ഭിന്നശേഷി കുട്ടികള്‍ക്ക് പരിശീലന പരിപാടിയുമായി ദുല്‍ഖര്‍; ഉദ്‍ഘാടനം നിര്‍വ്വഹിച്ച് സണ്ണി വെയ്ന്‍

തൃശ്ശൂർ പുഴയ്ക്കല്‍ ഐഎഎന്‍ ഇൻസ്റ്റിറ്റ്യൂട്ട് ഓഫ് റീഹാബിലിറ്റേഷൻ ആൻഡ് റിസർച്ചിൽ വച്ച് നടന്ന ചടങ്ങിൽ നടൻ സണ്ണി വെയ്ൻ പദ്ധതി ഉദ്ഘാടനം ചെയ്തു

ദുൽഖർ സൽമാന്റെ ഉടമസ്ഥതയിലുള്ള സിനിമാ നിര്‍മ്മാണ കമ്പനി വേഫെറർ ഫിലിംസ് കലാകാരന്മാർക്കായി ആരംഭിച്ച കമ്മ്യൂണിറ്റി ഫോർ ഹാപ്പിനെസ്സ് നേരത്തെ വാര്‍ത്തകളില്‍ ഇടംപിടിച്ചിരുന്നു. ദുൽഖർ സൽമാൻ ഫാമിലി അഥവാ ഡിക്യുഎഫ് എന്ന പേരില്‍ ആരംഭിച്ച കൂട്ടായ്മയിലൂടെ, തങ്ങളുടെ കഴിവ് പുറത്തെടുക്കുവാൻ സാധിക്കാന്‍ ഒരു വേദി ലഭിക്കാത്ത കലാകാരന്മാർക്ക് അവസരം ഒരുക്കുകയാണ് ലക്ഷ്യം. കാരുണ്യ പ്രവര്‍ത്തനങ്ങളും ഇതിന്‍റെ ലക്ഷ്യമാണ്. ഇതിന്‍റെ ഭാഗമായി ഭിന്നശേഷിയുള്ള കുട്ടികൾക്കായുള്ള ഫിംഗർ ഡാൻസ് എന്ന എക്സർസൈസ് കേരളത്തിലെ സ്‌പെഷ്യൽ സ്കൂൾ അധ്യാപകരെ പരിശീലിപ്പിക്കുന്ന പദ്ധതി ആരംഭിച്ചു. 

തൃശ്ശൂർ പുഴയ്ക്കല്‍ ഐഎഎന്‍ ഇൻസ്റ്റിറ്റ്യൂട്ട് ഓഫ് റീഹാബിലിറ്റേഷൻ ആൻഡ് റിസർച്ചിൽ വച്ച് നടന്ന ചടങ്ങിൽ നടൻ സണ്ണി വെയ്ൻ പദ്ധതി ഉദ്ഘാടനം ചെയ്തു. അഭിനേതാക്കളായ ഗായത്രി സുരേഷ്, ബിറ്റോ ഡേവിസ് തുടങ്ങിയവരും ചടങ്ങിൽ പങ്കെടുത്തു. ഇംതിയാസ് എന്ന വ്യക്തി വികസിപ്പിച്ചെടുത്ത പരിശീലന പരിപാടിയാണ് ഇത്. ഇംതിയാസ് പരിശീലകനായും എത്തുന്ന ഈ പ്രോഗ്രാമിന്റെ ചീഫ് ഓഫ് ഓപ്പറേഷൻ ബിബിൻ പെരുമ്പിള്ളിയാണ്. സംവിധായകൻ ടോം ഇമ്മട്ടിയാണ് ക്രീയേറ്റീവ് ഡയറക്ടർ. ഡോക്ടർമാരായ സിജു രവീന്ദ്രനാഥും സുമേഷ് ടി പിയും ഈ പ്രോഗ്രാമിന്റെ സയന്റിഫിക്ക് റിസർച്ചും കോർഡിനേഷനും നിർവഹിക്കുന്നു. ഈ പരിശീലന പരിപാടി തെറാപ്പി കേരളത്തിൽ മാത്രം ഒതുക്കിനിർത്താതെ ദേശീയ തലത്തിലേക്കും അന്തർദേശീയ തലത്തിലേക്കും വളർത്തിയെടുക്കുവാനാണ് തങ്ങളുടെ ശ്രമമെന്ന് ഡിക്യുഎഫ് പ്രവര്‍ത്തകര്‍ അറിയിച്ചു.

ഈ കമ്മ്യൂണിറ്റിയിൽ സണ്ണി വെയ്ൻ, സാനിയ ഇയ്യപ്പൻ, ബ്ലെസ്ലി, വിനി വിശ്വ ലാൽ, സോഹൻ സീനുലാൽ, നിത്യ മാമൻ, രാജേഷ് കേശവ്, ബാദുഷ, എന്നിങ്ങനെ നിരവധി പേർ അംഗങ്ങളായിട്ടുണ്ട്. പതിനായിരം കലാകാരന്മാർക്ക് മാത്രമാണ് ഇതിൽ അംഗത്വം നൽകുന്നത്. ഇരുന്നൂറ് വർഷത്തോളമായി അവഗണിക്കപ്പെടുന്ന അയ്യന്തോൾ ദേശത്തെ പുലികളി കലാകാരന്മാർക്ക് കഴിഞ്ഞ ദിവസം ഗോൾഡൻ മെമ്പർഷിപ്പ് നൽകി കമ്മ്യൂണിറ്റിയുടെ ഭാഗമാക്കി തീർത്തിരുന്നു. ദുൽഖർ സൽമാൻ ഫാമിലിയുടെ ഭാഗമായി കേരളത്തിലെങ്ങും ചിരി സദസ്സുകൾ തുടങ്ങുവാനും തീരുമാനമായിട്ടുണ്ട്. ഇന്റർനെറ്റിന്റെയും ജോലിതിരക്കുകളുടെയും ലോകത്ത് നിന്നും മാറി മനസ്സ് നിറഞ്ഞ് പൊട്ടിച്ചിരിക്കാനുള്ള ഒരു വേദിയാണ് ഇത് കൊണ്ട് ഉദ്ദേശിക്കുന്നത്. സുജയ് ജെയിംസ്, വിജിത്‌ വിശ്വനാഥൻ, മീഡിയ മാർക്കറ്റിംഗ് അനൂപ് സുന്ദരൻ, പിആർഒ പ്രതീഷ് ശേഖർ എന്നിവരാണ് ഡിക്യുഎഫ് പ്രോഗ്രാം കോഡിനേറ്റര്‍മാര്‍.