'ഓരോ തവണയും ഏത് വേഷത്തിലും വേറെ ലെവലാണ് ധനുഷ്', പ്രശംസിച്ച് കരീന കപൂര്‍

നടൻ ധനുഷിനെ പ്രശംസിച്ച് ബോളിവുഡ് നടി കരീന കപൂര്‍.

തെന്നിന്ത്യന്‍ നടന്‍ ധനുഷിനെ പ്രശംസിച്ച് ബോളിവുഡ് ലേഡി സൂപ്പര്‍സ്റ്റാര്‍ കരീന കപൂര്‍. ധനുഷ് പ്രധാന കഥാപാത്രമായി എത്തിയ ഹോളിവുഡ് ചിത്രം ' ദ ഗ്രേ മാന്‍' സ്‍ട്രീമിംഗ് തുടരുമ്പോഴാണ് കരീന കപൂറിന്റെ പ്രശംസ. 'ദ ഗ്രേ മാന്‍' കഴിഞ്ഞ മാസം മുതലാണ് നെറ്റ്ഫ്ളിക്‌സിലൂടെ സ്ട്രീമിങ് ആരംഭിച്ചത്. ധനുഷിന്റെ കഥാപാത്രത്തിന് മികച്ച അഭിപ്രായമായിരുന്നു പ്രേക്ഷകരില്‍ നിന്നും നിരൂപകരില്‍ നിന്നും ലഭിച്ചിരുന്നത്. റുസോ ബ്രദേഴ്‍സ് ആണ് ചിത്രം സംവിധാനം ചെയ്‍തത്.

'ധനുഷ്, അദ്ദേഹം വളരെ അത്ഭുതകരമായ നടന്‍ ആണ്. ഓരോ തവണയും ഏത് വേഷത്തില്‍ കാണുമ്പോഴും അദ്ദേഹവും അദ്ദേഹത്തിന്റെ പ്രകടനങ്ങളും മറ്റൊരു തലത്തിലാണ് എന്നാണ് കരീന കപൂര്‍ ഒരു അഭിമുഖത്തില്‍ പറഞ്ഞത്. 'ലാല്‍ സിംഗ് ഛദ്ദ' എന്ന ചിത്രമാണ് കരീന കപൂറിന്റേതായി ഇനി റിലീസ് ചെയ്യാനുള്ളത്. ആമിര്‍ ഖാൻ ആണ് ചിത്രത്തിലെ നായകൻ. അദ്വൈത് ചന്ദനാണ് ചിത്രം സംവിധാനം ചെയ്യുന്നത്.

ആമിര്‍ ഖാൻ തന്നെയാണ് ചിത്രം നിര്‍മിക്കുന്നത്. ആമിര്‍ ഖാൻ പ്രൊഡക്ഷൻസിന്റെ ബാനറിലാണ് ചിത്രത്തിന്റെ നിര്‍മാണം. വൈക്കം 18 സ്റ്റുഡിയോസ് എന്ന ബാനറും നിര്‍മാണത്തില്‍ പങ്കാളിയാകുന്നു. ഹേമന്തി സര്‍ക്കാറാണ് ചിത്രത്തിന്റെ ചിത്ര സംയോജനം നിര്‍വഹിക്കുന്നത്.

ടോം ഹാങ്ക്‍സിന്റെ 'ഫോറസ്റ്റ് ഗംപ്' എന്ന സിനിമയുടെ ഹിന്ദി റീമേക്കാണ് 'ലാല്‍ സിംഗ് ഛദ്ധ'. 1994ല്‍ പ്രദര്‍ശനത്തിന് എത്തിയ ചിത്രം വൻ ഹിറ്റായിരുന്നു. തുര്‍ക്കിയിലടക്കമുള്ളവിടങ്ങളായിരുന്നു ആമിര്‍ ഖാൻ ചിത്രത്തിന്റെ ഷൂട്ടിംഗ്. ചിത്രം ഓഗസ്റ്റ് 11ന് ആണ് റിലീസ് ചെയ്യുക.

ധനുഷിന്റേതായി ഇനി റീലീസ് ചെയ്യാനുള്ള ചിത്രം 'തിരുചിത്രമ്പലം' ആണ്. മിത്രൻ ജവഹര്‍ ആണ് ചിത്രം സംവിധാനം ചെയ്യുന്നത്. വര്‍ഷ ഭരത്, ശ്രേയസ് ശ്രീനിവാസൻ എന്നിവരുമായി ചേര്‍ന്ന് മിത്രൻ ജവഹര്‍ തന്നെ തിരക്കഥ എഴുതുന്നു. ഓഗസ്റ്റ് 18ന് ആയിരിക്കും ചിത്രം റിലീസ് ചെയ്യുക. നിത്യാ മേനോൻ റാഷി ഖന്ന, പ്രിയ ഭവാനി ശങ്കര്‍ എന്നിവരും ചിത്രത്തില്‍ പ്രധാന കഥാപാത്രങ്ങളായി എത്തുന്നു. പ്രകാശ് രാജും ചിത്രത്തിലുണ്ട്.

കലാനിധി മാരൻ ആണ് ചിത്രം നിര്‍മിക്കുന്നത്.  സണ്‍ പിക്ചേഴ്‍സ് ആണ് ചിത്രത്തിന്റെ ബാനര്‍. തിയറ്ററുകളില്‍ തന്നെയാണ് ധനുഷ് ചിത്രം റിലീസ് ചെയ്യുന്നത്. റെഡ് ജിയാന്റ് മൂവീസ് വിതരണം ചെയ്യുന്നു.

അനിരുദ്ധ് രവിചന്ദര്‍ ആണ് ചിത്രത്തിന്റെ സംഗീത സംവിധാനം നിര്‍വഹിക്കുന്നത്. പ്രസന്ന ജി കെ ചിത്രസംയോജനം നിര്‍വഹിക്കുന്നു. ഓം പ്രകാശാണ് ഛായാഗ്രാഹകൻ. 'യാരടി മോഹനി' എന്ന ചിത്രത്തിന് ശേഷം ധനുഷും മിത്രൻ ജവഹറും ഒന്നിക്കുന്നു എന്നതിനാല്‍ ഏറെ പ്രതീക്ഷയുള്ളതാണ് 'തിരുചിത്രമ്പലം'.