"സെറ്റിൽ വൈബ് കിട്ടാൻ മണ്ടിയെ പോലെ അഭിനയിച്ചു": അനശ്വര രാജൻ

'ടൂറിസ്റ്റ് ഫാമിലി' സംവിധായകൻ അബിഷൻ ജീവന്ത് ആദ്യമായി നായകനാകുന്ന 'വിത്ത് ലവ്' ഫെബ്രുവരി 6-ന് തിയേറ്ററുകളിലെത്തും. അനശ്വര രാജനാണ് ചിത്രത്തിലെ നായിക.

ടൂറിസ്റ്റ് ഫാമിലി സംവിധായകൻ അബിഷൻ ജീവന്ത് നായകനായെത്തുന്ന ചിത്രം വിത്ത് ലവ് റിലീസിനൊരുങ്ങുകയാണ്. അനശ്വര രാജനാണ് ചിത്രത്തിൽ നായികയായെത്തുന്നത്. സൗന്ദര്യ രജനികാന്തിന്റെ സിയോൺ ഫിലിംസ് ആണ് ചിത്രം നിർമ്മിക്കുന്നത്. സ്‌കൂൾ പ്രണയം സംസാരിക്കുന്ന ചിത്രം ഫെബ്രുവരി 6 നാണ് തിയേറ്ററുകളിൽ എത്തുന്നത്.

ഇപ്പോഴിതാ വൈബ് സെറ്റാവാൻ വേണ്ടി സിനിമയുടെ സെറ്റിൽ മണ്ടിയെ പോലെ അഭിനയിച്ചു എന്നാണ് അനശ്വര രാജൻ പറയുന്നത്. മൂന്നുദിവസത്തെ വർക്ക്‌ഷോപ്പ് നടത്തിയപ്പോൾ തനിക്കും മദനും അനശ്വരയ്ക്കും വൈബ് സെറ്റായി എന്ന് അബിഷൻ ജീവന്ത് പറയുകയുണ്ടായി. എന്നാൽ ആ സമയത്ത് തനിക്ക് വൈബ് സെറ്റായില്ലെന്നും അതിന് വേണ്ടി സെറ്റിൽ മണ്ടിയായി അഭിനയിച്ചെന്നും അബിഷനുമായി വൈബ് കിട്ടാനാണ് അങ്ങനെ ചെയ്തതെന്നും അനശ്വര തമാശ രൂപേണ പറഞ്ഞു.

ഈ വർഷത്തെ തമിഴിലെ ബ്ലോക്ക്ബസ്റ്റർ ചിത്രമായ 'ടൂറിസ്റ്റ് ഫാമിലി'യുടെ വമ്പിച്ച വിജയത്തെത്തുടർന്ന്, അതിന്റെ സംവിധായകൻ അബിഷൻ ജീവിന്ത് ഈ റൊമാന്റിക് ഡ്രാമയിലൂടെ ആദ്യമായി നായകനായി എത്തുകയാണ്. ലവർ, ടൂറിസ്റ്റ് ഫാമിലി എന്നീ ചിത്രങ്ങളിൽ അസോസിയേറ്റ് ഡയറക്ടർ ആയി ജോലി ചെയ്‍ത മദൻ ആദ്യമായി സംവിധാനം ചെയ്യുന്ന ചിത്രം കൂടിയാണിത്.

പ്രണയം, കോമഡി എന്നിവ കോർത്തിണക്കിയാണ് ചിത്രം ഒരുക്കിയിരിക്കുന്നതെന്ന് ടൈറ്റിൽ ടീസറും ഗാനവും സൂചന നൽകുന്നുണ്ട്. ഗുഡ് നൈറ്റ്, ലവർ, ടൂറിസ്റ്റ് ഫാമിലി എന്നിവയുൾപ്പെടെ നിരവധി ഹിറ്റുകൾ നൽകി ശ്രദ്ധ നേടിയ നിർമ്മാണ കമ്പനിയാണ്, ഈ ചിത്രത്തിന്റെ നിർമ്മാണത്തിനായി, സൌന്ദര്യ രജനീകാന്തിന്റെ സിയോൺ ഫിലിംസുമായി സഹകരിക്കുന്ന എംആർപി എന്റർടൈൻമെന്റ്. ഹരിഷ് കുമാർ, കാവ്യാ അനിൽ, സച്ചിൻ നാച്ചിയപ്പൻ, തേനി മുരുഗൻ, ശരവണൻ എന്നിവരാണ് ചിത്രത്തിലെ മറ്റു പ്രധാന താരങ്ങൾ.