മമ്മി എനിക്കു തന്ന ഏറ്റവും വിലമതിക്കുന്ന സമ്മാനം; സിബിനെക്കുറിച്ച് ഖുഷി

നടിയും അവതാരകയുമായ ആര്യ ബാബുവിന്റെയും സിബിൻ ബെഞ്ചമിന്റെയും വിവാഹത്തിനു ശേഷമുള്ള സംഗീത് ചടങ്ങിൽ ആര്യയുടെ മകൾ ഖുഷി സിബിനെക്കുറിച്ച് പറഞ്ഞ വാക്കുകൾ ശ്രദ്ധിക്കപ്പെടുന്നു.

നടിയും അവതാരകയുമായ ആര്യ ബാബു വിവാഹിതയായത് അടുത്തിടെയാണ്. കൊറിയോഗ്രാഫറും ഡിജെയുമായ സിബിൻ ബെഞ്ചമിനാണ് വരൻ. ഇരുവരുടെയും വിവാഹത്തോട് അനുബന്ധിച്ച് മൂന്നു ദിവസത്തെ ആഘോഷങ്ങളാണ് ഒരുക്കിയിരുന്നത്. ഇതിനു ശേഷം ഇരുവരും ഓസ്ട്രേലിയിയൽ ഒരു പ്രോഗ്രാമിന് പോകുകയും ചെയ്തിരുന്നു. നാട്ടിൽ തിരിച്ചെത്തിയതിനു ശേഷമാണ് സുഹൃത്തുക്കൾക്കായി അടുത്ത റിസപ്ഷൻ ഒരുക്കിയത്. ഇതിനിടെ, ഇരുവരുടെയും മെഹന്ദി, സംഗീത് ചടങ്ങുകളുടെ വീഡിയോകളും തരംഗമായിരുന്നു. സംഗീത് ചടങ്ങിൽ ആര്യയുടെ ആദ്യ വിവാഹത്തിലെ മകൾ ഖുഷി സിബിനെക്കുറിച്ചു പറഞ്ഞ വാക്കുകളും ശ്രദ്ധിക്കപ്പെടുകയാണ്.

''എന്നെ ഒരു രാജകുമാരിയെപ്പോലെയാണ് മമ്മി നോക്കുന്നത്. എല്ലാവരേയും ചിരിപ്പിക്കുന്ന മമ്മിയെ മാത്രമെ നിങ്ങൾക്ക് അറിയൂ. എന്നാൽ എന്റെ മമ്മി ഒരു ഭയങ്കരി കൂടിയാണ്. ഭയങ്കരിയായ എന്റെ മമ്മിയുടെ മനസിൽ പെട്ടന്നൊന്നും എല്ലാവർക്കും കയറാൻ പറ്റില്ല. സ്നേഹം കൊണ്ടു മാത്രമേ പറ്റൂ. അങ്ങനെ കയറിപ്പറ്റിയ കുറച്ച് സുഹൃത്തുക്കളുടെ കൂട്ടത്തിൽ നമ്മുടെ കഥയിലെ ഹീറോയുണ്ടായിരുന്നു. എന്റെ സ്വന്തം ഡാഡി. ഒരു വട്ടം എന്റെ ഡാഡിയോട് സംസാരിച്ചവരാരും പിന്നെ അദ്ദേഹത്തെ മറക്കുകയില്ല. ഡാഡി വന്നശേഷം മമ്മിയുടെ എല്ലാ പ്രശ്നങ്ങളിലും ഡാഡി മമ്മിയെ ചേർത്തു പിടിച്ചു. ഡാഡിയുടെ ലൈഫിലെ എല്ലാ അഡ്വഞ്ചേഴ്സും മമ്മിക്ക് അറിയാം. മമ്മിയുടെ ജീവിതത്തിലെ എല്ലാ ട്വിസ്റ്റുകളും ഡാഡിക്കും അറിയാം. ഒരു കംപ്ലീറ്റ് ഹാപ്പി ഫാമിലി എന്നതാണ് മമ്മിയുടെ സ്വപ്നമെന്ന് എനിക്ക് അറിയാം. അത് തന്നെയായിരുന്നു ‍ഡാഡിയുടേയും ഡ്രീം. ഇവരുടെ വിവാഹം എന്റെ മാനിഫെസ്റ്റേഷനാണ്.

മമ്മിയുടെ ബെസ്റ്റ്ഫ്രണ്ടിൽ നിന്നും എന്റെ ഡാഡിയായി മാറാൻ ഡാഡിക്ക് അധികം സമയം എടുത്തില്ല.

മമ്മിയുടെ ലോകമായിരുന്നു എപ്പോഴും എന്റെ ലോകം. പിന്നെ എപ്പോഴാണ് ആ ലോകത്ത് എന്റെ ഡാഡി എന്റെ എല്ലാമായി മാറിയതെന്ന് എനിക്ക് അറിയില്ല. മമ്മിയോട് പറയാൻ പറ്റാത്ത കാര്യങ്ങൾ ഞാൻ ഡാഡിയോട് പറയാൻ തുടങ്ങി. അതുപോലെ ഡാഡി എന്റെ അടുത്ത് പറയുന്ന കുറേ സീക്രട്ട്സുമുണ്ട്. ഞാൻ ഡാഡിയുടെ ഗേളാണ്. ഒരു പൊടിക്ക് ലേശം സ്നേഹക്കൂടുതൽ ഡാഡിയോടാണ്. ഡാഡി ഇല്ലാത്ത ലൈഫ് ഇനി ഖുഷിക്ക് ചിന്തിക്കാൻ പറ്റില്ല. മമ്മി എനിക്ക് ജീവിതത്തിൽ തന്ന ഏറ്റവും വിലമതിക്കുന്ന സമ്മാനം ഡാഡിയാണ്'', എന്നാണ് സംഗീത് ആഘോഷത്തിനിടെ പ്രദർശിപ്പിച്ച വീഡിയോയിൽ ഖുഷി സിബിനെപ്പറ്റി പറഞ്ഞത്. തമാശയും സ്നേഹവുമെല്ലാം കലർന്ന ഖുഷിയുടെ വാക്കുകളെ കയ്യടികളോടെയാണ് അതിഥികൾ സ്വീകരിച്ചത്.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക