ചിരഞ്ജീവിക്കൊപ്പം ആ ബോളിവുഡ് താരവും, വിശ്വംഭരയുടെ പുത്തൻ അപ്ഡേറ്റ്
Synopsis
ചിരഞ്ജീവിയുടെ പുതിയ ചിത്രത്തിന്റ അപ്ഡേറ്റ്.
ചിരഞ്ജീവി നായകനായി വരാനിരിക്കുന്ന പുതിയ ചിത്രമാണ് വിശ്വംഭര. ചിരഞ്ജീവിയുടെ വേറിട്ട ഫാന്റസി ത്രില്ലര് ചിത്രമായിരിക്കും വിശ്വംഭര. സംവിധാനം വസിഷ്ഠ മല്ലിഡിയാണ്. ഓഗസ്റ്റ് 22ന് ആയിരിക്കും ചിത്രം തിയറ്ററുകളില് എത്തുക എന്ന് നേരത്തെ റിപ്പോര്ട്ടുകളുണ്ടായിരുന്നു. എന്നാല് വിശ്വംഭര അനിശ്ചിതമായി നീളുന്നുവെന്നാണ് ചിത്രത്തെ കുറിച്ചുള്ള പുതിയ അപ്ഡേറ്റ്. കമ്പ്യൂട്ടര് ഗ്രാഫിക്സ് ജോലികള് തീരാത്തതാണ് ചിത്രം വൈകാനുള്ള കാരണം. മിക്കവാറും 2026ലായിരിക്കും ചിരഞ്ജീവിയുടെ ചിത്രം തിയറ്ററുകളില് എത്തിക്കാനാകുക എന്നാണ് പുതിയ അപ്ഡേറ്റ് സൂചിപ്പിക്കുന്നത്. അതിനിടെ മറ്റൊരു അപ്ഡേറ്റും പുറത്തുവന്നിരിക്കുകയാണ്. ബോളിവുഡ് നടി മൗനി റോയി ചിത്രത്തില് ഒരു ഗാന രംഗത്തില് പ്രത്യക്ഷപ്പെടും എന്നതാണ് അപ്ഡേറ്റ്.
ചിരഞ്ജീവിയുടെ ജോഡിയായി തൃഷയാണ് എത്തുന്നത്. ഇഷ ചൗളയും രമ്യ പശുപലേടിയും ചിത്രത്തില് പ്രധാന വേഷത്തില് ഉണ്ടാകുമെന്നും ഒരു റിപ്പോര്ട്ടുണ്ട്. രമ്യ പശുപലേടി ചിരഞ്ജീവിക്കൊപ്പമുള്ള ഒരു ഫോട്ടോ പങ്കുവെച്ചിരുന്നു. വസിഷ്ഠ മല്ലിഡിക്കും ചിരഞ്ജീവിക്കും നന്ദിയും പറഞ്ഞിരുന്നു രമ്യ.
മഹേഷ് ബാബു നായകനായി ഒടുവിലെത്തിയ ചിത്രം ഗുണ്ടൂര് കാരത്തിനായി വലിയൊരു വീടിന്റെ സെറ്റ് നിര്മിച്ചിരുന്നു. ആ സെറ്റിലാണ് വിശ്വംഭരത്തിന്റെ ഗാന രംഗത്ത് ചിരഞ്ജീവിയും നായിക തൃഷയും പ്രത്യക്ഷപ്പെടുന്നത് എന്നൊരു റിപ്പോര്ട്ടുണ്ടായിരുന്നു. ചിരഞ്ജീവി സാധാരണക്കാരനായിട്ടാണ് വസിഷ്ഠയുടെ പുതിയ ചിത്രത്തില് എത്തുക എന്നും ഡോറ ബാബു എന്നായിരിക്കും ചിരഞ്ജീവിയുടെ കഥാപാത്രത്തിന്റെ പേര് എന്നും ഗോദാവരി ജില്ലയില് നിന്നുളള ആളാണ് കഥാപാത്രം എന്നുമാണ് റിപ്പോര്ട്ട്. എങ്ങനെയാണ് ആ സാധാരണ മനുഷ്യൻ ചിത്രത്തില് നായകനായി മാറുന്നത് എന്നതാണ് ആകാംക്ഷയുണര്ത്തുന്ന ഘടകം.
ചിരഞ്ജീവി നായകനായി വേഷമിട്ടവയില് ഒടുവിലെത്തിയ ചിത്രം 'ഭോലാ ശങ്കര്' ആണ്. അജിത്ത് നായകനായ ഹിറ്റ് തമിഴ് ചിത്രം 'വേതാള'ത്തിന്റെ തെലുങ്ക് റീമേക്കായിട്ടും ഭേലാ ശങ്കറിന് വൻ പരാജയം നേരിടാനായിരുന്നു വിധിയെന്നും 47.50 കോടിയാണ് ആഗോളതലത്തില് ആകെ നേടാനായത് എന്നുമാണ് ബോക്സ് ഓഫീസ് റിപ്പോര്ട്ടില് നിന്ന് വ്യക്തമായത്. 'വേതാളം' എന്ന ചിത്രത്തില് അജിത്ത് അഭിനയിച്ച കഥാപാത്രമായിട്ടാണ് 'ഭോലാ ശങ്കറി'ല് നായകനായ ചിരഞ്ജീവി എത്തിയത്. സംവിധാനം നിര്വഹിച്ചത് മെഹര് രമേഷാണ്. ചിത്രം രമബ്രഹ്മം സുങ്കരയാണ് നിര്മിച്ചത്. കീര്ത്തി സുരേഷ് ചിത്രത്തില് ചിരഞ്ജീവിയുടെ സഹോദരിയുടെ വേഷത്തില് എത്തിയപ്പോള് നായികയായി എത്തിയത് തമന്നയാണ്. മഹതി സ്വര സാഗറായിരുന്നു സംഗീതം.
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക് ചെയ്യുക