ് ദേവ്‍ഗണ്‍ തന്നെയാണ് ചിത്രം സംവിധാനം ചെയ്‍തതും. അമിതാഭ് ബച്ചനും ചിത്രത്തില്‍ ഒരു പ്രധാനപ്പെട്ട കഥാപാത്രമായി എത്തിയിരുന്നു. ചിത്രത്തിന് ബോക്സ് ഓഫീസില്‍ വലിയ പ്രതികരണം സൃഷ്‍ടിക്കാൻ കഴിഞ്ഞിരുന്നില്ല.