മെറ്റ് ഗാലയില്‍ തിളങ്ങാൻ ആലിയ, നടി യാത്ര തിരിച്ചു

നടിയുടെ എയര്‍പോര്‍ട്ട് ചിത്രങ്ങള്‍ ശ്രദ്ധയാകര്‍ഷിക്കുകയാണ്.

ബോളിവുഡ് പ്രേക്ഷകരുടെ പ്രിയപ്പെട്ട താരമായ ആലിയ ഭട്ടും മെറ്റ് ഗാലയിലേക്ക്. ആലിയ ഭട്ടിന്റെ ആദ്യ മെറ്റ് ഗാലയാണ് ഇത്. ന്യൂയോര്‍ക്ക് സിറ്റിയിലെ പ്രശസ്‍തമായ മെട്രോപൊളിറ്റൻ മ്യൂസിയം ഓഫ് ആര്‍ട്‍സ് കോസ്റ്റ്യൂം ഇൻസ്റ്റിറ്റ്യൂട്ടിനെ പിന്തുണയ്‍ക്കുന്നതിന് വേണ്ടിയുള്ള ചാരിറ്റി ഈവന്റാണ് മെറ്റ് ഗാല. ദീപിക പദുക്കോണിനും പ്രിയങ്ക ചോപ്രയ്‍ക്ക് ശേഷം ഇന്ത്യയില്‍ നിന്ന് പങ്കെടുക്കുന്ന നടിയാണ് ആലിയ ഭട്ട് എന്ന പ്രത്യേകതയുമുണ്ട്. മെയ് ഒന്നിനാണ് ഇത്തവണ മെറ്റ് ഗാല നടക്കുന്നത്. മെറ്റ് ഗാലയില്‍ പങ്കെടുക്കുന്നതിനായി ആലിയ ഭട്ട് പുറപ്പെട്ടു കഴിഞ്ഞു. നടിയുടെ എയര്‍പോര്‍ട്ട് ചിത്രങ്ങള്‍ ഓണ്‍ലൈനില്‍ ശ്രദ്ധയാകര്‍ഷിച്ചും കഴിഞ്ഞിരിക്കുകയാണ്.

ആലിയ ഭട്ടിനും രണ്‍ബീറിനും കഴിഞ്ഞ നവംബര്‍ ആറിന് പെണ്‍കുഞ്ഞ് പിറന്നിരുന്നു. ആലിയ ഭട്ടും രണ്‍ബിര്‍ കപൂറും അഞ്ചു വര്‍ഷത്തെ പ്രണയമാണ് വിവാഹത്തിലേക്കെത്തിച്ചത്. 'ബ്രഹ്‍മാസ്‍ത്ര' എന്ന ചിത്രമാണ് ആലിയാ ഭട്ടിന്റേതായി ഒടുവില്‍ പ്രദര്‍ശനത്തിനെത്തിയത്. രണ്‍ബിര്‍ കപൂര്‍ ആയിരുന്നു ചിത്രത്തില്‍ നായകനായി വേഷമിട്ടത്.

ആലിയ ഭട്ടും രണ്‍ബിര്‍ കപൂറും ഒന്നിച്ച 'ബ്രഹ്‍മാസ്‍ത്ര' സംവിധാനം ചെയ്‍തത് അയൻ മുഖര്‍ജിയാണ്. ഹുസൈൻ ദലാലും സംവിധായകൻ അയൻ മുഖര്‍ജിയും ചേര്‍ന്ന് തിരക്കഥ എഴുതിയിരിക്കുന്നു. മോശമല്ലാത്ത പ്രതികരണം ചിത്രത്തിന് തിയറ്ററുകളില്‍ നിന്ന് ലഭിച്ചിരുന്നു. ബോക്സ് ഓഫീസ് കളക്ഷനില്‍ 'ബ്രഹ്‍മാസ്‍ത്ര' സമീപകാല ബോളിവുഡ് ചിത്രങ്ങളെയെല്ലാം മറികടന്നിരുന്നു.

ഇഷ' എന്ന നായിക കഥാപാത്രമായിട്ട് ചിത്രത്തില്‍ ആലിയ ഭട്ട് ആണ് അഭിനയിച്ചത്. ഹിന്ദി, തമിഴ്, തെലുങ്ക്, കന്നഡ, മലയാളം ഭാഷകളിലാണ് 'ബ്രഹ്‍മാസ്‍ത്ര' എത്തിയത്. പങ്കജ് കുമാറാണ് ചിത്രത്തിന്റെ ഛായാഗ്രാഹണം നിര്‍വഹിച്ചത്. അമിതാഭ് ബച്ചൻ ചിത്രത്തില്‍ ഒരു പ്രധാന വേഷത്തിലെത്തിയിരുന്നു. എസ് എസ് രാജമൗലിയാണ് മലയാളമുള്‍പ്പടെയുള്ള തെന്നിന്ത്യൻ ഭാഷകളില്‍ 'ബ്രഹ്‍മാസ്‍ത്ര' അവതരിപ്പിച്ചത്. രണ്ട് ഭാഗങ്ങളായിട്ട് ഉള്ള ചിത്രത്തിന്റെ ആദ്യ ഭാഗം എത്തിയത് 'ബ്രഹ്‍മാസ്‍ത്ര പാര്‍ട് വണ്‍: ശിവ' എന്ന പേരിലാണ്. വിസ്‍മയിപ്പിക്കുന്ന ഒരു തിയറ്റര്‍ കാഴ്‍ചയായിരുന്നു 'ബ്രഹ്‍മാസ്‍ത്ര' എന്നായിരുന്നു അഭിപ്രായങ്ങള്‍.