ബൃന്ദ മാസ്റ്ററിന്റെ സംവിധാനത്തില്‍ അനശ്വര രാജൻ, 'തഗ്‍സി'ലെ ഗാനം പുറത്ത്

അനശ്വരയുടെ 'തഗ്‍സി'ലെ ഗാനത്തിന്റെ ലിറിക്കല്‍ വീഡിയോ പുറത്ത്.

മലയാളി പ്രേക്ഷകരുടെ പ്രിയപ്പെട്ട താരങ്ങളില്‍ ഒരാളായ അനശ്വര രാജൻ പ്രധാന വേഷത്തിലെത്തുന്ന തമിഴ് ചിത്രമാണ് 'തഗ്‍സ്'. ദുല്‍ഖര്‍ നായകനായ 'ഹേയ് സിനാമിക'യ്‍ക്ക് ശേഷം ബൃന്ദ മാസ്റ്റര്‍ സംവിധാനം ചെയ്യുന്ന ചിത്രം എന്ന പ്രത്യേകതയുമുണ്ട്. മുഴുനീള ആക്ഷൻ ചിത്രമായിരിക്കും 'തഗ്‍സ്'. 'തഗ്‍സി'ലെ പുതിയ ഗാനത്തിന്റെ ലിറിക്കല്‍ വീഡിയോ പുറത്തുവിട്ടു.

'എയ് അഴകിയേ' എന്ന് തുടങ്ങുന്ന ഒരു ഗാനമാണ് പുറത്തുവിട്ടിരിക്കുന്നത്. വിവേകിന്റെ വരികളില്‍ സാം എസിന്റെ സംഗീത സംവിധാനത്തില്‍ ഗാനം ആലപിച്ചിരിക്കുന്നത് കപില്‍ കബിലൻ, ചിൻമയി എന്നിവര്‍ ചേര്‍ന്നാണ്. പ്രിയേഷ് ഗുരുസ്വാമിയാണ് ചിത്രത്തിന്റെ ഛായാഗ്രഹണം. പ്രവീൺ ആന്റണിയാണ് ചിത്രസംയോജനം നിര്‍വഹിക്കുന്നത്.

തമിഴിന് പുറമെ ഹിന്ദി, തെലുങ്ക്, കന്നഡ ഭാഷകളിലും ചിത്രം തിയറ്ററിൽ റിലീസ് ചെയ്യും. 'ആർആർആർ', 'ഡോൺ' എന്നിവയുടെ കേരളത്തിലെ വിതരണക്കാരായ റിയാ ഷിബുവിന്റെ എച്ച്ആർ പിക്ചേഴ്സും ജിയോ സ്റ്റുഡിയോസും ചേർന്നാണ് 'തഗ്‍സ്' എന്ന ചിത്രം നിര്‍മ്മിച്ചിരിക്കുന്നത്. ക്രിയേറ്റീവ് പ്രൊഡ്യൂസര്‍ മുത്തു കറുപ്പയ്യയാണ്. പ്രൊഡക്ഷൻ ഡിസൈനര്‍ ജോസഫ് നെല്ലിക്കലാണ്.

ഹൃദു ഹറൂറാണ് ചിത്രത്തിലെ നായകന്‍. ആമസോണിൽ ഏറെ ഹിറ്റായ 'ക്രാഷ് കോഴ്‍സ്' സീരിസിലെ മുഖ്യ വേഷത്തിലും സന്തോഷ് ശിവൻ സംവിധാനം ചെയ്‍ത 'മുംബൈക്കർ' എന്ന ചിത്രത്തിലെ കേന്ദ്ര കഥാപാത്രത്തെ അവതരിപ്പിച്ചും ശ്രദ്ധനേടിയ ഹൃദുവിന്‍റെ തമിഴ് അരങ്ങേറ്റം കൂടിയാണ് ഈ ചിത്രം. കോസ്റ്റ്യൂം ഡിസൈനര്‍ മാലിനി കാര്‍ത്തികേയനാണ്. ബോബി സിംഹ, ആർ കെ സുരേഷ്, മുനിഷ് കാന്ത്, ശരത് അപ്പാനി തുടങ്ങി നീണ്ട താരനിരയുള്ള ചിത്രത്തിന്റെ പ്രൊജക്റ്റ് കോര്‍ഡിനേറ്റര്‍ പരമേശ്വരൻ സുഭാഷ്, കളറിസ്റ്റ് അരുണ്‍ സംഗമേശ്വര്‍, ഡിഐ ഇൻഫിനിറ്റി മീഡിയയുമാണ്.