അവിശ്വസനീയമായ അനുഭവം; ജാക്കി ചാനുമൊത്തുള്ള ഫോട്ടോ പങ്കുവച്ച് ഹൃത്വിക് റോഷൻ

ഹൃത്വിക് റോഷൻ നായകനായി പ്രേക്ഷകരുടെ പ്രിയംപിടിച്ചുപറ്റിയ കാബില്‍ ചൈനയില്‍ റിലീസ് ചെയ്യുകയാണ്. ചിത്രം ജൂണ്‍ അഞ്ചിനാണ് റിലീസ് ചെയ്യുന്നത്. സഞ്ജയ് ഗുപ്‍തയാണ് ചിത്രം സംവിധാനം ചെയ്‍തത്.  2017ലായിരുന്നു ചിത്രം ഇന്ത്യയില്‍ റിലീസ് ചെയ്‍തത്. ചിത്രം ചൈനയില്‍ റിലീസ് ചെയ്യുന്നതിനു മുന്നോടിയായി ഹൃത്വിക് റോഷൻ അവിടെ പ്രചരണത്തിന്റെ തിരക്കിലാണ്. അതിനിടെ ജാക്കി ചാനെയും ഹൃത്വിക് റോഷൻ കണ്ടു. ജാക്കി ചാനൊത്തുള്ള ഫോട്ടോയും ഹൃത്വിക് ഷെയര്‍ ചെയ്‍തിട്ടുണ്ട്.

ജാക്കി ചാനെ കാണാൻ കഴിഞ്ഞത് അവിശ്വസനീയമായ അനുഭവം എന്നാണ് ഹൃത്വിക് റോഷൻ സാമൂഹ്യമാധ്യമത്തില്‍ പറയുന്നത്. അതേസമയം റിലീസിന് മുന്നേ ചൈനയില്‍ കാബിലിന്റെ പ്രദര്‍ശനം നടത്തിയപ്പോള്‍ വലിയ പ്രതികരണമാണ് ലഭിച്ചത്. ഹിന്ദി സിനിമയിലെ ഏറ്റവും സൌന്ദര്യമുള്ള നടനെന്ന് വിശേഷിപ്പിക്കപ്പെടുന്ന ഹൃത്വിക് റോഷന് ചൈനയിലും ആരാധകരെ ലഭിക്കുകയാണ്. ഹൃത്വിക്കിനോടുളള സ്‍നേഹവും അവര്‍ പ്രകടിപ്പിക്കുന്നു. പുതിയൊരു ചെല്ലപ്പേരും ചൈനക്കാര്‍ നല്‍കുന്നു. ദ ഷുവായി എന്നാണ് ഹൃത്വിക് റോഷനെ സിനിമ കണ്ടവര്‍ വിളിക്കുന്നത് എന്നാണ് റിപ്പോര്‍ട്ട്. ഏറ്റവും സുമുഖനായ എന്നാണ് അവരുടെ ഭാഷയില്‍ ആ പേരിന് അര്‍ഥം. കാബിലില്‍  ഒരു അന്ധകഥാപാത്രമായിട്ടായിരുന്നു ഹൃത്വിക് റോഷൻ എത്തിയത്.   യാമി ഗൌതം ആണ് ചിത്രത്തിലെ നായികയായി എത്തുന്നത്. ഹൃത്വിക്കിന്റേതായി ഏറ്റവും അടുത്ത് റിലീസ് ചെയ്യാനുള്ള ചിത്രം സൂപ്പര്‍ 30 ആണ്.  ഗണിതശാസ്‍ത്രഞ്ജനായ ആനന്ദ് കുമാറായാണ് ഹൃത്വിക് റോഷൻ ചിത്രത്തില്‍ അഭിനയിക്കുന്നത്.