ടൊവിനൊ നായകനാകുന്ന 'അന്വേഷിപ്പിൻ കണ്ടെത്തും', രണ്ടാം ഷെഡ്യുൾ ആരംഭിച്ചു

ടൊവിനൊ കേന്ദ്ര കഥാപാത്രമായ '2018'ന്റെ വിജയാഘോഷവും നടന്നു.

ടൊവിനോ നായകനാകുന്ന ചിത്രം 'അന്വേഷിപ്പിൻ കണ്ടെത്തും' രണ്ടാം ഷെഡ്യൂള്‍ ആരംഭിച്ചു. ഡാര്‍വിൻ കുര്യാക്കോസാണ് ചിത്രത്തിന്റെ സംവിധായകൻ. തിരക്കഥ സംഭാഷണം ജിനു വി എബ്രാഹാം എഴുതുന്നു. 'അന്വേഷിപ്പിൻ കണ്ടെത്തും' സിനിമയുടെ 50 ദിവസം നീണ്ടുനില്‍ക്കുന്ന ഷെഡ്യൂള്‍ കോട്ടയത്താണ് ആരംഭിച്ചത്.

ടൊവിനൊയുടേതായി എത്തിയ ചിത്രം '2018'ന്റെ വിജയഘോഷവും സെറ്റിൽ നടന്നു. ടൊവിനൊ, സിദ്ദിഖ്, സംവിധായകൻ ഡാർവിൻ കുര്യാക്കോസും ചിത്രത്തിലെ മറ്റ് അഭിനേതാക്കളും പ്രവർത്തകരും ആഘോഷചടങ്ങിൽ പങ്കെടുത്തു. കേക്ക് മുറിച്ചായിരുന്നു ചിത്രത്തിന്റെ വിജയാഘോഷം. ടോവിനൊ തോമസിനൊപ്പം ചിത്രത്തില്‍ പ്രമോദ് വെളിയനാട്, വിനീത് തട്ടിൽ, രാഹുൽ രാജഗോപാൽ, ഇന്ദ്രൻസ്, സിദ്ദിഖ്, സാദിഖ് ബാബുരാജ്, അർത്ഥന ബിനു, രമ്യ സുവി, ശരണ്യ തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിക്കുന്നത്.

'കാപ്പ'യുടെ മികച്ച വിജയത്തിന് ശേഷം തീയറ്റര്‍ ഓഫ് ഡ്രീംസിന്‍റെ ബാനറില്‍ ഡോൾവിൻ കുര്യാക്കോസ്, ജിനു വി എബ്രാഹാം എന്നിവർക്കൊപ്പം സരിഗമയും ചേർന്നാണ് 'അന്വേഷിപ്പിൻ കണ്ടെത്തും' നിര്‍മിക്കുന്നത്. വമ്പന്‍ ബജറ്റിലൊരുങ്ങുന്ന ചിത്രമായ 'അന്വേഷിപ്പിന്‍ കണ്ടെത്തും' ടൊവിനോയുടെ കരിയറിലെ തന്നെ വലിയ പ്രൊജക്റ്റുകളിലൊന്നാണ്. ദക്ഷിണേന്ത്യയിലെ മികച്ച സംഗീത സംവിധായകരിലൊരാളായ സന്തോഷ് നാരായണന്‍ സംഗീതവും പശ്ചാത്തല സംഗീതവും ഒരുക്കുന്ന ആദ്യ മലയാളസംരഭം എന്ന സവിശേഷതയും 'അന്വേഷിപ്പിൻ കണ്ടെത്തിനു'മുണ്ട്.

എഴുപതോളം മികച്ച താരങ്ങൾ അണിനിരക്കുന്ന 'അന്വേഷിപ്പിൻ കണ്ടെത്തു'മില്‍ പുതുമുഖ നായികമാരും വേഷമിടുന്നുണ്ട്. സൈജു ശ്രീധറാണ് ചിത്രത്തിന്റെ എഡിറ്റര്‍. ഗൗതം ശങ്കറാണ് ചിത്രത്തിന്റെ ചായാഗ്രഹണം. കോസ്റ്റ്യുംസ് സമീറ സനീഷ്, മേക്കപ്പ് സജി കാട്ടാക്കട, പ്രൊഡക്ഷൻ കൺട്രോളർ സഞ്ജു ജെ, പിആർഒ ശബരി എന്നിവരുമാണ് പതിവ് ഇന്‍വെസ്റ്റിഗേഷന്‍ ഫോര്‍മുലയില്‍ നിന്ന് മാറി, അന്വേഷകരുടെ കഥ പറയുന്ന ചിത്രത്തിന്റെ  മറ്റ് പ്രവര്‍ത്തകര്‍.