'റാസ് അൽഖൈമയിലെ കൊടും തണുപ്പിൽ, ഒരു ചെറിയ പുതപ്പിൽ, ഈ നിലത്ത് കിടക്കുന്നത് മലയാളത്തിന്റെ പ്രിയപ്പെട്ട നടൻ'

മെയ് 8 ന് റിലീസ് ചെയ്യാനിരിക്കുന്ന ആസിഫ് അലി ചിത്രം സർക്കീട്ടിന്റെ ലൊക്കേഷനിൽ നിന്നുള്ള ചിത്രം സംവിധായകൻ താമർ കെവി പങ്കുവെച്ചു. 

കൊച്ചി: നടന്‍ ആസിഫ് അലിയെക്കുറിച്ചുള്ള സംവിധായകന്‍ താമര്‍ കെവിയുടെ പോസ്റ്റ് ശ്രദ്ധേയമാകുന്നു. അടുത്ത ദിവസം റിലീസ് ചെയ്യുന്ന സര്‍ക്കീട്ട് എന്ന ചിത്രത്തിന്‍റെ ലോക്കേഷനില്‍ നിന്നുള്ള ചിത്രമാണ് വൈറലാകുന്നത്. രാത്രി രണ്ടു മണിക്ക്,  റാസ് അൽഖൈമയിലെ കൊടും തണുപ്പിൽ, ഒരു  ചെറിയ പുതപ്പിൽ, ഈ നിലത്ത്  കിടക്കുന്നത് മലയാളത്തിന്റെ പ്രിയപ്പെട്ട നടൻ ആസിഫലിയാണ് എന്നാണ് കുറിപ്പില്‍ പറയുന്നത്.  

നന്ദി പ്രിയപ്പെട്ട ആസിഫ് അലി.  സർക്കീട്ടിനെ വിശ്വസിച്ച് കൂടെ നിന്നതിന്.  അമീറായി ജീവിച്ചതിന്. അമീറിനെ ആളുകൾ ഏറ്റെടുക്കും എന്ന പ്രതീക്ഷയിൽ. ഞങ്ങളുടെ സർക്കീട്ട് നാളെ ആരംഭിക്കുന്നു എന്ന് പറഞ്ഞാണ് സംവിധായകന്‍ സര്‍ക്കീട്ട് റിലീസ് ചെയ്യുന്ന തലേ ദിവസം ഇട്ട പോസ്റ്റ് അവസാനിപ്പിക്കുന്നത്.  

ആസിഫ് അലി നായകനായി എത്തുന്ന സര്‍ക്കീട്ട് മെയ് 8, നാളെ തിയറ്ററുകളില്‍ എത്തുന്നത്.  ‘ആയിരത്തൊന്നു നുണകൾ' എന്ന ചിത്രത്തിന്റെ സംവിധായകനായ താമർ ആണ് സര്‍ക്കീട്ട് ഒരുക്കിയിരിക്കുന്നത്. മികച്ച അഭിപ്രായത്തോടെ പ്രേക്ഷകർ ഏറ്റെടുത്ത പൊൻമാൻ എന്ന ചിത്രത്തിന് ശേഷം അജിത് വിനായക ഫിലിംസ് വിത്ത് ആക്ഷൻ ഫിലിംസിന്‍റെ ബാനറിൽ വിനായക അജിത്, ഫ്ളോറിൻ ഡൊമിനിക്ക് എന്നിവർ ചേർന്ന് നിർമ്മിക്കുന്ന ചിത്രമാണിത്.

കിഷ്കിന്ധാ കാണ്ഡം, രേഖാചിത്രം എന്നീ ബ്ലോക്ക്ബസ്റ്റർ സിനിമകൾക്ക് ശേഷം ഒരു ഫീൽ ഗുഡ് ഫാമിലി ഡ്രാമയുമായാണ് ആസിഫ് അലി സർക്കീട്ടിലൂടെയെത്തുന്നത്. ദിവ്യ പ്രഭയാണ് ചിത്രത്തിലെ നായിക. ബാലതാരം ഓർഹാൻ, ദീപക് പറമ്പോള്‍, രമ്യ സുരേഷ്, പ്രശാന്ത് അലക്‌സാണ്ടര്‍, സ്വാതിദാസ് പ്രഭു, സുധീഷ് സ്കറിയ, ഗോപന്‍ അടാട്ട്, സിന്‍സ് ഷാന്‍, പ്രവീൺ റാം എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. പൂര്‍ണ്ണമായും ഗള്‍ഫ് രാജ്യങ്ങളിൽ ചിത്രീകരിച്ച 'സർക്കീട്ട്', യുഎഇ, ഷാര്‍ജ, റാസല്‍ ഖൈമ, ഫുജൈറ എന്നിവിടങ്ങളിലായി 40 ദിവസം കൊണ്ടാണ് പൂർത്തിയാക്കിയത്.

സംഗീത് പ്രതാപ് ആണ് എഡിറ്റിംഗ് നിര്‍വഹിച്ചിരിക്കുന്നത്. ലിറ്റില്‍ മിസ് റാവുത്തര്‍ എന്ന സിനിമയുടെ എഡിറ്റിങ്  നിര്‍വ്വഹിച്ച സംഗീത് പ്രതാപ് 2024ലെ മികച്ച എഡിറ്റര്‍ക്കുള്ള സംസ്ഥാന ചലച്ചിത്ര പുരസ്‌കാരം നേടിയിരുന്നു. സൂപ്പർ ശരണ്യയിലൂടെയാണ് സംഗീത് അഭിനയരംഗത്തേക്ക് വന്നത്. അഞ്ചോളം സിനിമകളിലഭിനയിക്കുകയും ഈയടുത്തു റിലീസ് ചെയ്ത മോഹൻലാൽ സിനിമയായ തുടരുമിലും ശ്രദ്ധേയമായ വേഷം ചെയ്യുകയും ചെയ്തു. 

ഛായാഗ്രഹണം- അയാസ് ഹസൻ, സംഗീതം- ഗോവിന്ദ് വസന്ത, പ്രൊജക്റ്റ് ഡിസൈനർ- രഞ്ജിത് കരുണാകരൻ, കലാസംവിധാനം - വിശ്വനാഥൻ അരവിന്ദ്, വസ്ത്രാലങ്കാരം - ഇർഷാദ് ചെറുകുന്ന്, മേക്കപ്പ് - സുധി, ലൈൻ പ്രൊഡക്ഷൻ - റഹിം പിഎംകെ, സിങ്ക് സൗണ്ട്- വൈശാഖ്, പിആർഒ- വൈശാഖ് വടക്കേവീട്, ജിനു അനിൽകുമാർ, പോസ്റ്റർ ഡിസൈൻ- ഇല്ലുമിനാർട്ടിസ്റ്റ്, സ്റ്റിൽസ്- എസ്‌ബികെ ഷുഹൈബ് എന്നിവരാണ് മറ്റ് അണിയറ പ്രവര്‍ത്തകര്‍.