'എല്ലാ വീടുകളിലും ഒരു മലാലയുണ്ട്, ഈ സിനിമ വലിയ ഉത്തരവാദിത്വം'; 'ഗുല്‍ മകായ്' സംവിധായകന്‍

നൊബേല്‍ സമ്മാനജേതാവ് മലാല യൂസഫ്‌സായിയുടെ ജീവിത കഥ പറയുന്ന സിനിമ ചെയ്യുന്നത് വലിയ ഉത്തരവാദിത്തമാണെന്ന് സംവിധായകന്‍ അംജദ് ഖാന്‍. 

മുംബൈ: സ്ത്രീ വിദ്യാഭ്യാസത്തിനായി പ്രവർത്തിക്കുന്ന ആക്ടിവിസ്റ്റും  നൊബൽ സമ്മാന ജേതാവുമായ മലാല യൂസഫ്‌സായിയുടെ ജീവിത കഥ പറയുന്ന സിനിമയാണ് 'ഗുല്‍ മകായ്'. അംജദ് ഖാൻ ആണ് ചിത്രം സംവിധാനം ചെയ്യുന്നത്. മലാലയെക്കുറിച്ചുള്ള സിനിമ ചെയ്യുന്നത് ഒരേസമയം അഭിമാനവും വലിയ ഉത്തരവാദിത്വവുമാണെന്ന് അംജദ് ഖാന്‍ പറഞ്ഞു. 

ഇത്തരത്തിലൊരു കഥ സിനിമയാക്കേണ്ടത് അനിവാര്യമാണെന്ന് ഉറച്ച് വിശ്വസിക്കുന്നു. എല്ലാ വീടുകളിലും ഒരു മലാലയുണ്ട്. മനക്കരുത്തുണ്ടെങ്കില്‍ ആര്‍ക്കും മാറ്റങ്ങള്‍ കൊണ്ടുവരാന്‍ സാധിക്കുമെന്നും അതാണ് 'ഗുല്‍ മകായ്' പറയുന്നതെന്നും അംജദ് ഖാന്‍ കൂട്ടിച്ചേര്‍ത്തു.

റീം ഷെയ്‍ഖ് ആണ് ചിത്രത്തില്‍ മലാലയായി അഭിനയിക്കുന്നത്. താലിബാൻ തീവ്രവാദത്തിന് എതിരെ മലാല നടത്തിയ ധീരതയാര്‍ന്ന പോരാട്ടമാണ് ചിത്രം പറയുന്നത്. അടുത്ത മാസം 31നാണ്  'ഗുല്‍ മകായ്' പ്രദര്‍ശനത്തിന് എത്തുന്നത്. ദിവ്യ ദത്ത, പങ്കജ് ത്രിപാതി, അതുല്‍ കുല്‍ക്കര്‍ണി തുടങ്ങിയവരും ചിത്രത്തില്‍ അഭിനയിക്കുന്നത്. നോബല്‍ സമ്മാനം നേടിയ ഏറ്റവും പ്രായം കുറഞ്ഞ ആളായ മലാല യൂസഫ്‌സായുടെ ധീരതായര്‍ന്ന ജീവിതപോരാട്ടമാണ് ചിത്രം പറയുന്നത് എന്ന് ചിത്രത്തിന്റെ പ്രവര്‍ത്തകര്‍ പറയുന്നു.