Palthu Janwar Movie : ജോജിക്കു ശേഷം ഭാവനാ സ്റ്റുഡിയോസ്; 'പാല്തു ജാന്വര്' ഓണത്തിന്
Synopsis
വിനോയ് തോമസ്, അനീഷ് അഞ്ജലി എന്നിവരുടേതാണ് രചന
കുമ്പളങ്ങി നൈറ്റ്സിനും ജോജിക്ക് ശേഷം തങ്ങളുടെ നിര്മ്മാണത്തില് എത്തുന്ന പുതിയ ചിത്രം പ്രഖ്യാപിച്ച് ഭാവന സ്റ്റുഡിയോസ് (Bhavana Studios). ദിലീഷ് പോത്തന്, ശ്യാം പുഷ്കരന്, ഫഹദ് ഫാസില് എന്നിവരുടെ ഉടമസ്ഥതയിലുള്ള നിര്മ്മാണ കമ്പനിയാണ് ഭാവന സ്റ്റുഡിയോസ്. എന്നാല് പുതിയ ചിത്രത്തില് നിര്മ്മാതാക്കളുടെ റോളില് മാത്രമേ ഫഹദും ശ്യാമും പങ്കാളികളാവുന്നുള്ളൂ. ദിലീഷ് പോത്തന് ഒരു കഥാപാത്രത്തെ അവതരിപ്പിക്കുന്നുമുണ്ട്. പാല്തു ജാന്വര് (Palthu Janwar) എന്നു പേരിട്ടിരിക്കുന്ന ചിത്രം സംവിധാനം ചെയ്തിരിക്കുന്നത് നവാഗതനായ സംഗീതം പി രാജനാണ്. അമല് നീരദിനും മിഥുന് മാനുവല് തോമസിനുമൊപ്പം പ്രവര്ത്തിച്ചിട്ടുള്ളയാളാണ് സംഗീത്.
വിനോയ് തോമസ്, അനീഷ് അഞ്ജലി എന്നിവര് ചേര്ന്ന് രചന നിര്വ്വഹിച്ചിരിക്കുന്ന ചിത്രത്തില് കേന്ദ്ര കഥാപാത്രത്തെ അവതരിപ്പിക്കുന്നത് ബേസില് ജോസഫ് ആണ്. ഇന്ദ്രന്സ്, ജോണി ആന്റണി, ദിലീഷ് പോത്തന്, ഷമ്മി തിലകന്, ശ്രുതി സുരേഷ്, ജയ കുറുപ്പ്, ആതിര ഹരികുമാര്, തങ്കം മോഹന്, സ്റ്റെഫി സണ്ണി, വിജയകുമാര്, കിരണ് പീതാംബരന്, സിബി തോമസ്, ജോജി ജോണ് എന്നിവര്ക്കൊപ്പം മോളിക്കുട്ടി എന്ന പശുവും ഒരു പ്രധാന കഥാപാത്രത്തെ അവതരിപ്പിക്കുന്നു.
രണദിവെയാണ് ഛായാഗ്രഹണം. സംഗീതം ജസ്റ്റിന് വര്ഗീസ്. ജോജിയുടെയും സംഗീത സംവിധാനം ജസ്റ്റിന് ആയിരുന്നു. കലാസംവിധാനം ഗോകുല് ദാസ്, എഡിറ്റിംഗ് കിരണ് ദാസ്, എക്സിക്യൂട്ടീവ് പ്രൊഡ്യൂസേഴ്സ് ബെന്നി കട്ടപ്പന, ജോസ് വിജയ്, ചീഫ് അസോസിയേറ്റ് ഡയറക്ടേഴ്സ് രോഹിത്ത്, ചന്ദ്രശേഖര്, സ്റ്റില്സ് ഷിജിന് പി രാജ്, സൌണ്ട് ഡിസൈന് നിഥിന് ലൂക്കോസ്, വസ്ത്രാലങ്കാരം മഷര് ഹംസ, മേക്കപ്പ് റോണക്സ് സേവ്യര്, പ്രൊഡക്ഷന് കണ്ട്രോളര് ബിനു മണമ്പൂര്, വിഷ്വല് എഫക്റ്റ്സ് എഗ്ഗ്വൈറ്റ് വിഎഫ്എക്സ്, ടൈറ്റില് ഡിസൈന് എല്വിന് ചാര്ലി, പബ്ലിസിറ്റി ഡിസൈന് യെല്ലോ ടൂത്ത്സ്. വരുന്ന ഓണത്തിന് ഭാവന റിലീസ് തിയറ്ററുകളില് എത്തിക്കും.
ALSO READ : 'പദ്മ പൊട്ടിയാൽ നിങ്ങൾക്ക് എത്ര പോകും'? അനൂപ് മേനോനോട് സുരഭി